Read rendile 1 Koriinto 9 Bible Online

1 Koriinto 9 - rendile bible

1 Koriinto 9

¹An ergaano menya? An wihi an ꞌdoono ꞌdooꞌd Kiriisto yeelo ma yeelo? An Yeessohi Kamureene ma argin a? Jeenteti holi an dowe menya atin ichoow Kamur koo kalday ititaaheen?

²Chirri ꞌdooꞌdi addan ka an ergaano Kiriisto ieheynan laka, wihi massan atin ka an a ergaano! Iꞌdi tahe atin iꞌdoo ka a sumatti saggi an rumanka ergaanoti Kamur iahe tusso.

³ꞌDooꞌdi ihukkumo wihi an ilaabo kallaayo.

⁴Hili nah kijirro ka, nah golol ma muꞌdan a?

⁵Nah iꞌdi ergaanoti addan u ichoow iꞌdi walaalinye Kamureen ichoow Keefas[12] illeh u, deyyehoteenyoti too Kiriisteenye nah walhisso ma muꞌdan a?

⁶Ommos ani ichoow Barnaba kalday on hil haagginna ꞌdee golol kaꞌhella?

⁷Iskartoh maanta hili iche haaggisso ka toro chilimme gutta? Etoh gos khaba toro gurnaanki us gosiis kasoobahche iumhan? Ersinkoh adihiis yaakhicha toro la haanu ikadamin?

⁸An waha mali weeli enenyet kalday on keelda? Chiirnaanneti amurre Muusa laka iꞌdaas on kachiiran menya?

⁹A mehe Amurre Muusa wihi kachiiran, “Heer chirri us ꞌdargaayye yabti af ahidin.”[13] Waakh chuꞌus iꞌda yidah ati ka heer kaldaye aw ikhaba?

¹⁰Waakh maanti us iꞌda yidah, yeeda eti us tuum miinsanyahe a nah menya? Aa! Waha jeenteteenna liichiire. Eti gos khuto ichoow ki ꞌdargaayye urfo kabahcho, icho tuumman khajjeeli icho gurnaan isleegismaane khabaan.

¹¹Nah a iꞌdi eti ilmohi Rubeyti Munyee kayamiit uurassiin kachibe gone, gurnaanki harratane nah atin kasugno a wihi weyti buurenya?

¹²Chirri ꞌdooꞌdi addan gargaari us atin kaꞌhelo muꞌdanyahe, nah kootte incheenka ꞌdirihicho ma muꞌdan a? Iꞌdaasenyi nah wahaas nah muꞌdan ma khaatin. Nah sina tuummane igarrahsanne, ꞌdee wohoo rucchule Wora Haaggane Kiriisto miinsan jeycho ma jiraan.

¹³Saggi eti minki Waakhe buure hil kahaaggicho gololiis minkaas ikaꞌhelo ma garattaan a? Toro la eti chalag hil kahaaggicho wihi chalagtaas lakasoorriyoocho miil kakhaba.

¹⁴Iꞌdaasu laka Kamur amuri us bahche a kan, eti tuummane Wori Haaggan cheeko laka, gololiis woraas us cheeko on kaꞌhela.

¹⁵Iꞌdaasenyi an injire waha imuꞌdan golol ma kayowan. Toolla la khadaaba mee soochiiro ꞌdee golol isiissaan. Anihi Wori Haaggane an iꞌdaanu cheeko an keeylajo liikakhaato ka, anihi amuute deefta!

¹⁶A mehe Wori Haaggane an cheeko ka walah an keeylajo mele. Iꞌdi tahe wora an cheeko Waakhe ihossa. Chirri an Wori Haaggan icheekin la, sinati isugto eenna a buure!

¹⁷Chirri ani jeenteti an iꞌdoono on u an Wora Haaggan icheeko, ꞌdeerka kalaꞌd a suga gon. Iꞌdaasenyi, Waakh a isoobahsate hila ikorche sag an ikabahsadi la mele.

¹⁸ꞌDeerka kalaꞌddeey a mehe? Kalaꞌddeey talla, Wora Haaggane an cheeko et iguto mele, toro la wihi imuꞌdan ka, an wohoo rucchul laka ma khaato.

¹⁹Et ianti mele. Iꞌdaasenyi an bowꞌdati enenyet tuummane iskayeela, ꞌdee geeddi an abuuꞌd ꞌdooꞌdi buure Kiriisto ikeena.

²⁰ꞌDooꞌdi Yaꞌhuud ka iꞌdi Yaꞌhuude iskayeele ꞌdee ꞌdooꞌdi Yaꞌhuud Kiriisto ikeena. ꞌDooꞌdi amurre Muusa anatti ka la, an iꞌdi eti amurre Muusa anatti iskayeele, ꞌdee ꞌdooꞌdi amurre Muusa anatti laka Kiriisto ikeena. Iꞌdaasenyi amurre Muusa ma ianatti.

²¹ꞌDooꞌdi amurre Muusa ikhabin ka la, an iꞌdi eti amurre Muusa ikhabine iskayeele, ꞌdee iꞌda ka ꞌdooꞌdi amurreta ikhabin Kiriisto ikeena. Iꞌdaasenyi an amurreti Waakh ma ꞌdiiꞌdo, toro la amurre Kiriisto ianatta.

²²ꞌDooꞌdi ꞌdabakhe ka la, an a isꞌdabakhnoocha, ꞌdee icho Kiriisto ikeena. An ꞌdooꞌda tuumman iꞌdichooda iskayeele, ꞌdee sagag tuumman ka ꞌdooꞌd gaasoo Kiriisto ikeena.

²³Waha tuumman a iroonoti Wori Haaggane lataaꞌhicho, ꞌdee buuhi Wori Haaggan atin leegisma.

²⁴Saggi atin igarattaan u ꞌdooꞌdi iskabahsati icho tuummane orya, iꞌdaasenyi etoo kalday on ꞌdooꞌd sooricha ꞌdee wihi laꞌhelo ꞌhela menya? Atin laka saggaas iorya ꞌdee wihi ꞌdooꞌd lasiicho ꞌhela.

²⁵Eti oriisi kijiro tuumman weyti sartiis oriisi itannabicha. Iꞌdane yeela ꞌdee ꞌduubi massati ꞌhela. Iꞌdaasenyi inno ꞌduubi jirtuu tuumman imassanne yowanna.

²⁶Maantaka an chaꞌan nyaamo baabul on ma ariꞌd, iꞌdi eti etoo addan jaho u, [14] hafar on ma jaho.

²⁷Iꞌdaasenyi an sarteey a jaha, toro la tuum jeycha uus ꞌdee inkoo an ꞌdooꞌdi ittaawe Wori Haaggan icheeke, ani rubeyteey oriisi goyaka liibihinne.