Read rendile Efeesso 4 Bible Online

Efeesso 4 - rendile bible

Efeesso 4

¹Ani hili Kamure an haaggicho, iche toolla jeela ikajira. Maantaka a atin hawwaasdee, taba jiroti ꞌdooꞌdi Waakh wahe imasse jira.

²Taba kol tuumman isnuglaacha toro la ꞌdooꞌdi samacchaare ateeha. Garrahsada, toro la jeenteti atin isiꞌdoontaan u ꞌdooꞌdi addan akaahhollowina.

³ꞌDeerka hol dowa, nebeyti atin iskaleefiddiitaan ka wohoo kaldaye Rubeyti Waakh atin kayeesse khuccha.

⁴Rubeyti Waakh a too kalday one, toro la inno a sartoo kalday. Saggaas on u, maanti Waakh inno wahe khajjeeloo kaldaye inno iwahe.

⁵Kamur a koo kalday one, jiti inno Waakh kakhuufno la a koo kalday one, baattissiyoti inno labaattissiye la a too kalday on.

⁶Toro la Waakh a koo kalday one, a Aabbahi walah tuummane, walah tuumman dakhti, walah tuumman hil kahaagsati, walah tuumman goycho furti.

⁷Iꞌdaasenyi Kiriisto eteemba haaggi Waakhe buure a siiche, ulla saggi liigiso a gooche.

⁸Jeentetaase Yeedi Waakh iꞌda iyadeeh, “Maanti us serey ka inti saraat ikore, chiiytiis a booliye woye, toro la siimohi hahhaaggane ꞌdooꞌdiis siiche.”[1]

⁹Waha kamalda bal, yeeda maanta, “Sereye ikore,” essi mehe kaabanna? Waha mehe inno abchaan ya, us harra goyaka laka inti weyti ilaate isookhubte.

¹⁰Usuhi sookhubte, usuhaas on serey ikore, serey ka intaas weyti kutto ikore, serey tuumman ichoow harra tuumman buuhiche.

¹¹Usu ꞌdooꞌd gaasoo ergaano kayeele, gaasoo laka ꞌdooꞌdi Waákh íyeyyeedo kayeele, gaasoo laka ꞌdooꞌdi Wori Haaggan taaꞌhicho kayeele, gaasoo la ꞌdooꞌdi urur Kiriisto yaakhicho toro la Yeedi Waakh abcho kayeele.

¹²Waakh iꞌdane yeele, ꞌdooꞌdi Waakh hili icho Waakh ihilaan itannabicha, ꞌdee urur Kiriistoki sartiise miigowa.

¹³Waha la orey on isohtaane ichoowka inno tuumman kakhuufnaanki inno Waakh kakhuufno ka ichoow Weeli Waakhe inno abanni ka wohoo kalday nateehe, ꞌdooꞌdi iiꞌdowe nateehe ichoowka geeddi Kiriisto iiꞌdowe iiꞌdowna.

¹⁴ꞌDeerka inno iꞌdi nyaakhuti dowwa leekkeesti menye, iꞌdi koobanhoo rucchule chirri hafar urgiyo kolba ankoo liikhaato mee. Toro la inno ꞌdooꞌdi worassi beenaate icho enenyet abchaan ka enenyet ekkeesti mee.

¹⁵Inno kol dakkhan ꞌdoonin ka ayti rummaat on isicheekna ꞌdee jitat tuumman ka weynaanna, iꞌdi Kiriistohi matakki ꞌdooꞌdiise nateeh.

¹⁶Inno a iꞌdi miilassi addane sareet. Saggi miilassi sareet tuumman isliikadagche maanjeerre ikhucchissuu, Kiriisto laka usu ꞌdooꞌdiis wohoo kalday kayeela. Saggaas on u miilassi sareet kooba hiliis mujjume haaggicha, sartaas ꞌdoonin ka weynaatta miigowta.

¹⁷Maantaka, antohi Kamur isiiche ka an weyti waha katirriinsada, taba uus jiroti atin jirtaan iꞌdi ti ꞌdooꞌdi Waakh igaranne mali ilmarhaatteet kamassi eheynan.

¹⁸Malassicho mugꞌdi buuha, jiroti Waakh lakaꞌhelo a lakagooche. Jeenteti matahenyeticho miig itahuu, wahanyeyyohi Waakh ma gartaan.

¹⁹Icho chiꞌicho suujoon yeelaan laka kola leelakhaanyo mee. Wihi sarticho ꞌdoonto iꞌdaanu yeelaan. ꞌDamaam ka biꞌdiri noole kol dakkhan iamuumaan.

²⁰Iꞌdaasenyi saggi wor Kiriisto atin liiabche saggaas mee.

²¹Wihi an tissibo, maanti atin woriis daagteen, wihi atin laabche ichoow yeedi rummaate Yeesso miinsan a israahaan.

²²Wihi atin laabche, jiroti atin ꞌhor jirteene, fiddihiinki uskeel liimoono atin ekkeeste toro atin kheerooche ꞌdiicha.

²³Toro la a atin laabche, rubeyohiin ichoow malassiin husubnaassaan.

²⁴Wihi ꞌdaꞌddaboot, Waakh a atin soouume, ꞌdee ꞌdooꞌdoo huhhusube iꞌdiisenye rumanka fiffissane toro munyee tateehiin.

²⁵Maantaka ebba been a ꞌdiicho, eti addane Kiriisto rummeeste rum on a kaleeyyeedo, a mehe inno tuumman a miilassi sartoo kalday.

²⁶“Holi atin khabtaan ka uskeel agelina.”[2] Hol khabtaani orrah iiche dihin.

²⁷Toro la Seytaan jitoo us uskeel atin kalugꞌdo iiyeelina.

²⁸Eti goorat hatto kaassohti, hatto a ꞌdiicho, hil a haaggicho, wohoo khumman a yeelo ꞌdee eti intiis gaabantahe wihi us leegismo a khabo.

²⁹Yeedi ꞌdooꞌdi addan gaameero uus afiin leeimaatane, yeedassi ꞌdooꞌdi gargaar ꞌdoono gargaaro toro la uur miigoocho on kaayyeeda. Iꞌda ka la ꞌdooꞌdi atin daago buuhi Waakhe ꞌhela.

³⁰Rubeyti Munyeenye Waakh la akabolkhinna. Iꞌdi tahe Rubeyta Waakh a sumatti saggi atin ꞌdooꞌdi Waakh itahiine ichoowka ibeenki Waakh ribnaanki ꞌdaꞌddaboot atin ribo tusso.

³¹Taba iisibobbolkhina ommos iisinyannyaamina ommos iisihohhollowina ommos iiskaarriirina ommos iishamanna ommos suujoonkoo rucchul laka iisikhabina.

³²Haag on enenyet iyeela, toro la enenyet uur inugleesda. Saggi Waakh laka jeenteti atin ichoow Kiriisto wohoo kalday itahiin u uskeeliin atin ikakutuu, atin laka eti uskeeloo atin iyeele, uskeel ikakuta.