Read rendile Kolossaay 4 Bible Online

Kolossaay 4 - rendile bible

Kolossaay 4

¹Atinhi kamurree laka saggi atin goobi Waakh ka Kamuroo ikhabtaan a garattaan gone, taba giꞌde ilbooyyetiin saggi mujjume iwoywoya, toro geeddi mujjume guta.

²Taba, weysi ka orey isohda, geeddaas tuumman isyaakhicha, Waakh la kalaꞌd ilaaba.

³Geeddaas la toro Waakh nah isoowaha, ꞌdee Waakh aritti nah wori Waakh kacheekno a nah ifaho. Wora la a wori goorat dagsane Kiriisto miinsan. Anna jeenteti worane jeela ikajira.

⁴Waakh isoowaha, ꞌdee wora saggi imasse ꞌdooꞌd a ibabbakkaahicho.

⁵Taba ꞌdooꞌdi urur Kiriisto goya ikajirin jiti khara kaleefiddiya. Ibeenki Waakh atin siicho dakkhan mujjum khaadda, ꞌdooꞌdaas gargaara ꞌdee Kiriisto a kakhuufeen.

⁶Kol dakkhan harrabi haaggane, enenyet nabah isudin ꞌdoono khaba, ꞌdee ebba wihi atin ilaabtaan garda.

⁷Tuuchiko woreey tuumman a atin siicha. Us a eteenki koo Kiriisteenye inno weyti ꞌdoonno, hili Kamur ka lakakhuufo toro la a ilbooyi wahalheenyee.

⁸An usu a atin isooerga ꞌdee saggi nah tuumman ijirro abattaane, toro la uur laka atin miigoocha.

⁹Usu ichoow Oneesmo a issooraahaan. Oneesmo la a eteenki lakakhuufo, koo Kiriisteenye inno weyti ꞌdoonno toro la a kiinkoo. Lammacho ba wihi inta ka jiro tuumman a atin isoocheekaan.

¹⁰Aristaarkohi jeela ikaleejiro laka a atin soobariitiche. Markohi Barnaba abaayyahiis yahe laka a atin soobariitiche. Amuri usu miinsan a ꞌhesseene, chiꞌ Marko atin iyimiy, mujjum martiisda.

¹¹Yeessohi magahiiskoo Yaasto layadeeh laka a atin soobariitiche. ꞌDooꞌdi hili dakhi Waakh miinsan ileehaaggicho goyaka, ꞌdooꞌdi Yaꞌhuude Kiriisto rummeeste a reera seyyahtiissa on. Icho la weyti uur imiigoocheen.

¹²Ebaabarahi kiinenye, falfa Yeesso Kiriistee, a atin soobariitiche. Us kol tuumman geeddi us yabuuꞌde hol dowa Waakh atin isoowaha, ꞌdee mujjum tolossaane, iiꞌdowtaane, ꞌdee wihi tuummane Waakh atin kaꞌdoono rumanka abattaan.

¹³Ani rubeyteey saggi us atin ichoow urur Kiriistoki ilkerengeetohi Lawodeechiya ichoow Haayeraboli yaal hol atin ikadowo rumanka gartiis a laaba.

¹⁴Luukahi ilkitarreenye weyti aaleene ichoow Deema laka a atin soobariiticheen.

¹⁵ꞌDooꞌdi Kiriisto rummeeste ilkerengeetti Lawodeechiya yaal bariitoteey eleelicha. Niimifa ichoow urur Kiriistoki minkiche ka isꞌhelo, bariitoteey eleelicha.

¹⁶Chirri khadaaba atin liisoosoome lamassiche, urur Kiriistoki ilkerengeetti Lawodeechiya laka ikuccha, a liisoomo. Atin la khadaabi an icho ierge, a atin liisoosoomo.

¹⁷Arkiiba la wihi atin itadeehiin, “Tabe hili Kamur dahantaah soogesse, rumanka massi.”

¹⁸Bariitota la, ani Baawulo rubeytaaya dahanteey ka chiira. Saggi an ihidanahe adabina, isooweesda. Waakh ba atin imaala.