Read rendile Ibiraaniya 1 Bible Online

Ibiraaniya 1 - rendile bible

Ibiraaniya 1

¹Goorat archiiy, Waakh aacchinyeteen geeddi buure ichoow jitassi ittaawe ka a leeyyeede. Ulla ꞌdooꞌdi Waákh íyeyyeedo kaleeyyeede.

²Iꞌdaasenyi, ibeenneta ꞌdaꞌddaboot ka, Waakh Weeliissa inno kaleeyyeede. Weeliiska a ki Waakh soobahsate walah tuumman dalho, toro la a ki Waakh usu ka harra tuumman soouume.

³Weela Waakh la weynaanti Waakkhi ababo tusa, ulla toro a fooli Waakh. Ulla yeediiski miig leh ka wihi tuummane jiro khuccha. Ulla a yumuyye, ꞌdee usu rubeytiis jiti uskeeli weeli enenyet lakadikho yitah. Inkoo us wahaas yeele ka, goobi Waakh ka Waakkhi Weyti Ween ankiiski miigeet orronte.

⁴ꞌDeerka Weeli Waakh herti Waakh laka weyti a kaweeyyahe. Magahi Waakh weeliis siiche magahi herti Waakh weyti kussanyahe.

⁵Iꞌdi tahe Waakh hertoh Waakhe injire waha iidah, “At a Weelaaya, maalinka an Aabbahaahha itah.”[1] Ommos Waakh hertoo kaldache Waakh, “An Aabbahiissa ateehe, ulla Weelaaya yateeh,”[2] ma iidaahan.

⁶Toro la Waakh maanti us teyyankiis harrata isooerge wihi us yidah, “Herti Waakh tuumman usu a wahatti.”[3]

⁷Waakh la chirri us wori hertiis kaayyeedo, wihi us essi, “Waakh hertiis hafare kayeela, toro falfatiistaas kalabi ꞌdabe kayeela.”[4]

⁸Iꞌdaasenyi Waakh wihi weeliis miinsane us iyidah, “Okkhoow, kombortaahti antoot jirtuu tuumman ma massatti, at la wussaah ka jiti rummaate ꞌdooꞌdaah kadakhatta.[5]

⁹At wihi fissane ꞌdoonta, hugunꞌdarri la ꞌdiiꞌdda. Jeentetaase anihi Waakkhaahe, subakki geeyi oolife hamaad keeno matah ikaasubhe, wahalhaah goyaka kikucche.”[6]

¹⁰Wihi addane Waakh weeliis iyidah, “Kamuroow, uumaccho ka harra tuumman a soouunte, dahanohaah ka la serey soouunte.

¹¹Waha tuumman a massataane, icho dakkhan la iꞌdi dafareet u, a massataan. Iꞌdaasenyi, at a sooꞌhadda.

¹²Iꞌdi kootihi massatte u a isijibbaadda, toro la iꞌdi dafarti raagte u urgiyissa. Iꞌdaasenyi at a ki gooraatteet one, ma urgiito, guꞌhassaah la ma massataan.”[7]

¹³Hertoh Waakhe injire Waakh iꞌda iidah, “Dabankeeyki miigeete antoot orrommo ichoowka chiiytaah tuum dahanohaah a soogesso?”[8]

¹⁴Herti Waakh a meheey? Icho a rubeyohi Waakh ergati, ꞌdooꞌdi ribnaanki Waakh muꞌdan ihilo menya?