Read rendile Bakkaahit 12 Bible Online

Bakkaahit 12 - rendile bible

Bakkaahit 12

¹Girmohoo buure sereyta daayan kasoobaheen. Makhaabassoo orrahe kaankubantahe soobahte. Iche la yeyyahe katolossa, ꞌduubi bakkaal tomon ichoow lamma khabo la matah kakhabta.

²Iche huleese eheete, jeenteti iche ichiissuu bolokh ka ooyte.

³ꞌDeerka girmohoo addan sereyta daayan ka soobaheen. Waha la a khorojebsihoo buurenye guuꞌddane, matah teeba ichoow gaas tomon khabo, matah ba la ꞌduuboo khabo.

⁴ꞌDubiis ka, yiyyihimohi saraat goonan seyyah goyaka goonankoo soojiite, harra isookhube. Khorojebsiha weeli makhaabassi kootte soodesso orche tolossate, ꞌdee weel uus dessi yaham.

⁵Inankoo desse. Inanka lab la usu dowwanoha ka yaafo tuumman wussi gaꞌdaar kadakhta. Inanka la uus desse on Waakh ichoow kombortiisti antoot liitogte.

⁶Makhaabale hidaad ka inti goorat Waakh iyeele ifiridde, ꞌdee herti Waakh ibeen alifoo kud lamma ichoow ibeen tomon lih goollissa.

⁷Goobi Waakh ka la diho a jirte. Herti Waakhe weene Miikayel layadeeh ichoow herticheti Waakhe addan khorojebsi isjaheen. Khorojebsi ichoow hertiis diho geleen.

⁸Iꞌdaasenyi khorojebsi ichoow hertiis ba lasooriche. Goobi Waakh ka meessicho waayeen.

⁹Khorojebsiha buure il liisooseye, ulla a ki goorat archiiy jire, magahiis la ki ꞌdooꞌd hanti ommos Seytaan iche layadeeh. Usu ꞌdooꞌdi harra tuummane jit buucha. Ulla hertiis khabaayi harra liisooseye.

¹⁰An ꞌdeerka hooyoo buure goobi Waakh ka daage, wihi us yidah, “Toolla ribnaan ichoow miig ichoow dakhi Waakkheen, ichoow anto Lasubhehiis a yimaateen. Iꞌdi tahe ki ꞌdooꞌdeenki Kiriisto rummeeste cheekti, ibeen ichoow maalim ba Waakh ortiis ka cheekti goobi Waakh a lakasooseye.

¹¹ꞌDooꞌd Kiriisto diiggi Heleem ka ichoow wori rummaate icho cheekeen ka Seytaan a sooricheen. Toro la chirri icho layagiis laka, icho omoot ma karoorin.

¹²Maantaka, goobassi Waakh ichoow atinhi kajirtaan ba, weyti hamaada! Iꞌdaasenyi atinhi harra ommos bey goya taalliin, sinati atin sugto eenna a buure! Iꞌdi tahe Seytaan a atin isookhubte. Ulla holi buurenye khaba, a mehe us saggi ibeennetiis igaabatte a garta.”

¹³Khorojebsi inkoo us saggi harra liikasoolugꞌde kase ka, makhaabassi kootte inankoo desse kalooꞌde.

¹⁴Makhaabál barbarretoo lammeenye gabadeet lasiiche, ꞌdee serey ka inti hidaad ka liiyeele, guꞌh seyyah ichoow hay lih lakagoollicho, khorojebsi la ikasooeleelin inyaanta.

¹⁵Khorojebsi ꞌdeerka bicchehi buurenye ꞌdulo ꞌdee makhaabál haro af kasoobahche, ꞌdubiche gate.

¹⁶Iꞌdaasenyi harra makhaabál gargaarte, aficheki furname ka bicchehaas khorojebsi af kasoobahche khorkhisse.

¹⁷Khorojebsi ꞌdeerka makhaabál ihollowe, nyaakhuticheki addan diho kiirte. Waha la a ꞌdooꞌdi amurreti Waakh raaho, toro la runti Yeesso soobabbakkaahiche kakhuufo.