Read rendile 3 Yoohana 1 Bible Online

3 Yoohana 1 - rendile bible

3 Yoohana 1

¹Khadaaba eti soochiiro a anihi ewweenenye urur Kiriisto woyo. Eti an isoochiiro a ati, Gaayohi aaleeyenye an weyti rum ka ꞌdoono.

²Aaleeyki an weyti ꞌdoono, an Waakhe kisoowaha, saggaas maanta at orey on ikasohatti rubeytaah wahanyeyyohi Waakh ka ihaaggantahuu, feyya ichoow wihi at jirotaah tuumman ka yeesso haagsataan.

³Iꞌdi tahe ꞌdooꞌdoo Kiriisto rummeeste a yimiyye, saggi at rumanka wihi Waakh ꞌdoono iyeesso, toro la orey isohatti runti Waakh iraahto nah isoocheeke, waha la weyti ikahamaadicheen.

⁴Wihi weyti ikahamaadicho, a nyaakhuteeyki jiroticho ka saggi icho runti Waakh iraahaan an daago.

⁵Aaleeyki an weyti ꞌdoono, ꞌdooꞌdi Kiriisto rummeeste sossohti yeed Kiriisto cheeko at gargaarto ka, at a eti lakakhuufo, chaꞌat icho igaran laka.

⁶ꞌDooꞌda saggi at ꞌdooꞌdi Kiriisto rummeeste iꞌdoonto urur Kiriisto a icheeke. A haaggantahe chirri at chiꞌicho intoo addan ikahaan, saggi Waakh ikahamaaduu icho gargaarto.

⁷Iꞌdi tahe ꞌdooꞌda iroono Yeesso Kiriisto ibaha, ꞌdooꞌdi Waakh igaran la gargaar us kaꞌhelo mele.

⁸Maantaka inno rubeyteen ꞌdooꞌda wihi us ꞌdoono siinno giꞌde. Iꞌdaakka la runti Waakhe icho cheekaan a isleegargaarra.

⁹Urur Kiriisto khadaab ꞌhor a isoochiire iꞌdaasenyi Diyoodirefhi weynaan marmo waansiheey a ꞌdiiꞌde.

¹⁰Maantaka maanti an amiit, wihi us yeelo ꞌdowe isoobahcha. Usu ani ihanta, wori beenaat ka ani icheeka. Waha kalday on menye, wihi weyti suujenye us yeelo a mehe ya, ꞌdooꞌdi Kiriisto rummeeste wori Waakh cheeko laka ma martiisti. Toro la ꞌdooꞌdi ꞌdooꞌdaas wohoo iyeelin ꞌdoono a tirta, urur Kiriisto laka goya kariha.

¹¹Aaleeyki an weyti ꞌdoono, ꞌdooꞌdi suujoon yeelo goya atabine, iꞌdaasenyi ꞌdooꞌdi haag yeelo on dabatiis raah. Eti tuummane haag yeelo Waakhe kayimiy. Eti tuummane suujoon yeelo la Waákh ma argin.

¹²Enenyet tuumman haag Demmediroos a cheeka. Us runti Waakhe raaha, waha la saggi us eti haaggan iyahe iche tusaan. Nah laka saggi us eti haaggan iyahe a atin isoocheekna. Atin la saggi wihi nah cheekno tuumman rum iyahiin a garattaan.

¹³Wihi noole an kisoochiirin ꞌdoono a khaba, iꞌdaasenyi kalaamo ichoow ringi kasoochiirin ma ꞌdoono.

¹⁴Anihi dowwanoha ka kisooꞌdaaro khajjeela afaah ꞌhela.

¹⁵Waakh ba nebey kaahida. Aalassaahki inta kajiro tuumman a kisoobariiticheen. Aalasseenki intaas kajiro kooba bariiti.