Read rendile 1 Koriinto 7 Bible Online

1 Koriinto 7 - rendile bible

1 Koriinto 7

¹Toolla wihi goorat atin khadaabi atin isoochiirteen ka iworsatteene atin isoolaaba. Aa! A haaggantahe chiꞌ mejel min idisan.

²Iꞌdaasenyi ꞌdooꞌdi isidisanne isleeurꞌdo a buur gone, a deefta chirri aram ba arantiissa on khabo ommos arame ba arankicheeda on khabto.

³Makhaábal a hiliissa chuꞌus makhaabassiis leeurꞌdo, arame laka a hilicheeda chiꞌiche arankiche leeuꞌdurto.

⁴Makhaabale sartiche ma anatti iꞌdaasenyi arankicheeda anta, makhaabal laka sartiis ma anti iꞌdaasenyi makhaabassiissa anatta.

⁵Maantaka sammata atin koloo isikadaagin on menye, lammatiin isleeurꞌdin iistiranna. Chaꞌatin istirattaan la, geeddoo on istirda ꞌdee weysi kalday gela. Yomboka ꞌdeerka isisoonokhda, uus Seytaan jeenteti atin isjeyin iubaaꞌdan u kajmeti uskeel atin kaluguꞌddo atin ikeenine.

⁶Iꞌdaasenyi waha amuri an atin siicho menye, a atin leeꞌdiicha on.

⁷Incheenka atin tuumman iꞌdaaya tateehiine mindischo laan fiddiitaan. Iꞌdaasenyi ebba siintiissa Waakh kaꞌhele. Koo siintane khaba koo la siintoo addane khaba.

⁸Maantaka ꞌdooꞌdi minan idisan ichoow ki liidisin ichoow muunkhoyyo ba wihi icho ideefo, a ichohi iꞌdeey ifiddiyaan.

⁹Iꞌdaasenyi chirri icho isjeyin iubaaꞌdan, min a disteene ommos a ladiso. Iꞌdi tahe ichohi makhaabassi ommos makhaabali icho weyti leeurꞌdaan iildeerroti ka, ichohi minan disti ommos ladiso deefta.

¹⁰Toolla ꞌdooꞌdi isdiste amura an siicho keey menye, a ki Kamur kayimiyye, makhaabál iiche makhaabaliche katabin.

¹¹Iꞌdaasenyi chiꞌiche makhaabaliche katabte, mindischo laan a fiddiito, ommos makhaabaliche a isineybeen. Makhaábal la uus makhaabassiis rihin.

¹²Atinhi addan la wihi an atin iadeeh, chiꞌ etoo koo Kiriistee makhaabassi Kiriisto irummeysan khabo iche la leefiddiyin ꞌdoonto, makhaabala uus makhaabassa rihin. Waha wihi Kamur essi menye a malaaya on.

¹³Toro la chirri makhaabassoo too Kiriistee makhaabaloo Kiriisto irummeysan khabto, ulla usuhi leefiddiyo ꞌdoono, makhaabassa iiche makhaabala katabin.

¹⁴Iꞌdi tahe makhaabalicheki Kiriisto irummeysan jeentetichuu Waakh a munyaache. Makhaabassi Kiriisto irummeysan, jeenteti makhaabali Kiriisto rummeestuu Waakh iche a munyaache. Chirri iche iꞌdaas ieheynan la, nyaakhutiin ki ꞌdooꞌd Kiriisto mee. Iꞌdaasenyi saggi iche ijirtuu, nyaakhutiin Waakh a munyaache.

¹⁵Iꞌdaasenyi chirri makhaabali Kiriisto irummeysan makhaabassiis rihe, ommos makhaabassi Kiriisto rummeysatte makhaabaliche katabte, seley a baheen on. Eti koo Kiriistee chirraas mindischo ka a lafure. A mehe Waakh a inno wahe ꞌdee nebey kafiddiina.

¹⁶Atihi makhaabassoowe, atihi makhaabalaah Kiriisto ikeento ꞌdee Kiriisto rummeesti ma garatti. Ommos atihi makhaabaloowe atihi makhaabassaah Kiriisto ikeento ꞌdee Kiriisto rummeysatti ma garatti.

¹⁷Etiimba iꞌdi goorat Kamur igooche toro la Waakh iwahe, iꞌdaas on a eheetti. Amura a ki an ururre Kiriisto tuumman ka ꞌdooꞌd icheeko.

¹⁸Maanti Waakh atin wahe etoo a khandiineet? Etaas uus sumatti khandi bihin. Etoo maanti Waakh wahe ma khandiineynan a? Etaas uus lakikhandiyin laka.

¹⁹Anki Waakh ka, khandi ommos khandiwaayyo a walahba. Wihi khumman a atihi amurreti Waakh raahto.

