Read rendile 1 Beetero 2 Bible Online

1 Beetero 2 - rendile bible

1 Beetero 2

¹Maantaka, suujoon tuumman ichoow ekkeysi tuumman ichoow iskaayyeelnaan ichoow kalꞌdarri ichoow ham tuumman kasootaba.

²Iꞌdi nyaakhuti rurrucchule dessuu, taba atin laka Wori Haaggan iꞌdi haanuut u iamuuma, ꞌdee ribnaankiin ka weynaada.

³Iꞌdi tahe toolla saggi Kamur ihaagganyahe a chanchanteen.

⁴Kamuri iꞌdi daakki jireenye ꞌdooꞌd ꞌdiiꞌde, iꞌdaasenyi Waakkhi soobahsate ka weyti khumman iamiita.

⁵Toolla la iꞌdi dagahti jiro khabtuu, Waakh minki ꞌdooꞌdi Waakh waho iche atin kadisa. Waakh la iꞌdane yeela ꞌdee kuhaaniyyohi munyee atin kayeela. Iꞌdi kuhaaniyyoot u la, Yeesso Kiriisto ka, iꞌdi soorriyoti Rubeyti Munyee woyto toro Waakh kahamaaduu Waakh isibihissaan.

⁶Iꞌdi tahe Chiirnaanneti Waakh mehe tadeeh ya, “An ilkerengeetti Saayon ka daakkoo an soobahsade khummane tirrinki dagaheetenye chuukha, eti tuummane usu rummeeste la lakhaanyo ma lakadowo.” [3]

⁷Atinhi usu rummeysattaan ka daakka weyti atin ikhummanyahe. Iꞌdaasenyi ꞌdooꞌdi irummeysan ka, “Daakki ꞌdooꞌdi minan diso ꞌdiiꞌde, usu tirrinki dagaheete min tiiro yitah.”[4]

⁸Toro la, “Us a iꞌdi daakki enenyet tarraantarricho, a daddaabti enenyet lagaꞌddo.” [5] Jeenteti icho ayti Waakh idaagine itarraantarrataan. Waha la a wihi goorat Waakh igooche on.

⁹Iꞌdaasenyi atin a ꞌdooꞌdi Waakh soobahsate, a kuhaaniyyohi karnat, a yaafti munyee, a ꞌdooꞌdi Waakhe Waakkhi mugꞌdi goya kasoobahche banayhiiski haaggan goya soogesse wihi weyti haaggane us yeele cheeko.

¹⁰Atin goorat ꞌhor ꞌdooꞌdi Waakh ma eheynane, iꞌdaasenyi toolla a ꞌdooꞌdi Waakh. Goorat ꞌhor uurnugleeli Waakh ma ꞌheline, iꞌdaasenyi toolla uurnugleeli Waakh a ꞌhesseen.

¹¹Aalasseeyki an weyti ꞌdoono, iꞌdi ꞌdooꞌdi harrata ka yeelan ichoow ki meel ikhabin u, a atin hawwaasda, taba wihi uurassiin goya kijiro uskeel imoono kol dakkhan atin isdihtaan uus atin kahataatin.

¹²ꞌDooꞌdi Waakh igaran goyaka jiroti haaggan jira, ꞌdee koli icho suujoonkoo atin kacheektaan tuumman, jeenteti icho haaggi atin yeessaan ifiirichaan u, Waakh a koolicheen maanti us yamiit.

¹³Taba weynaanti sirgaal tuumman afiche akutina iꞌdi tahe waha a wihi Kamur atinhi yeessaan ꞌdoono. Karnati weyti ween eheetteey ommos,

¹⁴gaafanayyohi karnat soobahsate ꞌdooꞌdi uskeel yeele sina tuso ommos ꞌdooꞌdi haag yeele koolicho eheetteey ka ba afiche akutina.

¹⁵A mehe wihi Waakh ꞌdoono a mehe ya, a atinhi haaggi atin yeessaan ka, ꞌdooꞌdi wihi ꞌdalam atin kacheekti chubbahissaan.

¹⁶Saggi ꞌdooꞌdi lasoofure ijira. Iꞌdaasenyi furnaankaas atin lasoofure akagirꞌdaamina suujoon ayeelina. Saggi falfayyohi Waakh ijira.

¹⁷Taba enenyet tuumman inkaanyita, ꞌdooꞌdi addane Kiriisto rummeeste ꞌdoona, Waakh karoora, karnat la inkaanyita.

¹⁸Atinhi bowꞌdayyee, taba inkaanyit tuumman ka kamurretiin aficho akutina. Kamurreti hahhaaggane toro samacchaare kalday menye, ti saggi suuje atin iwoyto laka aficho akutina.

¹⁹A mehe Waakh a kaahamaada chaꞌat bolokkhi ikaamaline lakituse ka garrahsatte jeenteti at wihi Waakh ꞌdoono igarattuu.

²⁰Iꞌdaasenyi koolohoh sugta chirri at uskeeli at yeesse on ka lakijahe, at garrahsatte. Iꞌdaasenyi chirri haaggi at yeesse ka sina lakoomhicho, at la garrahsatti, Waakh a kaahamaada.

²¹A mehe jeentetane atin liiwahe. Kiriisto laka sina a kawaarte gone, us iyookkoti atin dabatiis raahtaan a atin iyitah.

²²“Uskeel us yeele mele, been afiis leetimiy mele.”[6]

²³Us maanti laabaare laka abaar ma laabin. Maanti sina lakawaariche laka, ꞌdooꞌdi sina kawaariche ma itiftoonne, Waakkhi enenyet saggi mujjume ihukkumo on dahantiis isgesse.

²⁴Usu rubeytiis la massalaaba ka uskeeleen a siꞌde. Iꞌdane yeele ꞌdee uus kola uskeel inno dakhanne, jiroti fissan jirra. Sinati loomhiche ka, atin a samaatteen.

²⁵Iꞌdi tahe atin iꞌdi iiyti baabaa kijirto eheet. Iꞌdaasenyi toolla Ersinki rubeyohiin yaakhicho a isoonokhatteen.