Read rendile 1 Timooti 3 Bible Online

1 Timooti 3 - rendile bible

1 Timooti 3

¹Chiꞌ etoo weyti urur Kiriisto yaakhin ꞌdoono, eta hili khummane ꞌdoona. Yeeda iꞌda yadeeh a lakakhuufa.

²Wihi Waakh gooche, eti urur Kiriisto yaakhicho a eti eloo rucchul laka liikacheekanne, makhaabassoo kalday on khabo, wihi us yeelo tuumman ka isjeycho, inkaanyit khabo, goobiis ka ꞌdooꞌd martiisti, ꞌdooꞌd Kiriisto walah abin yabuuꞌd.

³Toro la eti meleefee mee, eti enenyet jaho menye, iꞌdaasenyi a eti samacchaare. Eti jaakh leh mee, eti chilim ꞌdoono mee.

⁴Toro la a eti goobiis mujjum dakhti, nyaakhutiis inkaanyit ka yeediis daago.

⁵Iꞌdi tahe eti goobiis dakh igaran, saggoh urur Kiriisto idakhta?

⁶Toro la eti inkoo dow Yeesso rummeeste mee. Jeenteti dowwa on liisoobahchuu a geeddi us weyti serey isgeecho, iꞌdi Seytaan u lahukkumo.

⁷Toro la a eti ꞌdooꞌdi kharaate Yeesso irummeysan ka laka magahi haaggan khabo. Uus ꞌdee lakhaanyo keenine, angeyi Seytaan geline.

⁸Iꞌdaas on u toro wihi Waakh gooche, ꞌdooꞌdi urur Kiriisto gargaaro laka a ꞌdooꞌdi liinkaanyito, ki iskaayyeelo mee, ki farsoti sabiib khaatto mee, ki anki chilim ka ꞌdamaame mee.

⁹Rubeyti suujoon inno ikacheekan ka, a ꞌdooꞌdi wori dagsane rummaate Kiriisto miinsane Waakh enenyet isoobabbakkaahiche kakhuufo.

¹⁰Toro la koloo jiroti icho Kiriisto goyaka jiraan a lafiiricho. Chirri wohoo rucchul laka liikacheekan ꞌdeerka hili ꞌdooꞌd lagargaaro a geleen.

¹¹Saggaas on u deyyehoticho laka a deyyehoti liinkaanyito, enenyet imeꞌdeꞌddeeline, iꞌdaasenyi walah tuumman ka isjeyisso, walah tuumman ka lakakhuufo.

¹²Toro la eti urur Kiriisto gargaaro a eti arantoo kalday on khabo, nyaakhutiis ichoow goobiis ba saggi mujjume idakhti.

¹³Iꞌdi tahe ꞌdooꞌdi hili urur Kiriisto lagargaaro mujjum kajiro kalaꞌddi laguto a inkaanyite, toro la wori Yeesso Kiriisto lakakhuufo miinsan roorro laan cheekin a yabuuꞌdiin.

¹⁴Chaꞌan dowwanoha ka kisooꞌdaarin khajjeelo laka, wahanyeyyohane kisoochiira.

¹⁵Iꞌdaasenyi chiꞌ wohoo imalmalicheen laka, khadaaba a kisoochiira, ꞌdee jiroti innohi ururi Waakhe incheenka jirro abatta. Urura Waakh a ki Waakkhi jirtuu tuumman jiro, a tirrim ichoow daddaabohi ilaate runti Waakh tiiro.

¹⁶Rumanka runti dagsaneete Waakh miinsane Waakh inno isoobabbakkaahiche a weentahe. Kiriisto harrata saggi weeli enenyete iyimiyye, Rubeyti Munyee la saggi us ifissanyahe enenyet tusse. Herti Waakh usu a agarte. Woriis yaafohi Yaꞌhuud ieheynan goyaka lacheeke, ꞌdooꞌdi ittaawenye harra usu rummeeste, goobi Waakh liikorche.