²⁰Ebba wihi maanti Waakh wahe us eheneet on a kafiddiyo.

²¹Maanti Waakh atin wahe gaasiinkoo bowꞌda eheet? Awaꞌdwaaꞌdina, iꞌdaasenyi chirri saggoo atin bowꞌda ikabahtaan jirto bowꞌda kabaha on.

²²Iꞌdi tahe eti maanti Kamur wahe bowꞌda eheet, Kamur ka a eti furan. Iꞌdaasu la, eti maanti Kamur wahe furneet, a bowꞌda Kiriisto.

²³Waakh wihi buurenye gute atin gatte. Maantaka bowꞌdati wahanyeyyohi enenyet ꞌdoono iitaahana giꞌde.

²⁴Maantaka ꞌdooꞌd Kiriistokaaw ebba iꞌdi maanti Waakh wahe us eheet on a ifiddiyo.

²⁵Toolla amur Kamur isiiche galtaam miinsan mele. Iꞌdaasenyi jeenteti uurnugleeli Kamure an eti lakakhuufo iahuu, maleey a atin siicha.

²⁶Ani ka, jeenteti sinati buurenye inno kajirruu, a deefta chirri mejel ebba saggi us ijiro on ijiro.

²⁷Min a disatte? ꞌDeerka seley bahnaan ayowan. Min ma disan a? ꞌDeerka makhaabál ayowan.

²⁸Iꞌdaasenyi chirri at min disatte laka uskeel ma yeelin. Galtaanti ladise laka uskeel iche yeesse mele. Iꞌdaasenyi ꞌdooꞌdi isdiste jiroti harrata ka sinati buurenye khaba, anna sinayyohane atin kaholin ꞌdoona.

²⁹ꞌDooꞌd Kiriistokaaw wihi an atin icheeko kallaayo, ibeenneti ankhan a gaabantahe. Uus toolla kakhabatti eti makhaabál khabo, iꞌdi eti makhaabál ikhabin a ijiro.

³⁰ꞌDooꞌdi ooyo la, iꞌdi ꞌdooꞌdi iooyin a ijiro. ꞌDooꞌdi hamaado la iꞌdi ꞌdooꞌdi ihamaadin a ijiro. Ki walah gatti la iꞌdi ki meehaas kiis ieheynan a isiekkaacho.

³¹ꞌDooꞌdi wahanyeyyohi harrata on kaassohti la, iꞌdi ꞌdooꞌdi ikaassohan a ijiro. Iꞌdi tahe harrata saggi iche toolla ijirto ka, dowwanoha a kutta.

³²Atinhi waꞌdwaaꞌd ikhabine ꞌdoona. Eti min idisan wihi us kamassi tuumman a wihi Kamur miinsane, ꞌdee saggi us Kamur ikahamaadicho iyowti.

³³Iꞌdaasenyi eti min diste wihi us aw ikhabo a fiddihi goobiissa harrata ichoow makhaabassiisti us kahamaadicho on.

³⁴Us sag lamma liijiita. Makhaabassi makhaabal ikhabin ommos inanti galtaame wahanyeyyohi Kamur on aw ikhabaan. Iꞌdi tahe wihi iche ꞌdoonto a sartiche ichoow rubeyticheti iche tuum Kamur ibihisso. Iꞌdaasenyi aranti disan wihi iche aw ikhabto, a fiddihi goobicheeda harrata ichoow makhaabalicheki iche kahamaadisso.

³⁵Waha an atin idowo jeenteti an atin ijeycho menye, a iroonotiinna, ꞌdee fiddihi mujjume jirtaane, tuum Kamur isibihissaan.

³⁶Iꞌdaasenyi chirri etoo galtaanti us alkume kol us mujjum iwoywoyin koogyahe, iche la geeddi lakadiso eleesse, wihi imale a yeelo, uskeel us yeele mele. A isdisteen on.

³⁷Iꞌdaasenyi chirri et goorat masse, uuriis ka la gooche galtaam ma disdi yidahye ulla isjeyin yabuuꞌde, iꞌdaasenyi etoo ikaholin, a haaggiche chuꞌus mindischo laan fiddiye laka.

³⁸Maantaka eti min diste a haaggiche, iꞌdaasenyi ki min idisan jiti weyti deefo tabe.

³⁹Makhaabale geeddi makhaabaliche on jiro, makhaabaliche ma katabto. Iꞌdaasenyi chirri makhaabaliche buje, chiꞌiche ꞌdoonto a geeddi eti iche ꞌdoonto disti. Iꞌdaasenyi eta ki Kamur rummeeste on a eheetti.

⁴⁰Ani ka chiꞌ liidisine iche saggaas ifiddiito, iche weyti hamaadda. Ani ka an mali Rubeyti Waakhe khaba.