Read rendile Fiiliffi 1 Bible Online

Fiiliffi 1 - rendile bible

Fiiliffi 1

¹Khadaaba eti atin isoochiiro a ani Baawulo. Timooti laka a iskhabna. Nah la a falfa Yeesso Kiriisto. ꞌDooꞌdi an khadaaba isoochiiro a ꞌdooꞌdi Waakhe ilkerengeetti Fiiliffi yaalle icho ichoow Yeesso Kiriisto ba wohoo kalday yahiin, ichoow ꞌdooꞌdi urur Kiriisto yaakhicho ichoow ꞌdooꞌdi urur Kiriisto gargaaro.

²Waakkhi Aabbaheene ichoow Yeesso Kiriistohi Kamureene ba atin imaalaane nebey atin kakaalaan.

³Kol tuumman chirri an atin kasooꞌhelo, Waakkheey kalaꞌde ilaaba.

⁴Kol tuumman chirri an atin tuumman Waakh atin isoowaho, hamaade kaweesda.

⁵A mehe atin uus maanti kolooraate atin Wora Haaggane Kiriisto miinsan daagteen ichoow uliba a iwalhisseene woraas ileecheekteen.

⁶Wihi an tissibo a waha, Waakkhi hila haaggan goytiin ka sooumhe, orey on iwoya ichoowka ibeenki Yeesso Kiriisto soonokhti ka hila haaggan massicha.

⁷Ani uure atin kakhaba gone, a mujjum chirri an iꞌdaasu atin tuumman atin kamaldi. A mehe chaꞌan hidanahe ommos kootiin ka saggi Wori Haaggan rum iyahe ꞌdooꞌd icheeko, atin tuumman hila haaggi Waakhe buure a ileegisantaan.

⁸Waakh saggi an ꞌdooninti Yeesso Kiriisto enenyet ꞌdoono ka uureey ka atin ikamoono garteey a laaba.

⁹An Waakhe atin isoowaha, ꞌdee ꞌdooninti atin isꞌdoontaan ichoow ꞌdooninti atin Waakh ꞌdoontaan buuraatta. Geedda iche buuraatti, mujjume Waakh abattaane, toro la haag ichoow suujoon seley bihin tabuuꞌdiin.

¹⁰Waakhe atin isoowaha, ꞌdee wihi weyti haaggan soobahsan tabuuꞌdiine, toro la uus toolla kakhabatti ichoowka maanti Kiriisto soonokhti, Kiriisto atinhi eloo rucchul laka laaye toro la enenyet wohoo atin ikacheekan atin ꞌhela.

¹¹Iꞌda ka Yeesso Kiriisto ka gurnaanki fiffissane jirotiin goya buuhicha. Waha la Waakh weynaan ichoow koolo ikeenaan.

¹²ꞌDooꞌd Kiriistokaaw, wihi an atinhi abattaan ꞌdoono, wihi ani liiyeele ka, rumanka Wori Haaggan a taaꞌhe.

¹³Jeentetuu iskarti minki buurenye karnat toorribto tuumman ichoow ꞌdooꞌdi addan saggi an jeenteti an Kiriisto iraaho on u liihide, a garta.

¹⁴Toro la jeenteti an jeela ikajiruu, ꞌdooꞌdi Kiriisto rummeeste buurtiis Kamur ka uur a lamiigooche, ꞌdee roorro laan Yeedi Waakh cheekaan.

¹⁵Rumanka gaasichokoo jeenteti kalꞌdarri ichoow jaakhe wor Kiriisto enenyet icheekaane, iꞌdaasenyi gaasoo jeenteti uuri haaggane wor Kiriisto icheekaan.

¹⁶Kan uur haaggan, ꞌdoonine woraas kacheeka. A mehe saggi Waakh ani hila dahan igesse ꞌdee us saggi Wori Haaggan rum iyahe ꞌdooꞌd ituso, iche gartaan.

¹⁷ꞌDooꞌdi oraat, wor Kiriisto uuri fissan ka ma cheeko wihi awtichooda on yowtaane, ꞌdee geedda an jeela kijiro sina ibuuraachaan.

¹⁸Iꞌdaasenyi wahaas walah icho ileeyahiin mele! Wihi khumman, jitat tuumman ka, uuri suuje ommos uuri haaggan eheetteey ka ba, a wor Kiriistoki lacheeko. Anna jeentetaase weyti ihamaada. Rumanka la toro oreye isohda weyti hamaada.

¹⁹Iꞌdi tahe wihi an gardi, weysihiin ichoow gargaari Rubey Yeesso Kiriisto isiisso ka, a liisoofura.

²⁰Wihi an weyti sugo toro la an khajjeelo intoo rucchul ka laka lakhaanyo ma isikeeno, iꞌdaasenyi toolla ichoow kol tuumman roorro laane sarteey ka Kiriisto weynaacha, jiroteey ommos omootteey eheetteey ka ba.

²¹A mehe ani ka, wihi an ijiro, a Kiriisto. Omootteey la indigirti buurenye ani ikhabta.

²²Toolla chaꞌan harrata ka jiro an hili gurnaan delo haaggicha. Iꞌdaasenyi mehe goocho? An ma gardi.

²³Sag lamma liijiita. Anihi irdi Kiriisto leejiro imoona. Iꞌdi tahe taase weyti deefta.

²⁴Iꞌdaasenyi iroonotiin u, weyti khummantahe chaꞌan jiro.

²⁵An wahaase tissiba gone, wihi an gardi, an ma amuute, atin tuumman a atin leefiddiya ꞌdee hamaadiin ichoow kakhuufnaanki atin Waakh kakhuuftaan kakhayma.

²⁶Iꞌda ka fiddihi an atin leefiddiyo ka, jeenteteey u wihi atin Yeesso Kiriisto ka keeylajjaan weyti kakhaymaan.

²⁷Walahbaaw soobaho ka, jiroti ꞌdooꞌdi Wori Haaggane Kiriisto imale jira, ꞌdee chirra an amiite an atin argo, ommos an iimaatane woriin kalday daago, saggi atin uuroo kalday ka mujjum itolossaan a abdi. Toro la saggi atin maloo kalday ikhabtaane, atin tuumman kakhuufnaanki atin Waakh kakhuuftaane Wori Haaggan keeno hol ikadowtaan a abdi.

²⁸Wahaas tuumman ka ꞌdooꞌdi atin tirrimo ma karoortaan. Waha a sumatti saggi Waakh icho ibaabiicho, iꞌdaasenyi atin iribo tusso. Ki waha tuumman yeelo a Waakh.

²⁹Ulla jeente Kiriistuu, rummeysanaanki atin usu rummeysattaan kalday menye, sinati atin taham laka a atin siiche.

³⁰A mehe holi goorat an kijire atin agarteen,[1] a ki atin laka kijirtaan. Toro la saggi an toolla laka holaas ikijiro a daagteen.