Read rendile Ibiraaniya 7 Bible Online

Ibiraaniya 7 - rendile bible

Ibiraaniya 7

¹Eta Melkisedeek layadeeh, karnati ili Saleeme [23] eheneete, toro la kuhaanihi Waakkhi Weyti Weene eheneet. Chirri Aburaaham ꞌdooꞌdiis khabaayi karnatohi ittaawe kaꞌhigtoote sooriche soonokhte ka, Melkisedeek or kadowe, iweeste.[24]

²Aburaaham la wihi tuummane us diho ka sookhaate meel tomon seley igooche, goonankoo [25] Melkisedeek siiche. Magaha Melkisedeek layadeeh la a mehe ya, “Karnati wihi fissan yeelo.” Jeenteti us karnati Saleem iyahuu, magaha wihi addane us itoollo a mehe ya, “Karnati nebey dowo.”

³Walah Melkisedeek aabbahiis ichoow abartiis ichoow aacchinyetiis laka miinsane lasoocheeke mele. Maanti us desse ichoow maanti us yumuy laka ma lacheekin. Us iꞌdi Weeli Waakh u, jirtuu dakkhan a kuhaani on.

⁴Bal saggi rumanka Melkisedeek ikhummanyahe kamalda. Aburaahamhi yaafohi Issiraayel uume laka, wihi us diho ka sookhaate, goonankoo Melkisedeeke siiche.

⁵Amurre Muusa ka nyaakhut nyaakhut Laawi, ki gaasiiskoo kuhaaniyyo yahe, icho laka goonankoo yaafohi Issiraayel a kakhaataan, chirri icho nyaakhut nyaakhut Aburaaham yahiin laka.

⁶Iꞌdaasenyi chirri Melkisedeek hiiy Laawi ikiimaatan laka, goonankoo Aburaaham usu siiche a kakhaatte one, toro iweeste. Aburaaham la a eti ayyinti goorat Waakh gooche ꞌhelo.

⁷Wihi inno garanni la a mehe ya, eti enenyet iweesti, ichoow ki liiweesti, ki enenyet iweesti ween.

⁸Kuhaaniyyohi yaaf Laawi kayimiy ka, ꞌdooꞌdi goonankoo khaato a weeli enenyete berri yamuut. Melkisedeek laka goonankoo a ꞌhele. Iꞌdaasenyi us icho a kussanyahe. Iꞌdi tahe Chiirnaanneti Waakh saggi us ijiro a cheekta.

⁹Maantaka maanti Aburaaham goonankoo Melkisedeek siiche, a iꞌdoo Laawihi hiiyyiis goonankoo khaato laka, Aburaaham ka goonankoo bahche.

¹⁰Iꞌdi tahe Laawi geeddaas ka ma delan. Toro maanti Melkisedeek Aburaaham ꞌhele, Laawihi yomboka ladele, sar aacchihiiski Aburaaham layadeehe goya kijire.

¹¹Amurreti Waakh yaafohi Issiraayel siiche, kuhaaniyyohi yaaf Laawi kanoolneet. Iꞌdaasenyi kuhaaniyyo hilicho saggi Waakh ikaꞌdoono tuum buuhin ma ubaaꞌdan. Jeentetaas gon kuhaanihi uumman nyaakhut nyaakhut Haruun kayimiy menye, ki uumman Melkisedeeke Waakh iꞌdoona.

¹²Iꞌdi tahe wihi laꞌdoono a mehe ya, maanti kuhaaniyyo luurgiyicho, amurre laka a luurgiyicha.

¹³Kamureenka Chiirnaanneti Waakh woriis kaayyeeddo la, yaaftoo addane kayimiyye, yaaftaas ka la et injire chalagti hoola lakasoorriyoocho ka hili kuhaani haaggiche mele.

¹⁴A mehe enenyet tuumman saggi Kamureen yaaf Yuuda ikayimiy a garta. Muusa la maanti us wori kuhaaniyyoot kaayyeede, yaafta magah laka ma wahin.

¹⁵Ayta inno kaayyeene weyti a ꞌdowaawte, iꞌdi tahe kuhaanihoo addane uumman Melkisedeeke a soobahe.

¹⁶Ulla jeenteti us amura usuhi hiiy Laawi kayamiit iꞌdoono ibuuhiche kuhaani ma itaahane, iꞌdaasenyi jeenteti miigtiisti jirotiisti jirtuu imassanne kuhaani iyitah.

¹⁷Iꞌdi tahe Chiirnaanneti Waakh wihi iche cheekto, “At jirtuu tuumman a kuhaanihi uumman Melkisedeeke.”[26]

¹⁸Amurreti oraat a ꞌdarneete toro la gargaar ma khabine, a laꞌdiiche.

¹⁹A mehe amurre Muusa walah tuum ma kayeesso. Iꞌdaasenyi khajjeeli inno toolla khabno, khajjeeli goorat inno khabne khuuf on kadeefa, Waakhe inno idowwaachaa.

²⁰Inno khajjeela deefo a khabna, toro wihi Waakh daatte laka a jiraan. Iꞌdi tahe Waakh maanti goorat kuhaaniyyohi yaaf Laawi lasoobahcho, ma daatan.

²¹Iꞌdaasenyi maanti Yeesso kuhaani yitah, Waakh a daatte, wihi us yidah, “Anihi Kamurenye Waakhe wahane gooche, yombo la ma inokhdi, wohoo addan ma yeelo. At jirtuu tuumman a kuhaani.”[27]

²²Jeenteti Waakh idaattuu, Yeesso a jiti ayyinti deefto Waakh gooche lakabuuhicho.

²³Wohoo addane ayyinti oraat yeerarroocho a mehe ya, kuhaaniyyohi oraat ittaawe eheneet. Iꞌdi tahe kooba a yamuute, chuꞌus yumuy la, hili Waakh ma haaggicho gone, etoo addan meessiis gela.

²⁴Iꞌdaasenyi Yeesso jirtuu tuumman a jira gone, hiliiski kuhaani et liikuccho, meessiis gelo mele.

²⁵Maantaka usu ꞌdooꞌdi usu leeyamiite Waakh iirti tuum ribin a yabuuꞌd. Iꞌdi tahe usu kol tuummamba a jira, ꞌdee ꞌdooꞌda Waakh a ihawwaasta.

²⁶Yeesso a kuhaaniheenki weyti weene, sagag tuumman ka inno gargaaro. Iꞌdi tahe usu a munya, eloo rucchul laka ma khabo, biꞌdiroo rucchul laka ma khabo. Waakh usu ꞌdooꞌdi uskeel leh goyaka a soobahche, goobi Waakh ka walah tuumman ꞌdirihicho weynaache.

²⁷Ulla walah usu iꞌdi kuhaaniyyohi weyti wewweene addan u, kol dakkhan koloo jeenteti uskeeliis u, Waakh soorriyoyyo ikabahcho, ꞌdee toro jeenteti uskeeli ꞌdooꞌdi addan u Waakh soorriyoyyo ikabahcho mele. Us koloo kalday on issoobahche soorriyoti liikanokhanne uskeeli enenyet bihisso yitah.

²⁸Iꞌdi tahe amurre Muusa mejeli wihi lakaꞌdoono ka ꞌdaꞌddarane soobihissa, ꞌdee kuhaaniyyohi weyti wewween yateeh. Iꞌdaasenyi inkoo amurre Muusa timiy ka Waakh daato ka ayyinti husub gooche, weeliis soobahche kuhaanihi weyti weene wihi lakaꞌdoono tuum buuhicho jirtuu tuumman kayeele.