Read rendile 2 Koriinto 10 Bible Online

2 Koriinto 10 - rendile bible

2 Koriinto 10

¹Ani Baawulo uur Kiriistoki ꞌdabakhe ka ichoow samacchaar Kiriisto ka a atin hawwaasda. Waha a anihi chaꞌan atin leejiro, uure ꞌdabakhyahe leessi, iꞌdaasenyi chaꞌan atin ileejirin roorro ma khabo leessi.

²ꞌDooꞌdoo mehe essa ya, nah saggi ꞌdooꞌdi harratane ijirra. Maanti an amiit wihi liikasugo a anihi icho roorro laan leeyyeedo. Iꞌdaasenyi a atin hawwaasda wihi iꞌdaase iiholinna.

³A mehe inno harratane kijirra. Eheetteey laka, dihoti inno kajirro ti weeli enenyet isladiho mee.

⁴A mehe birti inno diho leeiranni ti harrata mee, birteen a miigti Waakhe worassi beenaat jejjebisso.

⁵Wihi inno jejjebinno a iriirti yeedi beenaat liiriiro ichoow rannyaatti noole abanti Waakh laabti jeyisso. Nah toro mal tuummane khabanna ꞌdee iholinna Kiriisto raahaan.

⁶Maanti atin raahnaanki atin Kiriisto raahtaan atin tuumman tuum kayeesseen, nah walah tuumman ka a tannabanne yeeddaagiwwaayyo tuumman sina tusna.

⁷Atin walah kharicheeda on yeytaan. Chirri etoo saggi us koo Kiriisto iyahe ubo waha toro a kamassi. Saggaas us koo Kiriisto iyahe on nah laka koo Kiriisto inahe.

⁸A mehe antohi Kamur nah siiche wihi atin jejjebcho menye a wihi atin diso. Chaꞌan antohaas weyti keeylajo laka, an ma uryaawo.

⁹Anihiiyye khadaabbeteey ka etoo roorro atin gesso iyoog ma ꞌdoono.

¹⁰A mehe ꞌdooꞌd gaasoo mehe essa ya, “Khadaabbetiis yeedi huleesenye toro miigenye kijira, iꞌdaasenyi chuꞌus inno leejiro us a ꞌdaranyahe yeediis laka walah us yahe mele.”

¹¹Eti iꞌdaase waha a kamassi. Wihi nah khadaab ka atin isoochiirro iche on maanti nah atin leejirro laka yeella.

¹²Rumanka nah koloo kalday laka ꞌdooꞌdi haaggiis enenyet icheeko ma kajno ekkatiis ma iskayeello, ommos ma kajno icho ma iskekkaanno. Wihi icho yeelaan a ꞌdalammoon on. Iꞌdi tahe icho haaggicho ka a isrerreegaane toro haaggicho iskeekkaachaan.

¹³Nah la wihi nah keeylajno, geeddi mujjumenye nah liichiire ma kunno. Iꞌdaasenyi wihi nah keeylajno ichoow hili Waakh dahanteenyo soogesse a israahaane, atin laka hila goya a kijirtaan.

¹⁴Nah geeddi Waakh nah ichiire ꞌdirihiche ma kunno. A mehe nah ꞌdooꞌdi orey Wori Haaggane Kiriisto miinsan atin sooeleeliche eheet.

¹⁵Toro la nah hili etoo addan haaggiche ma keeylajno, geeddi nah liichiire ꞌdirihiche ma kunno. Wihi nah khajjeello, geeddi kakhuufnaanki atin Kamur kakhuuftaan kakhaymo, hili nah goytiin ka haagginno weyti ballaasta.

¹⁶Iꞌda ka Wori Haaggan ilassi ꞌdirihiin kijiro laka a kacheekna, toro hili etoo addan intoo addan ka haaggiche ma keeylajno.

¹⁷Iꞌdaasenyi, “Eti eylajo wihi Kamur yeele a keeylajo.”[12]

¹⁸A mehe eti iskoolicho rumanka koolo ma khabo. Iꞌdaasenyi eti Kamur khaatti iche koolohi rummaat khaba.