Read rendile 2 Koriinto 12 Bible Online

2 Koriinto 12 - rendile bible

2 Koriinto 12

¹Orey on isohda eylaja. Iꞌdaasenyi indigir iche khabto mele. Eheetteey laka inti an eylajeey ka eleelo a wahanyeyyohi Kamur ituse iꞌdi maanta fooltabchoyyo ichoow wihi Kamur isoobabbakkaahiche.

²An etoo usu ichoow Kiriisto wohoo kalday yahiine guꞌh tomon ichoow affar kutte goobi Waakh ka inti seeyyahnaatteet liikorche a garda. Sar kijiryeey ommos sar ma kijirineey ka ba an ma gardi, Waakh on garta.

³Eta a garda, iꞌdaasenyi sar kijiryeey ommos ma kijirineey ka ba Waakh on garta.

⁴Eta a lakhabte inti gosi Waakh lageeche, toro la yeedi lagane weeli enenyet af leekeenin ikamalin daage.

⁵Ani eti iꞌdaasenye keeylaja. Iꞌdaasenyi wihi ꞌdarriteey tuso kaldach on keeylaja menye, an awteey ma keeylajo.

⁶A mehe chaꞌan eylajin ꞌdoono laka, an ꞌdalam mee, iꞌdi tahe an wihi rummaat on cheeka. Toro la ꞌdooꞌd usuhi wihi us ikaargo ichoow wihi us ikadaago ka eti rumanka an ahe argo ꞌdoona. Iꞌdaasenyi chaꞌan eylajo ꞌdooꞌd etoo deefo iekkaacha, ꞌdeerka an ma eylajo.

⁷Jeenteti wahanyeyyohaas hahhaaggane Waakh itusuu la, sarteey goya kudakkoo lagesse us ꞌdee an weyti serey isgeenne. Kudakka la a ergattiti Seytaane ijahto.

⁸Kol seyyahe Kamur hawwaasde, waha ikabukkhi iidah.

⁹Iꞌdaasenyi mehe isoolaabe ya, “Haaggeeyki buure a kiyaakha. A mehe ꞌdarritaah ka miigteey tuum a lasoobabbakkaahiche.” Maantaka an ꞌdarriteey ka weyti hamaad ka eylaja, ꞌdee miig Kiriisto goyteey furatta.

¹⁰Chaꞌan indigir Kiriistuu ꞌdaranahe, ommos chirri ꞌdooꞌdoo ileeabaarramo, ommos chirri an sina ꞌhelo, ommos chiꞌ sina liiomhicho ommos walahbaaw miigenye an goya leeamiit ka laka, an a hamaada on. Iꞌdi tahe ꞌdarriteey ka, miig a khaba.

¹¹An eti ꞌdalamenye iskayeele, iꞌdaasenyi atine iholissseen. Atine kootte incheenka haaggeey tuumman cheektaan. A mehe an walah an ahe mele. Eheetteey laka chiꞌ ergaanota a khukkhummantahe leessi liikeekkaacho, meel an icho kaankhanahe mele.

¹²Goytiin ka wihi eti ergaanee tuso iꞌdi maanta wahanyeyyohi miigti Waakh tuso ichoow girmo ichoow wihi ittaawenye weeli enenyet yeelin iubaaꞌdan garrahsihi buure ka a layeele.

¹³Haaggi kaldaye ururre Kiriistoti addan liiyeele atin la atin liikayeelin, a huleesi chilimme an atin ikorin. Khufa ikakuta!

¹⁴Toolla koli seyyahnaatteet a tannabde goytiinna emeet ꞌdoona. Hulees an atin korcho la mele. A mehe wihiin an ꞌdoono mele, iꞌdaasenyi atine atin ꞌdoona. Iꞌdi tahe nyaakhut mee ꞌdooꞌdi dele walah yahay igesso, iꞌdaasenyi ꞌdooꞌdi nyaakhut dele iche nyaakhut walah yahay igessa.

¹⁵Ani ꞌdeerka hamaad ka wihi an khabo tuumman ichoow awteey laka jeentetiin u a diiba. Iꞌdaasenyi geeddi ꞌdooninti an atin ꞌdoono kakhayanto, geeddaase ꞌdooninti atin iꞌdoontaan nuglaatta.

¹⁶Atin mehe garattaan ya, a rume hulees an atin korche mele, iꞌdaasenyi an khara ka a atin kakharaawe.

¹⁷Etoo an atin isooerge ka, an injire a atin kakharaawe?

¹⁸An Tiito a hawwaasde, toro etoo koo Kiriistee leesooerge. Tiito injire a atin kakharaawe? Lammateenyo rubeytoo kalday ma khabin a? Toro la dabatoo kalday ma raahin a?

¹⁹Chirraas tuumman kol nah ortiin ka isribno koogtahiin? Nah Waakh ortiis ka saggi ꞌdooꞌdi icho ichoow Kiriisto wohoo kalday yahiine iyeyyeena. Aalasseeyki an weyti ꞌdoono wihi nah yeello tuumman la a atin miigoochaan.

²⁰Iꞌdi tahe maanti an goytiin amiit wihi an karooro, saggi kootte an iꞌdoono ma atin iꞌhelo, toro la saggi atin kootte iꞌdoontaan ma iꞌhessaan. Mehe karoora ya, waha tuumman goytiin ka a ꞌhela, jaakh ichoow inaaf ichoow holi buure ichoow wihi ebba wihi awtiis kalday on yowti ichoow ham ichoow meꞌdeꞌddeel ichoow rannyaat ichoow hugunꞌdarri.

²¹Jeenteti wahuu wihi an karooro maanti toro an atin iamiit Waakkheey ortiin ka a inuglaacha, an la jeenteti ꞌdooꞌdi buure uskeel iyeele uliba uskeelaas ikasoonokhan u a bolkha. Uskeelaas a wihi biꞌdire ichoow ꞌdooꞌdi isidisanne isleeurꞌdo ichoow sohoꞌddarriti icho yeeleen.