Read rendile 2 Yoohana 1 Bible Online

2 Yoohana 1 - rendile bible

2 Yoohana 1

¹Khadaaba eti soochiiro a anihi ewweenenye urur Kiriisto woyo. Eti ani isoochiiro a ati, makhaabassi lasoobahsate ichoow nyaakhutaahha. An rumanka weyti atin ꞌdoona. Ani kalday la menye, eti tuummane runti Waakh garti a atin ꞌdoona.

²A mehe runta goyteenna fiddiita, jirtuu tuumman la rubeyoheen goya fiddiita.

³Waakkhi Aabbaheene ichoow Yeesso Kiriistohi Weeli Aabbaheene ba rum ichoow ꞌdoonin ka inno imaalaane, uur inno isoonugleestaane, nebey inno kakaalaan.

⁴An weyti hamaade chaꞌan nyaakhutaahki gaasoo usuhi runti Waakh raaho arge, saggi Waakkhi Aabbaheene amur inno isiichuu.

⁵Maantaka makhaabassaneey, amura an kisoochiiro koo husub menye, a ki uus uumaccho ka inno khabne one, a kihawwaasdee, taba a isꞌdoonno.

⁶ꞌDoonine la talla, jiroteen ka amurretiissa raahna. Saggi atin uus uumaccho ka idaagteen u, amuriis a ki atin isꞌdoontaane, taba jirotiin ka isꞌdoona.

⁷ꞌDooꞌdi ittaawenye enenyet ekkeesti, saggi Yeesso Kiriisto harrata uummanki weeli enenyet ikayimiy icheekin harra a kataaꞌhe. Eti iꞌdee tuumman a ki enenyet ekkeesti, toro la a eti Kiriisto igafo.

⁸Taba isyaakhicha uus hili atin Waakh ihaaggisseen ki ilmarhaatteet eheynane, Waakh tuum a atin guto.

⁹Eti tuummane wihi Kiriisto ꞌdooꞌd abche iraahine, wihi awtiis kakhaye, Waakh ma khabo. Eti tuummane orey isohti wihi Kiriisto ꞌdooꞌd abche khuccho, Waakkhi Aabbaheene ichoow Weeli Waakh ba a khaba.

¹⁰Chiꞌ etoo atin iyimiyye ulla wori us keene, wori Kiriisto enenyet abche buusanyahe, etaas urantiin laka asoogelinna ommos bariito laka abariitinna.

¹¹Eti tuummane eti iꞌdee martiisti, hilaas weyti suujenye etaas haaggicho iche ullaka leegisma.

¹²Wihi noole an atin isoochiirin ꞌdoono a khaba, iꞌdaasenyi khadaab ichoow ringi kasoochiirin ma ꞌdoono. Anihi atin sooꞌdaaro iche khajjeela, afiin ꞌhela ꞌdee weyti isleehamaana.

¹³Nyaakhut walaassaahti Waakh soobahsate weyti a atin soobariitiche.