Read rendile 1 'Dessaloonika 5 Bible Online

1 'Dessaloonika 5 - rendile bible

1 'Dessaloonika 5

¹ꞌDooꞌd Kiriistokaaw, maan ichoow chirri Kamur soonokhti woriis atin laatahiin mele. Maantaka walah nah atin isoochiirro mele.

²Iꞌdi tahe atin rubeytiin tuum saggi Kamur sahaꞌddi liikamurin iyamiit a garattaan, iꞌdi eti walah ibeen hatuu.

³Geeddi ꞌdooꞌdi Kiriisto ikakhuufin, “Nebey on jirta, walah nah uloonni mele,” essi, chirraase doglaan sinati buure isoobahta, iꞌdi bolokkhi makhaabassi chiise u. Ma bahsataan la.

⁴Iꞌdaasenyi ꞌdooꞌd Kiriistokaaw, atin mugꞌdi goya ma kijirtaan, uus ꞌdee ibeenka iꞌdi eti walah hatuu doglaan atin soogelinee.

⁵Atin tuumman a ꞌdooꞌdi banay goya kijiro, fiddihiin la a ki ꞌdooꞌdi maalim chirri walah tuumman laargo walah yeelo. Atin ꞌdooꞌdi mugꞌdi ichoow ibeen goya kijiro mee.

⁶ꞌDeerka uus inno iꞌdi ꞌdooꞌdi addane urꞌdo itaahan. Iꞌdaasenyi taba a neybaanni toro la a isjeyinno.

⁷A mehe ꞌdooꞌdi urꞌdo ibeene urꞌda, ꞌdooꞌdi meleefu yateeh la, ibeene meleefu yateeh.

⁸Iꞌdaasenyi inno a ꞌdooꞌdi banay goya kijiro gone, isjeyinno giꞌde. Saggi eti iskareete birtiis gessate kacchiis jeychuu, inno laka kakhuufnaanki inno Kiriisto kakhuufno ichoow ꞌdooninti inno khabno gaacchaankeen a yitaaheen. Toro la khajjeeli saggi Waakh inno iribo kuubno, iꞌdi koofiyati eti iskareet matah jeyisso a inno iyitaahe.[4]

⁹Iꞌdi tahe Waakh holiiski us inno tusti menye, a inno soobahsate ꞌdee Yeesso Kiriistohi Kamureene ka inno riba.

¹⁰Yeesso a inno iyumuyye ꞌdee jirreey ommos tuunneey ka ba, usu a leejirro.

¹¹Toollaka uur ismiigoocha, toro isgargaara iꞌdi toolla atin yeessaan u.

¹²ꞌDooꞌd Kiriistokaaw, a atin daahnee, taba ꞌdooꞌdi Kamur ka goytiin ka hol dowo atin itoollo atin waanicho inkaanyita.

¹³Jeenteti hili icho atin ihaaggichaan u weyti inkaanyita, toro la ꞌdoona. Taba nebey iskaleefiddiya.

¹⁴ꞌDooꞌd Kiriistokaaw, a atin hawwaassanne, ꞌdooꞌdi ollommee tootoocha. Ki roorro khabo uur miigoocha. Ki isuubaaꞌdan gargaara. ꞌDooꞌd tuumman la igarrahsada.

¹⁵Taba uus etoo kalday laka eti suujoon iyeele suujoon tusan. Iꞌdaasenyi kol tuumman hol dowa, wihi haaggan isiyeela ꞌdooꞌdi addan laka haag iyeela.

¹⁶Kol dakkhan hamaada.

¹⁷Kol dakkhan weesda.

¹⁸Walahbaaw atin isoobahe ka, Waakh kalaꞌd ilaaba. Iꞌdi tahe waha a wihi Waakh atinhi atin ichoow Yeesso Kiriisto wohoo kalday tahiin atin iꞌdoono.

¹⁹ꞌDabi Rubeyti Munyee goytiin ka a jitinna.

²⁰Wori ꞌdooꞌdi Waákh íyeyyeedo atin icheeko aꞌdarraawina.

²¹Worar tuumman kaja, wori haaggan la khuccha.

²²Suujoonki fil tuummane la kasoonokhda.

²³Toollaka Waakkhi nebey leh ba tuum atin munyaacha. Waakh ba rubeyohiin ichoow uurassiin ichoow sartiin ba tuum el tuumman kasoohossa, ichoowka ibeenki Yeesso Kiriistohi Kamureene soonokhti yateeh.

²⁴Waakkhi atin waho a lakakhuufa gone, waha a yeela.

²⁵ꞌDooꞌd Kiriistokaaw, nah laka Waakh nah isoowaha.

²⁶Taba ꞌdooꞌdi Kiriisto rummeeste tuumman ꞌdoonin Kiriisto kabariiticha.

²⁷Magahi Kamur ka amure atin ibahchaa, khadaaba ꞌdooꞌdi Kiriisto rummeeste tuumman a liisoomo.

²⁸Yeesso Kiriistohi Kamureene ba atin imaala.