Read rendile 1 Timooti 4 Bible Online

1 Timooti 4 - rendile bible

1 Timooti 4

¹Rubeyti Munyee saggi ibeenneta ꞌdaꞌddaboot ka ꞌdooꞌd gaasoo Kiriistohi us kakhuufo ikatabo a cheekta. Toro ꞌdooꞌdi rubeyohoo woyaane enenyet ekkeesti iche yeedicho raahaane toro la wihi ginnayyo enenyet abchaan laka raahaan.

²Worassi iꞌdee inti icho kayamiitiin a ꞌdooꞌdi iskaayyeelo beeno leh. Rubeyohichoki haag ichoow suujoon seley saaho a iꞌdoo gaꞌdaari kuleele ka lakobdaaddinooche.

³ꞌDooꞌda mindischo enenyet tirta. Toro la gololleti Waakh on sooumhe ꞌdooꞌdi Kiriisto rummeeste rum abte kootte Waakh kalaꞌd ilaabo isleeyaham enenyet uumhana idowa.

⁴Iꞌdaasenyi wihi Waakh sooumhe tuumman a haagganyahiine, walah tuumman la chirri Waakh on kalaꞌd liilaabe walah laꞌdiiꞌdo mele.

⁵A mehe Yeedi Waakh ichoow weysi ba wahaas a munyaachaan.

⁶Chirri at ꞌdooꞌdi Kiriisto rummeeste waha kawaanisso, at ilbooy Yeesso Kiriistoki haaggane tateeh. Toro la kol dakkhan wori rummaate Kiriisto miinsan ichoow haaggi lakaasooweynaache at raahto rubeytaah ka miige kisiichaan.

⁷Hawweesseti Yeedi Waakh buusan ichoow ti ꞌdalam ba kaseeh. Isjeyiche ꞌdee jiroti Waakh kahamaado jir.

⁸A mehe sarti lajeycho indigirtoo rucchul on khabta. Iꞌdaasenyi jiroti Waakh kahamaado lajiro, walah tuumman indigire ikhabta. Jiroti toolla ichoow ti soosohatti ka, jiroti Waakh kiayyiche jirta.

⁹Mammahtaas an idah a ti lakakhuufo kootte incheenka tuum lakhaatti.

¹⁰Jeentetuu la weyti hol downa, tirriinsanna, jeenteti inno Waakkhi jiro khajjeel ikakhabnuu. Waakkha la a ꞌDoorribehi enenyet tuummane, kach ka la ꞌdooꞌdi usu rummeeste.

¹¹Wahanyeyyoha la ꞌdooꞌd abiche toro amurre a raaheen.

¹²Uus etoo kalday laka jeenteti at inugussahuu kiꞌdarraawin. Iꞌdaasenyi yeedi afaah kasoobaho ka ichoow jiroti at jirto ka ichoow ꞌdooninti at enenyet ꞌdoonto ka ichoow kakhuufnaanki at Kiriisto kakhuufto ka ichoow jiroti el ikhabine at jirto ka, ꞌdooꞌdi Kiriisto rummeeste iyookko iateeh.

¹³Ichoowka an amiit, geeddi at tabuuꞌd hol dowe, Chiirnaanneti Waakh ꞌdooꞌd Kiriisto isoome, uur miigooche toro la wori Waakh abi.

¹⁴Siintaahti maanti ewweenki urur Kiriisto woyo dahano kikorche wori Waakhe lakaayyeedo at kaꞌhesse akadabin.

¹⁵Geeddi at tabuuꞌd wahanyeyyoha an kiidah raahe, tuum isisoobihiche, ꞌdee ꞌdooꞌd tuumman saggi at orey ikasohatti a argo.

¹⁶Kol dakkhan jirotaah ichoow wihi at ꞌdooꞌd abisso yaakhiche, weyti la goya yey. Chaꞌat waha yeesso, a isribta ꞌdooꞌdi kidagansati laka ribta.