Read rendile Efeesso 1 Bible Online

Efeesso 1 - rendile bible

Efeesso 1

¹Khadaaba eti atin isoochiiro a ani, Baawulohi saggi Waakh igoochuu, ergaano Yeesso Kiriistee. ꞌDooꞌdi an isoochiiro a ꞌdooꞌdi Waakhe ilkerengeetti Efeesso yaal. Atin ichoow Kiriisto a wohoo kaldaye, toro la a ꞌdooꞌdi lakakhuufo.

²Waakkhi Aabbaheene ichoow Yeesso Kiriistohi Kamure ba atin imaalaane nebey atin kakaalaan.

³Waakkheenki Aabba Yeesso Kiriistohi Kamureene koolinno. Waakh Kiriisto ka, goobi Waakh goyaka buuhi Rubeyti Munyee kayamiit tuumman a inno imaale.

⁴Iꞌda ka geeddi Waakh harra isoouumin, Waakh Kiriisto ka a inno soobahsate, ꞌdee ortiis ka ꞌdooꞌdi munyeenye wohoo rucchul laka liikacheekan nateeh. Waakh, jeenteti ꞌdooninti us inno ꞌdoono on u,

⁵orey on gooste, Yeesso Kiriisto ka, tuum nyaakhutiis inno kayeessa. Waha la a wihi us hamaadiis ichoow ꞌdoonintiis ka us gooche.

⁶Maantaka Waakh koolinno jeenteti haaggiiski buurenye us inno siiche u. Weeliiski us weyti ꞌdoono ka haagga iꞌdaanu a inno siiche.

⁷Inno ichoow Kiriisto a wohoo kaldaye, diiggiis ka a inno gatte inno soofure, toro la Waakh uskeeleen a inno ikakute. Wahaas ichoow haaggaas Waakhe buurenye inno imunneynane us inno tuste a israahaan.

⁸Haagga Waakh wohoo rucchul laka ma inno karimmanne, toro la khara ichoow abannaanki inno walah abanni a inno siiche.

⁹Waakh la maliiski goorat dagsane inno isoobabbakkaahiche. Waha a wihi hamaadiis ka, us Kiriisto ka gooche.

¹⁰Mala la a ki maanti ibeenneti labuuhicho titah layeelo, ꞌdee wihi lasoouume tuummane serey kijiro ichoow harra kijiro us matakkoo kalday iliche gesso, matakkaas la a Kiriisto.

¹¹Waakh Kiriisto ka a inno soobahsate. Waha la a wihi us maliis ka goorat gooste on. Toro la walah tuumman saggi icho isooyateehiine igoocha,

¹²ꞌdee weynaanti Waakh nahi Yaꞌhuudenye kolooraat Kiriisto kakhuufne koolo nah kaꞌhessa.

¹³Atinhi Yaꞌhuud ieheynan laka yeedi rummaat a daagteen, a Wori Haaggane atin ribo. Maanti atin Kiriisto rummeysatteen, sumatti Rubeyti Munyeenye atin liiayyiche iche ꞌhesseen.

¹⁴Rubeyta Munyee la a ayyinti Waakhe wihi inno muꞌdannahe tusso. Waha la a maanti Waakh innohi ꞌdooꞌdiisenye toro hoolahiise ribnaanki ꞌdaꞌddaboot inno ribo. Waakh koolinno jeenteti weynaantiis u.

¹⁵Jeentetaas u, ani uus an saggi atin Yeessohi Kamureene ikakhuufteen ichoow saggi atin ꞌdooꞌdi Waakh tuumman iꞌdoontaan daage,

¹⁶weysiheey ka a atin kasooꞌhela, toro la kol tuumman Waakh kalaꞌde ilaaba jeentetiin u.

¹⁷An a inonnokhda Aabbaheenki weynaan tuumman tiis tahe, Yeesso Kiriistohi Kamureene Waakkhiise daaha, ꞌdee Rubeyti Munyeenye atin kharaasso, eti Waakh yahe atin isoobabbakkaahisso a atin siicho, ꞌdee Waakh mujjum abattaan.

¹⁸Wihi addane an Waakh daaho, a malassiinki lafuro ꞌdee walah seyyah abattaan. Khajjeeli us atin iwahe abattaane, buurti kamurroonka noole atinhi ꞌdooꞌdi Waakhe atin muꞌdan abattaane,

¹⁹toro la miigtiisti wohoo liikeekkaanne innohi usu rummeysanne inno gargaarto, wihiche abattaan. Miigta ichoow ti

²⁰goorat Waakh Kiriisto omoot ka sookahche, toro us goobi Waakh ka anki dahantiisti miigeet koorromiche a too kalday.

²¹Intaas ka Kiriisto herti Waakh ichoow ginnayyo tuumman ichoow wihi anto khabo tuumman ichoow kamurre tuumman dakhta. Us magahenyeti enenyet liibahcho tuumman laka a kussayyahe, ti weyꞌda jirto ichoow ti jirtuu tuumman soojirto.

²²Waakh la Kiriisto antohi walah tuumman siiche, toro Kiriisto iꞌdi matakki walah tuumman u, urur Kiriisto siiche.

²³Urura la a iꞌdi sar Kiriisto. Usú sagag tuumman ka imaala, toro la sagag tuumman ka walah tuumman ka ibuuhicha.