Read rendile 1 Beetero 1 Bible Online

1 Beetero 1 - rendile bible

1 Beetero 1

¹Khadaaba eti atin isoochiiro, a ani Beeterohi ergaano Yeesso Kiriistee. ꞌDooꞌdi an isoochiiro la a ꞌdooꞌdi Waakh soobahsate, harrata ka iꞌdi ꞌdooꞌdi yeelan ijiro, boroofenhi Boontus ichoow ki Galaatiya ichoow ki Kabadookiya ichoow ki Aassiya ichoow ki Biꞌduuniya tuumman kataasan.

²Soobahsanaanki Waakkhi Aabbaheene atin soobahsate ichoow wihi ꞌhor us garte a israahaan. Toro us a atin soobahsate hili Rubeyti Munyee ka atin munyaache, ꞌdee Yeesso Kiriisto aytiis raahtaane diiggiis ka atin lakadikha. Waakh ba tuum atin imaala nebey tuum atin kakaala.

³Waakkhi Aabba Yeesso Kiriistohi Kamureene koolinno. Us uurnugleeliiski buure on ka, jirotoo husube inno khajjeello a inno siiche. Jiti us waha kayeele la, a Yeesso Kiriistohi us omoot kasookahche.

⁴Toro la jirota husub ka Waakh wihi inno muꞌdane jirtuu ituumine, eloo rucchul laka ikhabine, iraagin goobi Waakh ka meel a inno igessa.

⁵Kakhuufnaanki inno Waakh kakhuufno ka, Waakh miigtiis ka a inno toorriba, ichoowka ribnaankaas ꞌhella. Waha la ibeenki ꞌdaꞌddaboote ꞌdow liisoobahcha.

⁶Wahaas tuumman ka weyti hamaada on. Iꞌdaasenyi toolla geeddoor sinayyohi fil ittaawenye bolokh atin ikeeno kolossoo a atin kawaaraan.

⁷Sinayyoha a atin isoobaheene kakhuufnaanki atin Waakh kakhuuftaan kajaane, ꞌdee saggi us ki rummaat iyahe toro eloo rucchul laka ikhabin tusaan. Kakhuufnaanka Waakh lakakhuufo gatoti ꞌdahab laka a kussanyahe. A mehe ꞌdahabi kheerowo laka ꞌdabe lakakaja toro la ꞌdabe dikha. Maanti Yeesso Kiriisto harra tuumman liisoobabbakkaahicho ka kakhuufnaankiin koolo ichoow weynaan ichoow inkaanyiti buure ꞌhela.

⁸Atin usu injire ma argine, eheetteey laka, usu a ꞌdoontaan. Atin usu toolla ma agartaane, eheetteey laka, usu a rummeysattaane toro la hamaadi etoo cheekin iubaaꞌdane toro weyti buurenye khabtaan,

⁹a mehe rubeyohiin a laribe. Wahaase Yeesso Kiriisto ikakhuufteen.

¹⁰Wori ribnaanka miinsan la ꞌdooꞌdi Waákh íyeyyeedo wihiis weyti yowte toro la mujjum hiisteen. Icho la haaggi Waakhe buurenye inno imunneynane atin iyamiit a cheekeen.

¹¹ꞌDooꞌda Waákh íyeyyeedo Rubey Kiriistoti goycho kijirto icho et ichoow maan tusso iche aban ꞌdooneen. Rubey Kiriisto la wahanyeyyoha saggi Kiriisto sina liikawaaricho yomboka liiweynaacho miinsan orey on cheekte.

¹²Wihi liisoobabbakkaahiche a mehe ya icho ma isihiline, iꞌdaasenyi atine atin ihileen maanti icho wahanyeyyohi geeddi icho noolyahiin iitaahane guꞌhassi ittaawenye yombo sooraaho sooyateeh kaayyeedeen. Toolla la ꞌdooꞌdi Wori Haaggane miigti Rubeyti Munyeenye goobi Waakh lakasooergo cheeko ka, wahanyeyyoha a atin liisoocheeke. Herti Waakh laka ichehi wahanyeyyohaas agarto imoonta.

¹³Maantaka maliin hil itannabicha, isjeycha, haaggi Waakhe buurenye maanti Yeesso Kiriisto atin liisoobabbakkaahicho atin lasiicho tuum khajjeel kakhaba.

¹⁴Iꞌdi nyaakhuti yeed daaguu, suujoonki liimoono maanti atin wohoo igaran atin khabteen iinokhanna.

¹⁵Iꞌdaasenyi saggi eti atin wahe munya iyahuu, atin laka wihi atin yeessaan tuumman ka munya ateeha.

¹⁶A mehe wihi chiiran, “Munya ateeha, an a munyaa.” [1]

¹⁷Atin Waakkhi Aabbaheenenye enenyet seley isassaahine ebba wihi us yeelo on ka hukkumo wahattaan gone, taba geeddi atin harrata ka jirtaan tuumman usu inkaanyita.

¹⁸Iꞌdi tahe a garattaane, jiroti ilmarhaatteete atin aacchinyetiin kaꞌhesseen, wahanyeyyohi suujowo iꞌdi maanta lahaag ommos ꞌdahab mee lagute atin lafure.

¹⁹Iꞌdaasenyi diig Yeesso Kiriistoki lagane iꞌdi heleenki miꞌdabenye eloo rucchul laka ikhabine lagute.

²⁰Geeddi harra liisoouumin on usu lasoobahche, iꞌdaasenyi iroonotiin u ibeenneta ꞌdaꞌddaboote lasoobabbakkaahiche.

²¹Usu ka atin Waakkhi usu omoot kasookahche toro la weynaache a rummeysatteene, ꞌdee Waakh on kakhuuftaane, toro la usu on khajjeel kakhabtaan.

²²Toolla runti atin raahtaan ka a isdikhteene ꞌdee ꞌdooꞌdi Kiriisto rummeeste ꞌdooninti rummaat ikhabtaan gone, taba giꞌde uurassiin ka weyti isꞌdoona.

²³A mehe toro a delatteen. Delmaattiin ilinti suujowto ma kiimaataane iꞌdaasenyi ilinti jirtuu tuumman ituumine leetimiy. Waha la a Yeedi Waakhe jiro khabo toro jirtuu tuumman ituumin.

²⁴A mehe iꞌdi Chiirnaanneti Waakh tadeeh u, “Weeli enenyet tuumman a iꞌdi hoose, weynaantiis tuumman la a iꞌdi fiikheet. Hoos a angaga fiikhe la a khubatta.

²⁵Iꞌdaasenyi Yeedi Kamur jirtuu tuumman a jira.” [2] Yeeda la a Wori Haaggane atin liicheeke.