Read rendile 2 Koriinto 3 Bible Online

2 Koriinto 3 - rendile bible

2 Koriinto 3

¹Waha nah elanni ka, rumanka a inokhanna toro haaggeenyo atin isoocheekna? Rumanka nah iꞌdi ꞌdooꞌd gaasoo u, khadaabbeti haaggeenyo cheekto ma atin kaꞌdoonno. Toro la atin ma nah kaꞌdoontaan.

²Atin rubeytiin a iꞌdi khadaabeenyoki uurasseenyo goya lakachiire, enenyet tuumman garti, toro la soomo.

³Wihi ꞌdowe, atin a khadaab Kiriistoki hileenyo dele. Waha la wihi ringi ka lachiire menye, Rubeyti Waakkhi jiro lakachiire. Toro wihi daakki hafan lakachiire menye, Rubeyti Waakkhi jiro iche uurassi weeli enenyet goya kachiirte.[3]

⁴Jeenteti nah Kiriisto ka tuum Waakh ikakhuufnuu, nah uurlammaal ma khabno.

⁵Nah awteenyuu walah nah nabuuꞌd mele, iꞌdaasenyi wihi nah yeelin nabuuꞌd Waakh on kayamiitiin.

⁶Waakh ꞌdooꞌdi ayyinti husube us gooche ifalin yabuuꞌde nah kayeele. Ayyinta husub la amurreti chiiran menye, a wihi Rubeyti Waakh kayimiy. A mehe amurreti lachiire omoote keenta, iꞌdaasenyi Rubeyti Munyee jiro keenta.

⁷Amurreti omoot keente dagah lakakhore, ababnaanki Waakkhi ababo leesoobahte.[4] Ababnaanka fool Muusa ababo samacchaare jite. Eheetteey laka weyti ababneete ichoowka ꞌdooꞌdi Issiraayel fiirin ma yabuuꞌd. Maantaka chirri amurreti omoot keento ababnaanki geeddee leesoobahte,

⁸hili Rubeyti Munyee ababnaankiche weyti ma kuto?

⁹Chirri hili enenyet uskeel igoocho ababnaanki geeddee khabe, geeddoo meheenye ababnaanki hili enenyet Waakh ortiis ka ficcho kuta.

¹⁰Iꞌdi tahe jitaas oraate ababo a iꞌdoo us toolla iababin, a mehe ababnaanki jiti toollane weyti kuta.

¹¹Toro la chirri ayyinti raagane kutto ababnaan leetimiy, ababnaanki ayyinti husube sooꞌhaddo rumanka geeddoo meheenye kuta?

¹²Maantaka jeenteti nah khajjeelaas ikhabno, iche roorro laan ijirra.

¹³Nah iꞌdi Muusahi goorat dafartoo ꞌdabakhe fool iskoogooge, ꞌdee ꞌdooꞌdi Issiraayele ababnaankaas samacchaar jite fiiricho istirte mee.

¹⁴Iꞌdaasenyi malassicho a ladagahnooche. Iꞌdi tahe ichoowka maanta laka chirri icho buuggassi ayyinti raagane Waakh gooche soomaan a iꞌdoo malassicho dafar lakoogooge. Dafarta uliba a jirta. Iꞌdi tahe maanti etoo ichoow Kiriisto ba wohoo kalday yitaaheen kalday on dafar lakayegcha.

¹⁵Ichoowka maalinka laka chiꞌ buuggassi Muusa chiire lasoomo, uurassicho a iꞌdoo dafartaas lakoogooge.

¹⁶Iꞌdaasenyi maambaaw etoo Kamur iurgiye dafartaas a lakayegcha.

¹⁷Toollaka Kamur a Rubey. Inti Rubeyti Kamur kijirto la enenyet a furanyahe.

¹⁸Inno tuumman la foolasseenki liiogoogin ka, a iꞌdoo inno ababnaanki Kamur kitaab goyaka bihinno. Geedda inno bihinno la a inno luurgiyicha, samacchaar usu iokkanaanna. Ababnaanka inno ababno la Rubeyti Kamure kayamiite, kakhayma weyti buuraata.