Read rendile Tiito 2 Bible Online

Tiito 2 - rendile bible

Tiito 2

¹At la tabe wahanyeyyohi icho ichoow wori Waakhe rummaat ba israahaan ꞌdooꞌd abi.

²Makhaaballeti araarrinyee isjeycha, saggoo atin liinkaanyito ifiddiya, ꞌdooꞌdi samacchaare ateeha idah. Kakhuufnaanki icho Waakh kakhuufaan ichoow ꞌdooninti icho ꞌdooꞌdi addan ꞌdoonaan ichoow garrahsihi rumanka icho khabaan abi.

³Iꞌdaasu la, deyyehoti araarrinyee laka wihi at itadeeh, jiroticho ka, saggi deyyehoti munyee ijira. Iiche enenyet meꞌdeꞌddeeline, farsoti sabiib barin. Iꞌdaasenyi wihi haaggan enenyet a abisso,

⁴ꞌdee deyyehoti nunnugul saggi iche makhaaballeticho ichoow nyaakhuticho iꞌdoonto abin a yubaaꞌdeen.

⁵Toro la deyyehoti nunnugul saggi iche isijeyisso, iche jiroti miꞌdabe ijirto, iche urmohicho mujjum idakhatti, iche wihi haaggan iyeesso, iche makhaaballeticho aficho ikutin abin a yubaaꞌdeen. Iꞌda ka enenyet Yeedi Waakh ma igafo.

⁶Saggaas on u, tabe mejeli nunnugul laka faajjiye, a isjeycho.

⁷Ati rubeytaah la wihi tuummane at yeesso ka, iyookkoti haaggane icho raahaan iateeh. Saggi at enenyet walah iabisso ka, eloo rucchul laka atusine, wohoo ꞌdabakhe iikhaatine,

⁸toro la worassi fiffissane wohoo suuje lakacheekin liiubaaꞌdan cheek. Iꞌda ka ꞌdooꞌdi kitirrimo lakhaanyo khaatatta a mehe walah suujenye icho inno kacheektaan mele.

⁹Bowꞌdayyo la mehe itadeeh ya, walah tuumman ka iicho kamurreticho aficho kutine, kamurreticho a kahamaadicheene, iicho yeed ilaabin.

¹⁰Toro la bowꞌdayyo iicho kamurreticho hatin. Iꞌdaasenyi ꞌdooꞌdi tuum lakakhuufo a eheetti. Iꞌda ka walahbaaw icho yeelaan ka, yeedi wori rummaate Waakkhi ꞌDoorribeheene kayamiit saaꞌdo ikeenaan.

¹¹A mehe haaggi Waakhe buurenye inno imunneynane ribnaan keeno, weeli enenyet tuumman a liisoobabbakkaahiche.

¹²Haagga la saggi jiroti Waakh ikamalin liijirin ichoow saggi wahanyeyyohi harratane sussuujenye liimoono liiꞌdiiꞌdo iche inno abcha. Toro la harrata ka, ꞌdooꞌdi isjeycho, fiffissane, jiroti Waakh ꞌdoono jiro, inno abcha.

¹³Iꞌdane yeella geeddi inno khajjeeli buuhi Waakh keeno sugno. Waha la a maanti Yeesso Kiriistohi Waakhenye ꞌDoorribeheene weynaantiisti ababto inno liisoobabbakkaahicho.

¹⁴Yeesso la jeentetane jirotiis inno isoobahche, ꞌdee hugunꞌdarri tuumman inno kasoofura, toro la inno dikha ꞌdee ꞌdooꞌdi kiisenye haag kalday imoono nateeh.

¹⁵Wahanyeyyoha ꞌdooꞌd abiche uuricho miigooche, toro la antohi tuum lakisiiche ka leejaakh. Uus etoo kalday laka kiꞌdarraawin.