Read rendile Efeesso 6 Bible Online

Efeesso 6 - rendile bible

Efeesso 6

¹Nyaakhut, jeenteti Kamur u, taba wihi ꞌdooꞌdi atin dele atin idowo raaha. A mehe iꞌdaas a iꞌdi mujjume.

²Amuri Waakh mehe yadeeh ya, “Aabbahaah ichoow abartaah inkaanyit.” Amuraas a ki oraate Waakh wohoo kaayyiche.

³Wihi us ayyiche la a mehe ya, “ꞌDee wihi tuummane atin isoobaho a wihi haaggane, toro harrata ka warwaara.”[4]

⁴Ooyenye taba, atin laka nyaakhutiin akaahholloonna, nyaakhutiin saggi Kamur iꞌdoono isooweynaacha, waanicha fatali incheenka kootte icho jiraan abcha.

⁵Bowꞌdayyo, taba kamurretiinti harrata walah tuumman ka yeedicho raaha. Inkaanyit ka ichoow roorro ka wihi icho ꞌdoonaan tuumman yeela, uuri haaggan ka la yeela. Saggi atin Kiriisto ikihissaan on icho laka ihila.

⁶Yeedicho raaha. Waha la geeddi icho atin argaane atin icho kahamaadissaan kalday on mee, iꞌdaasenyi taba iꞌdi bowꞌdayyo Kiriistuu yeedicho raaha, wihi Waakh ꞌdoono tuum uurassiin ka yeela.

⁷Hili atin haaggissaan la, hamaad ka haaggicha, saggoo atin weeli enenyet ihissaan menye, saggoo atin Kamur ikahissaan iyeela.

⁸A mehe wihi atin garattaan, eti bowꞌdee ommos ki bowꞌda ieheynan eheetteey ka ba, Kamur enenyet tuumman wihi haaggane us yeelo ka kalaꞌd a guta.

⁹Toro la Kamurre taba atin laka saggaas on u bowꞌdayyohiin haag on iyeela. Iitiftoonna, a mehe saggi atin igarattaan u atin tuumman Kamuroo kaldaye goobi Waakh ka khabtaane, ulla gar badah ma gatti.

¹⁰Ayti ꞌdaꞌddaboot talla. Atin ichoow Kamur a wohoo kalday gone, taba miigtiisti weyti buure ka miigowa.

¹¹Gaaddi diho Waakh atin siiche tuumman gessada, ꞌdee ekkeysihi Seytaan ka mujjum tolola.

¹²Iꞌdi tahe dihoti inno kajirro, ti weeli enenyet isladiho mee. Inno karnatohi ginnayyohi anto leh ichoow wahanyeyyohi harratane sussuuje iche isdihna, toro la ginnayyohi meessi saraat dakhti iche isdihna.

¹³Maantaka gaaddi diho Waakh atin siiche tuumman gessada, ꞌdee maanti suujoon atin isoobaho ka jeyin tudduba. Toro la inkoo atin wahanyeyyoha yeesseen mujjum jeyin a tabuuꞌdiin.

¹⁴ꞌDeerka mujjum tolossada. Runti Waakh iꞌdi saab u dabar kahiida, wihi fissane atin kol dakkhan yeessaan la iꞌdi gaaddi kach atin jeyissuu gessada.

¹⁵Toro la mujjum tolossada, Wori Haaggane nebey lakeelo a iꞌdi kobohi atin gessatteene, diho itannabatteen.

¹⁶Wihi addan la, kakhuufnaanki atin Waakh kakhuuftaan gaacchaankiin kayeelda. Gaacchaanka lahawti ꞌdab khabto Seytaanki uskeel leh atin kasoogangano atin kajeycha.

¹⁷Ribnaanki Waakh atin ribe la iꞌdi koofiyati gaꞌdaare matah walah atin kajeyissuu ichoow Yeedi Waakhe iꞌdi birlabi Rubeyti Munyee u khaata.

¹⁸Taba kol tuumman saggi Rubeyti Munyee atin iwoytuu weysi ichoow daahti fil tuummane ka Waakh wahda. Iꞌda yeessaani toorribda, toro kol dakkhan garrahsada ꞌdooꞌdi Waakh tuumman Waakh iwaha.

¹⁹Ani laka Waakh isoowaha, ꞌdee chaꞌan yeyyeedo, Waakh wihi an adeeh a isiicho, ꞌdee roorro laan enenyet wihi dagsane Wori Haaggan miinsan a icheeko.

²⁰Jeenteti Wora Haaggan u, anihi meel Kiriisto kijiro jeela kijira. Waakh wahda, ꞌdee wora roorro laan saggi imale a icheeko.

²¹Tuuchikohi koo Kiriisteenye an weyti ꞌdoono, toro hili Kamur ka falfeenye lakakhuufo, woreey tuumman a atin isoocheeka, ꞌdee saggi an ijiro ichoow wihi an yeelo abattaan.

²²Jeentetaase usu atin ikasooerga, ꞌdee saggi nah ijirro abattaane toro la uur atin miigoocha.

²³Waakkhi Aabbaheene ichoow Yeesso Kiriistohi Kamure ba ꞌdooꞌdi Kiriisto rummeeste nebey kakaalaan. Toro icho ba ꞌdooninti atin isꞌdoontaan ichoow kakhuufnaanki atin Waakh kakhuuftaan atin siichaan.

²⁴Waakh ba ꞌdooꞌdi tuummane Yeesso Kiriistohi Kamureene ꞌdooninti imassan ka ꞌdoono imaala.