Read rendile 2 Beetero 3 Bible Online

2 Beetero 3 - rendile bible

2 Beetero 3

¹Aalasseeyki an weyti ꞌdoono, waha toolla a khadaabeeyki lammaatteete an atin isoochiire. Khadaabbe lammache ka wihi atin ꞌhor abatteene atin kasooꞌhelcha, ꞌdee mali haaggan khabtaan.

²Atinhi wihi goorat ꞌdooꞌdi munyayyeenye Waákh íyeyyeedo cheeke kasooꞌhessaane ꞌdoona. Toro la atinhi amurreti Kamureenki toro ꞌDoorribee miinsane ergaano atin isoocheekte kasooꞌhessaan iche ꞌdoona.

³Koloo la waha abda, ibeenneti ꞌdaꞌddaboot ka ꞌdooꞌdi runti Waakh kachaarti toro suujoonki uurassicho imoonaan kalday on yeelo a soobaha.

⁴Mehe atin idowaan ya, “Emeetti goorat us ayyiche meete? A mehe aacchinyeteen a tuunte walah tuumman la a iꞌdi maanti goorat harra lasoouume on.”

⁵Iꞌdaasenyi dib on u saggi Waakh goorat archiiy yeedi afiissa on ka serey ichoow harra ba isoouume dabaan. Toro la dib on u saggi us harrati kafafsane bicche lakasoohaaggiche, bicche kamarsanyahiin dabaan.

⁶Bicchehaas on jiti ꞌduleyi buure ka maantaas harra lasuujaache. ꞌDuleye lakeene wihi harra kajire tuumman lamassiche.

⁷Waakh la yeedaas afoot on ka serey ichoow harrata saggi toolla icho ijiraan on iꞌdiicha ichoowka ibeenki us ꞌdab kagubo baabiicho yateeh. Ibeenkaas Waakh ꞌdooꞌdi usu igaran a hukkuma toro la bar tira.

⁸Iꞌdaasenyi aalasseeyki an weyti ꞌdoono, waha akadabina. Kamur ka, ibeenkoo a iꞌdi guꞌh alifoo, guꞌh alifoo la a iꞌdi ibeenkoo.

⁹Kamur wihi us ayyiche ka ma soomalmalo iꞌdi ꞌdooꞌd gaasoo malmalli ikhaatuu. Us a atin igarrahsata a mehe usuhi etoo kalday laka iumaatane, iꞌdaasenyi enenyet tuumman uskeel kasoonokhti iche ꞌdoona.

¹⁰Iꞌdaasenyi ibeenki Kamur iꞌdi eti walah hato iyamiit. Maantaas la sereyta daayan saggi uskule iyeedda, baabaata. Wahanyeyyohi sereyta kajiro tuumman la a gubtaane bar waayaan. Toro la harra ichoow wihi harra kajiro tuumman laka a laguba.

¹¹Walah tuumman saggane liibaabiicha gone, atinhi jiroti munyee ichoow jiroti Waakh kahamaado jirtaane laꞌdoona,

¹²geeddi atin ibeenki Waakh sugtaane atin ibeenkaas itirriinsattaan. Maantaas la sereyta daayan ichoow wahanyeyyohi kijiro tuumman a gubtaane bar waayaan.

¹³Iꞌdaasenyi wihi Waakh ayyiche ka, sereytoo husub ichoow harratoo husube walah tuumman fissanyahiine sugna.

¹⁴Maantaka aalasseeyki an weyti ꞌdoono, geeddi atin wahaas sugtaan weyti tirriinsada, ꞌdee atinhi usu nebey ikhabtaane uskeeloo rucchul laka ikhabine eloo rucchul laka ikhabin a atin sooeleelo.

¹⁵Waha la abda, samacchaari Kamureen ribnaanki us enenyet ribo ikhaata. Walaaleenki inno ꞌdoonno Baawulo layadeeh laka kharati Waakh siiche ka waha a atin isoochiire.

¹⁶Baawulo khadaabbetiis tuumman ka, wahanyeyyohi emeet Kiriisto miinsan a kaayyeeda. Khadaabbeti Baawulo chiiro meelassoo, wihi us kaayyeedo abane a miig. ꞌDooꞌdi waha foolicho ikhabin ichoow ki yeed Yeesso goya kahusube mujjum hiiyyay ibihin la, wihi yeediis essi tuummane urgiyicha. ꞌDooꞌda la Chiirnaanneti Waakh tuumman saggaas on ibaabula. Iꞌda ka bakkinnaanki labakkicho iche isikeenaan.

¹⁷Maantaka aalasseeyki an weyti ꞌdoono, waha orey on garatteen gone taba isyaakhicha. Uus suujoonki ꞌdooꞌdi hugumme iraahin atin ekkeysanne luhlo atin kakhaatin. ꞌDooꞌda iꞌdane atin yeela ꞌdee kakhuufnaanki atin Waakh kakhuuftaane isesseehin ka kuftaan.

¹⁸Iꞌdaasenyi haaggi Waakhe buure ichoow abanti atin Yeesso Kiriistohi Kamureenenye ꞌDoorribeheene abattaan ka weynaada. Toolla ichoow jirtuu tuummamba us ba koolo ꞌhela! Aamiin.