Read rendile Bakkaahit 13 Bible Online

Bakkaahit 13 - rendile bible

Bakkaahit 13

¹Khorojebsi la bey afiche tolossate. Anna binahoo bey goya kasoobaho arge. Binaha matah teeba ichoow gaas tomon iche khabaan. Gaas ba la ꞌduube fuula. Matah ba la magahoo Waakh igafo kachiiran.

²Binaha an arge kabbile iyoogyahiine, iꞌdaasenyi luhlo a iꞌdi luhlohi binahoo weyti buurenye goffanneti derdeer khabo, af la a iꞌdi afi bahassi. Khorojebsi miigtiis ichoow kombortiis ichoow antohiis binahane siiche.

³Binaha matakkoo ka, jiissi omoot keento khabaane, iꞌdaasenyi jiissa omoot keento a samaatte. ꞌDooꞌdi harra kijiro tuumman la girmeeste binaha raahe.

⁴Jeenteti khorojebsi anto binaha isiichuu, weeli enenyet tuumman khorojebsi wahte. Toro binaha laka wahteene, wihi icho worsateen, “Etoo maanta iꞌdi binahee jiraayi? Ayyo kan diho kiiran yabuuꞌd?”

⁵Binahaas afi icho keeylajaane toro icho Waakh ikagafo lasiiche. Binaha la hay tomon affar ichoow hay lamma anto lasiiche.

⁶Binahaas la geeddi nool Waakhe igafaane toro magahi Waakh ichoow fiddiitoti Waakh ichoow ꞌdooꞌdi tuummane goobi Waakh kijiro abaara.

⁷Binahaas la miigti us ꞌdooꞌdi Waakh kadihaane toro icho kasoorichaan a lasiiche. Binaha la toro antohi us yaafo tuumman ichoow ꞌdooꞌdi fil tuummane ichoow afaf tuumman ichoow ilal tuumman kadakhti laka lasiiche.

⁸Weeli enenyete harra kijiro tuumman, ki tuummane magahenyeticho buuggi ꞌdooꞌdi jiroti jirtuu imassan ꞌhelo geeddi harra liisoouumin liikachiirin binahane wahta. Buugga la eti leh a Heleenki goorat layigis.

⁹Eti dogo khabo a daago.

¹⁰Eti tuummane boolinnaan liigooche a labooliya. Eti tuummane birlab ka omoot liigooche, birlabe lakayagiis. Wihi ꞌdooꞌd Kiriisto lakaꞌdoono a ichohi garrahsati, Waakh kakhuufo.

¹¹Toro binahoo addane harra goya kasoobahe arge. Binaha iꞌdi heleenkoo u, gaas lamma khabaane, iꞌdaasenyi hooyi iꞌdi ki khorojebseenye kayeede.

¹²Binahi lammaatteet binahi oraat orcho ka antohiis tuumman walah kadakhte. Binaha lammaatteet la weeli enenyete harra kijiro tuummane ihosse, binahi oraate jiissi omoot keento lasamaache khabe wahtaan.

¹³Binaha lammaatteet la wihi buurenye miigti buure tuso haaggiche, weeli enenyet tuumman argaayi ꞌdaboo laka serey kakeene, harra isooyagche.

¹⁴Binahi lammaatteet jeenteti binahi oraat orcho ka miigti us girmo kayeelo liisiichuu, ꞌdooꞌdi harra kijiro ekkeeste. Weeli enenyet amur ibahche ꞌdee iyookkotoo binahi oraate birlab ka lajiisooche uliba jiro lakiinkaanyito a haaggicho.

¹⁵Waakh binaha lammaatteet miigti us iyookkota binahi oraat iyoog neebsi kaafuufo us jiro siicho siiche, ꞌdee iché iyeyyeedin tabuuꞌde, toro la ꞌdooꞌdi iyookko wahan ꞌdiiꞌdo labakkicha.

¹⁶Ulla weeli enenyet tuumman laka ihosse, ki ween ichoow ki rucchul, ki kamure ichoow ki miskiine, ki bowꞌdee ichoow ki bowꞌda ieheynan ba, ꞌdee dahanohichoki miigeet ka ommos miinassicho ka sumat a lagesso.

¹⁷Iꞌda ka et walah gatti ommos walah ororicho mele sammata us sumatta ikhabin. Sumattaas la a magahi binahi oraate, ommos a sumatti ayti magahiis itolosso.

¹⁸Ayta khara ꞌdoonta. Chiꞌ etoo khara yahe, ayti sumatti binahaas a ekkaacho. A mehe magahi weeli enenyete itolossa. Sumatti aytiis, a kud lih ichoow tomon lih ichoow lih.