Read rendile Fiiliffi 3 Bible Online

Fiiliffi 3 - rendile bible

Fiiliffi 3

¹ꞌDooꞌd Kiriistokaaw, wihi ꞌdaꞌddaboot, atin ichoow Kamur ba a wohoo kalday gone, taba weyti hamaada. Wihi goorat an atin icheeke iche toro atin isoochiira, iꞌdaasenyi ma ikurmichaane toro la a atin toorribaan.

²Taba, ꞌdooꞌdaas uskeel lehe, iꞌdi kararre u sussuujenye, khandihi uskul enenyet ihosso yuubsada.

³A mehe innohi Rubeyti Waakh ka weysanni, wihi Yeesso Kiriisto inno iyeele keeylajno toro wihi enenyet sartiis ka yeelo ikakhuufin, iche khandihi rummaate.

⁴Eheet a, ani rubeyteey wihi an sarteey ka yeelo keeylajin a abuuꞌd. Chirri etoo wihi us sartiis ka yeelo wihi us keeylajo koogyahe, an weyti kuta.

⁵Inkoo an delde, an ibeen siyyeet barye, iche liikhandiye. ꞌDooꞌdi idele a Issiraayele, yaaf Beenjameene kayimiy. Hiiyyeey tuumman la Ibiraaniya kasoouummame. An rabitti Farissaayo weyti amurreti Yaꞌhuud raahto kijire.

⁶Toro jeenteti an weyti Waakh ikafalin iꞌdoone, urur Kiriisto sina omhiche. Chirri amurreti laraaho enenyet eti Waakh ortiis ka fissan kayeesso ani wohoo rucchul laka ma liikacheekti.

⁷Iꞌdaasenyi wihi tuummane an kol icho indigir ikhabaan koogeet, an kola iroono Kiriistuu, khasaara iekkaacha.

⁸Wihi wahaas kuto, chaꞌan walah tuumman ichoow indigirti buurenye an Yeesso Kiriistohi Kamureeye an abdi isiyeyo, walah tuumman kola jeente Kiriistuu tuum khasaara iekkaacha. Icho uꞌdu iekkaacha ꞌdee Kiriisto ꞌhela,

⁹ani ichoow Yeesso Kiriisto ba wohoo kalday nateeh. Waakh ani eti ortiis ka fissane iekkaacha, waha la jeenteti an amurre iraaho menye, a jeenteti an Kiriisto ikakhuufo.

¹⁰Wihi an ꞌdoono kallaayo, a Kiriistohi an abdi, ichoow miigti usu omoot kasookahisse jiroteey miigoosso, toro la sinati usu lakawaariche usu leegismo toro iꞌdiis u amuut.

¹¹ꞌDeerka iꞌdoo ka an ꞌdooꞌdi omoot lakasookahcho goya kijira.

¹²An laka uliba wahanyeyyohaas an eldi iꞌdi goorat Waakh ikaꞌdoonuu tuum a itah ma eldi. Iꞌdaasenyi Yeesso Kiriisto ikhuccha. An kol tuumman hole dowa, wahaas Yeesso Kiriisto ꞌhor ikhabte ani laka khabda.

¹³ꞌDooꞌd Kiriistokaaw, wihi an kase a mehe ya, annaka alah wahaas uliba ma ꞌhelin. Iꞌdaasenyi an wohoo kaldach on yeela. Wihi kute a kadaba, toro la wihi orteey jiro weyti hol idowa.

¹⁴Maantaka, inti an kamassicho hol idowa, ꞌdee siinti Waakh Yeesso Kiriisto ka goobi Waakh ka iwahe ꞌhela.

¹⁵Innohi tuummane wahanyeyyohi Waakh ka iiꞌdowne, malaas khabno giꞌde. Iꞌdaasenyi, chirri gaasiinkoo maloo addane yeere khabo, Waakh wahaas a atin isoobabbakkaahicha.

¹⁶Wihi weyti khumman kallaayo, orey on isohanni, yeedi rummaate inno orey abanne, uliba laka a raahno giꞌde.

¹⁷ꞌDooꞌd Kiriistokaaw taba dabateey raaha. ꞌDooꞌdi jiroti icho jiraan ka dabateey raaho fiiricha.

¹⁸A mehe iꞌdi an orey kolassi ittaawe atin isoocheekuu, toolla toro oytim ka a atin isoocheekaa, ꞌdooꞌdi ittaawe jiroti icho jiraan ka a chiiyti massalaaba ichoow omoot Kiriisto.

¹⁹Waakh ꞌdooꞌda berri a baabiicha. Iꞌdi tahe waakkhicho a uurichooda. Wihi lakhaanyo ikeeno keeylajaane, toro la mali icho khabaan, a ki wahanyeyyohi harrata on.

²⁰Iꞌdaasenyi inno a ꞌdooꞌdi goobi Waakh. Toro la weyti ꞌDoorribehoo sugna, ulla a Yeesso Kiriistohi Kamureenenye goobaas kayamiit.

²¹Ulla miigtiisti us walah tuumman isikeeno anan yabuuꞌd ka, sarteenta ꞌdarane tamuut a urgiyicha, iꞌdi sartiisti weyti haaggan kayeela.