Read rendile Fiiliffi 4 Bible Online

Fiiliffi 4 - rendile bible

Fiiliffi 4

¹Maantaka ꞌdooꞌd Kiriistokaaw, aalasseeyki an weyti ꞌdoono, atinhi an weyti atin ꞌdoono toro imoono, atinhi ikahamaadissaane toro la kalaꞌddi hileeye, wihi tuummane an atin isoocheeke ka, taba jiroti atin Kamur ijirtaan ka mujjum tolossada.

²Ewoodiya ichoow Siintik, atinhi atin ichoow Kamur wohoo kalday tahiin, a atin hawwaasda taba isdaaga.

³Atihi wahalheeyenye lakaakhuufo, deyyehota weyti hol ileedowte, Wori Haaggan ileecheekte a kidaahe gargaar. Toro la Kileement ichoow ꞌdooꞌdi addane tuummane Wori Haaggan ileecheeke, magahenyeticho buuggi ꞌdooꞌdi jiroti jirtuu imassan ꞌhelo lakachiire laka gargaar.

⁴Taba giꞌde, jeenteti atin ichoow Kamur ba wohoo kalday itahiin u, weyti hamaada. Toro la a adeehe, hamaada.

⁵Enenyet tuumman saggi atin ꞌdooꞌdi samacchaare itahiin a abti. Kamur la dowwanoha ka a yamiite oganaawa.

⁶Wohoo rucchul ka laka awaꞌdwaaꞌdina. Weysi ka ichoow hawwaassihi atin Waakh hawwaassattaan ichoow kalaꞌddi atin laabtaan ka, Waakh walah dakkhan daaha.

⁷Waakh la nebeytiiisti mali weeli enenyet tuumman kutto a atin kakaala. Atin ichoow Yeesso Kiriisto a wohoo kalday gone, nebeyta la uurassiin ichoow malassiin a toorribta.

⁸ꞌDooꞌd Kiriistokaaw, wihi ꞌdaꞌddaboote an atin iadeeh, taba wihi rummaate toro la enenyet inkaanyito ichoow wihi fissan ichoow wihi miꞌdabe ichoow wihi enenyet ꞌdoono ichoow wihi haag khabo ichoow wihi weyti deefo ichoow wihi lasaaꞌdo kamalda.

⁹Taba wihi an atin abche, atin la ikakhaatatteen ichoow wihi an atin icheeke ichoow wihi an yeele atin agarteen mujjum raaha. Waakkhi nebey leh la a atin leejira.

¹⁰Ani la jeenteti atin uuri goorat atin ikakhabteen toolla toro isookhabatteen u weyti Kamur ka hamaada. Rumanka atin kol dakkhan uur a ikakhabteene, iꞌdaasenyi jiti atin uuraas atin ikhabtaan itussaan a waayteen.

¹¹Anna jeenteti wohoo ikaankhanyahiin mee sagga ikaayyeedo. A mehe jiroteey ka, walahbaaw isoobaho ka, saggi liikadargo a abde.

¹²Walahwaayyo wihiche a garda, kamurroon laka wihiis a garda. Walahbaaw isoobaho ka, uuri buuho ommos uuri marah eheetteey ka ba wihi buure khabin ommos wihi rucchul khabin eheetteey ka ba, saggi liikadargo a abde.

¹³Kiriistohi miig isiicho ka, a geeddi an walah tuumman yeelo.

¹⁴Iꞌdaasenyi, atin weyti haaggisseen maanti atin sinati an kajire ka igargaarteen.

¹⁵Atinha ꞌdooꞌd Kiriistoki ilkerengeetti Fiiliffee a garattaanee, ibeenneti kolooraate atin Wori Haaggan daagteen, maanti an boroofenhi Makedooniya kakahe, atin kaldaye ururre Kiriisto tuumman goyaka chilimme ileegisanteen.

¹⁶Maanti an ilkerengeetti ꞌDessaloonika jire laka, kolassi ittaawenye gargaar isooeregteen.

¹⁷An siinti chilimme mee atin kayowdi, wihi buurenye Waakh berri atin ikakhayo yowda.

¹⁸A mehe wihi atin isooeregteen tuumman a ꞌhele. Geeddi an jiroteey ka ꞌdoono laka ꞌdirihicheeda ꞌhele. Toolla Ebaabara siimohi atin ani isooeregteen tuumman ikeene la, wihi an ꞌdoono tuumman a khaba. Waha a iꞌdi soorriyoti uyuugenye Waakh liibahcho, toro Waakh kahamaado.

¹⁹Waakkheey la kamurroonki weene Yeesso Kiriisto lakaꞌhelo ka, wihi buurenye atin jirotiin ka ꞌdoontaan tuumman a atin siicha.

²⁰Waakkheenki Aabbaheene jirtuu tuummamba a lakoolicho. Aamiin.

²¹ꞌDooꞌdi Waakhe icho ichoow Yeesso Kiriisto wohoo kalday yahiin tuumman bariitoteey eleelicha. ꞌDooꞌdi Kiriisto rummeeste inta ka ileejiro laka a atin soobariitiche.

²²ꞌDooꞌdi Waakhe inta kajiro tuumman a atin soobariitiche. Kach ka la ꞌdooꞌdi min Kaaysar hil kahaaggicho a atin soobariitiche.

²³Yeesso Kiriistohi Kamure ba rubeyohiin imaala.