Read rendile Galaatiya 1 Bible Online

Galaatiya 1 - rendile bible

Galaatiya 1

¹Khadaaba eti atin isoochiiro, a ani Baawulohi ergaanee. Weel enenyete hila ergaano ikorche mele, ommos weel enenyete isooergate mele. Iꞌdaasenyi Yeesso Kiriisto ichoow Waakkhi Aabbaheenenye, Yeessó omoot kasookahche ka a liisooergate.

²Ani ichoow ꞌdooꞌdi Kiriisto rummeeste inta ka ileejiro tuumman a atin soobariitinne. ꞌDooꞌdi an khadaaba isoochiiro a ururre Kiriistoti boroofenhi Galaatiya kijirto.

³Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

⁴Yeesso Kiriisto ichoow wihi Waakkheenki Aabbaheene ꞌdoono a israahaan. Iꞌda ka jeenteti uskeeleen u a issoobahche yumuyye ꞌdee ꞌdarriti uskeele weyꞌda inno kariba.

⁵Waakh koolinno jirtuu tuummamba! Aamiin.

⁶Ani a atin kagirmeesda! Atin saggoh Waakkhi haag Kiriistoki buurenye inno imunneynan ka atin wahe dowwa on ikaguurteene, woroo addane haaggane atin laabche iraahteen?

⁷Rumanka Wori Haaggan koo addan ma jiro. Iꞌdaasenyi ꞌdooꞌdoo atin waraariya, toro Wori Haaggane Kiriisto miinsan baabulin ꞌdoona.

⁸Chirri nah ommos herti Waakhe serey kijirto kichekoo laka, Wori Haaggane goorat nah atin icheekne on menye, koo addan atin icheeko, Waakh ba etaas jirtuu tuumman fala!

⁹Iꞌdi goorat nah nidah u, toro toolla a adeehe, chirri etoo Wori Haaggane goorat atin khaatatteen on menye, woroo addan atin idowe, Waakh ba etaas jirtuu tuumman fala!

¹⁰An weeli enenyete kahamaadin ꞌdoona? Mele! An Waakhe kahamaadin ꞌdoona. Chaꞌan uliba enenyet kahamaadin ꞌdoono, an toolla bowꞌda Kiriisto mee.

¹¹ꞌDooꞌd Kiriistokaaw, Wora Haaggane an maantaas atin abche ki weeli enenyet kasoouummame mee.

¹²Wora et an kaꞌhele mele, ommos weeli enenyete iabche mele. Yeesso Kiriisto rubeytiissa kaꞌhele, usu isoobabbakkaahiche.

¹³Maanti an hugummeti Yaꞌhuud raahe, saggi an ijire a daagteen. An ururi Waakh sina omhiche toro baabiin ꞌdoone.

¹⁴An weyti hugumme aacchinyeteenyo isibahche, boorreeyki Yaꞌhuud ka, an rumanka oreye raahe.

¹⁵Iꞌdaasenyi, Waakh geeddi an idelan on isoobahsate, toro haaggiiski buure on ka iwahe, wihi us gooche,

¹⁶eti Weeliis yahe isoobabbakkaahiche. Iꞌdane yeele ꞌdee anna Wori Haaggane Yeesso miinsan, yaafohi Yaꞌhuud ieheynan icheeka. Maanti wahaas iyitaaheen, weeli enenyete wihi an yeelo worsade ma jirin.

¹⁷Toro la, an ergaanoti ilkerengeetti weene Yeerusaleem kijirto, orteey ergaano titah laka ma iiran. Iꞌdaasenyi chirraas on ili Araabo irde, yomboka ilkerengeetti weene Damaasko isoonokhde.

¹⁸Inkoo guꞌh seyyahe kutte, iche ilkerengeetti weene Yeerusaleem ikore, Beetero[1] aban ꞌdoonaa. Ibeen tomon ichoow chan iche leefiddiye.

¹⁹Ergaanoti addan koo an arge mele, Yaakoobohi Yeessohi Kamure walaaliise kaldaye on menye.

²⁰Waakh a idaagaa, yeeda an atin isoochiiro a rum!

²¹Saahka boroofenhi Siiriya ichoow boroofenhi Kiliikiya irde.

²²Maantaas la urur Kiriistoki boroofenhi Yaꞌhuudiya kijiro, et injire iarge mele.

²³Iꞌdaasenyi wihi kaldaye leessi icho daddaagaan a mehe ya, “Eti goorat sina inno omhicho, Wori Haaggane us goorat baabiin ꞌdoono, iche toolla cheeka.”

²⁴Icho la wihi ani ikayitah ka Waakh koolicheen.