Read rendile 2 Koriinto 9 Bible Online

2 Koriinto 9 - rendile bible

2 Koriinto 9

¹Rumanka walah hila baaysihi ꞌdooꞌdi Waakh liiergo an atin isoochiiro liikaꞌdoono mele.

²Iꞌdi tahe saggi atin rumanka gargaar iꞌdoontaan a garda. Anna ꞌdooꞌdi boroofenhi Makedooniya ka bihin a atin kaguꞌdde, saggi atinhi boroofenhi Akhaaya kijirtaan baaysi ka guꞌhi kute itannabatteen cheeke. Uuriinkaas haaggan la buurche a kululaache ichoowka icho laka gargaar bihine ꞌdoonaan.

³Iꞌdaasenyi reera koo Kiriistee a atin isooerga, ꞌdee eylaji wihi aytaas miinsan ka an atin keeylajo uus wihi ilmarhaatteet eheynane, iꞌdi an ꞌdooꞌd iidah u, atin laka tannabattaan.

⁴Iꞌdi tahe chirri ꞌdooꞌdoo koo Kiriistee ili Makedooniya ka isooraahe atinhi itannaban atin sooeleele, jeenteti nah atin ikakhuufnuu atin ꞌdiiche nah laka lakhaanyo a nah khaatatta.

⁵Maantaka wihi an kamalde, reera koo Kiriisteenye hawwaasda orteenyo erga, ꞌdee baaysihiinki buurenye atin ayyisseen mujjummoossaane massissaan. Iꞌda ka baaysihi atin liihosso menye, wihi atin uuri haaggan ka soobihisseene yateehiin.

⁶Ayti an atin ikhabo talla. Eti ilmohoo rucchul taaꞌhicho, ullaka gurnaankoo rucchule ꞌhela. Eti ilmohi buure taaꞌhicho la ullaka gurnaanki buurenye ꞌhela.

⁷Ebba uus bolokh ka bihinne ommos liiholinne, ebba geeddi us uuriis ka gooche on a bahcho. A mehe Waakh eti uuri haaggan ka walah diibo iche ꞌdoona.

⁸Waakh la haaggiiski buure tuumman ka wihi atin ꞌdoontaan ꞌdirihicho laka atin siin a yabuuꞌde, ꞌdee walah tuumman ka ichoow kolal tuumman ka wihi atin ꞌdoontaan tuumman khabtaane, hili haaggan tuumman la buuhissaan.

⁹Iꞌdi liichiiruu, “Us siimohiis a taaꞌhiche, uuri haaggan ka miskiino siiche. Fissanoonkiis jirtuu a sooꞌhada.”[11]

¹⁰Waakkhi eti gos leh ilmohi lataaꞌhicho siicho, toro makaateti us yaham siicho, ilmo a atin siicha toro atin ikasookhaya, ꞌdee gurnaanki atin wihi fiffissan yeessaan kakhayma.

¹¹Waakh walah tuumman ka a atin kamurroocha ꞌdee kol tuumman uuri haaggan ka ꞌdooꞌdi addan gargaartaane, ꞌdee wihi atin soobaayisseene nah diibno ka ꞌdooꞌd Waakh kalaꞌd ilaaba.

¹²A mehe hila ꞌdooꞌd lagargaaro atin gessaan ꞌdooꞌdi Waakh gargaar kalday ma gargaaro, iꞌdaasenyi kalaꞌddi buurenye Waakh liilaabo laka a dela.

¹³Hila saggi atin rumanka Kiriisto iraahtaane tuse. Wori Haaggane atin kakhuufteen ka, wahanyeyyohi Waakh a raahteen. Toro la wihi atin khabtaan icho ichoow ꞌdooꞌdi addan a leegisanteen. Jeenteti waha dakkhan u ꞌdooꞌd Waakh a koolicha.

¹⁴Jeenteti haaggi Waakhe buurenye us tuum atin siichuu la, icho weyti atin imoonaan geeddi icho Waakh atin isoowahaan.

¹⁵Waakh kalaꞌd ilaabno jeenteti siintiisti buurenye inno af ka wihiche cheekin iubaaꞌdan u.