Read rendile Bakkaahit 2 Bible Online

Bakkaahit 2 - rendile bible

Bakkaahit 2

¹“Herti Waakhe keleyenye urur Kiriistoki Efeesso itolosso waha ichiir. Waha a farniinki ki bakkaalleti teebee dahantiisti miigeet kakhuccho toro la reemassi teebeenye ꞌdahabe taa lakorcho dahticho kaassohti.

²Wihi atin yeessaan ichoow holi atin dowtaan ichoow saggi atin igarrahsattaan a garda. Saggi atin ꞌdooꞌdi uskeel leh iꞌdiiꞌddaan a garda. ꞌDooꞌda ergaano Kiriisto iskaayyeelo iꞌdaasenyi ieheynan a kajjeene, beenticho agarteen.

³Atin a garrahsatteene, jeenteteey u, sinayyo tuumman ka samacchaar on eheete, ajjibaat ma khaatin.

⁴Iꞌdaasenyi waha a atin kakhaba, saggi atin uumaccho ka ani iꞌdoontaan kola ma iꞌdoontaan.

⁵Geeddi atin sookufteen kasooꞌhela! Uskeeliin kasoonokhda, wihi atin uumaccho ka yeesseen yeela. Chaꞌatin uskeeliin ikasoonokhan, an a atin iamiite, reenkiinki taa lakorcho meessiis kabahcha.

⁶Iꞌdaasenyi wohoo an atin kakoolicho a waha, atin wihi ꞌdooꞌd Nikolaawo yeelo a ꞌdiiꞌddantahiin. Ani laka waha a ꞌdiiꞌddanahe.

⁷Eti dogo khabo wihi Rubeyti Waakh ururre Kiriisto idowto a daago giꞌde. Eti tuummane sooricho la, ohonti us gurnaanki geeyi jiro lakeelo bahcho, gosi Waakh goya katoollo kayaham a muꞌdanyahe.

⁸“Herti Waakhe keleyenye urur Kiriistoki Simiriina itolosso waha ichiir. Waha a farniinki ki Oreyenye toro la Salaahime, ki yumuyye toro omoot kasookahe.

⁹Sinati atin loomhicho ichoow miskiinkiin a garda. Iꞌdaasenyi atin a kamurre! Saggi ꞌdooꞌdoo Yaꞌhuud isyadeehe toro la Yaꞌhuud ieheynan suujoonki nool atin ikadowo a garda, iꞌdaasenyi icho a minki weysiite Yaꞌhuude Seytaan dakhti.

¹⁰Sinayyohi dowwanoha ka atin lasoomhicho akaroorina. Wihi an atin icheeko, Seytaan gaasiinkoo jeela kachiba a atin kajaa. Sinayyoha la ibeen tomon on atin yamhiin. Chiꞌ omoot atin liigooche laka, ani on ikakhuufa ani la ꞌduubi jiroti jirtuu imassan a atin siichaa.

¹¹Eti dogo khabo, wihi Rubeyti Waakh ururre Kiriisto idowto a daago giꞌde. Eti tuummane sooricho la, omootti lammaatteet iꞌdaaru laka ma gaameerto.

¹²“Herti Waakhe keleyenye urur Kiriistoki Bergamum itolosso waha ichiir. Waha a farniinki ki birlabi af leh khabo.

¹³Inti atin fiddiitaan a garda, a inti Seytaan kombortiisti antoot kakhabo. Iꞌdaasenyi atin uliba rum ka a ikhucchissaan. Maanti eteeyki lakakhuufo Antiiba layadeeh ilkerengeettiinti ween ka inti Seytaan fiddiyo lakayigis laka, atin saggi atin ikakhuuftaan ma ꞌdiiꞌdin. Usu rum ka garteey a laabe.

¹⁴Iꞌdaasenyi wahanyeyyohoo rucchul a atin kakhaba. Atin intaas ka ꞌdooꞌdoo wihi Baalam enenyet abche raaho a khabtaan. Baalam usu Baalak saggi ꞌdooꞌdi Issiraayel liitarraantarricho abche, ꞌdee ꞌdooꞌdi Issiraayel gololi iyookkoyyohi waakkhakh lakayeessi liisoorriyooche yahame toro sohoꞌddarri liisoojiita.

¹⁵Iꞌdaasu atin laka ꞌdooꞌdi wihi Nikolaawo ꞌdooꞌd abcho raaho a khabtaan.

¹⁶Maantaka uskeel kasoonokhda. Chiꞌiche iꞌdaas ieheynan, a amiite birlabi afeey kasoobaho ka ꞌdooꞌdaas diha.

¹⁷Eti dogo khabo, wihi Rubeyti Waakh ururre Kiriisto idowto a daago giꞌde. Eti tuummane sooricho la, gololoo Waakh kayamiite dagsane manna layadeehe siicha. Toro la daakkoo dakhane magahoo husub kachiiranyahe, eti ꞌhelo kalday on garti, iche siicha.

¹⁸“Herti Waakhe keleyenye urur Kiriistoki ꞌDiyaaꞌdira itolosso waha ichiir. Waha a farniinki Weeli Waakh kayamiit. Indohiis a iꞌdi ꞌdabi weyti bolkho, luhlohiis la iꞌdi birtoo boorane lasiguu a bildiikhaan.

¹⁹Wihi atin yeessaan ichoow ꞌdooninti atin isꞌdoontaan ichoow kakhuufnaanki atin Waakh kakhuuftaan ichoow saggi atin isihissaan ichoow garrahsihiin a garda. Toro la saggi atin toolla wihi goorat atin yeesseen rumanka ꞌdirihicho iyeessaan a garda.

²⁰Iꞌdaasenyi wihi an atin kakhabo kallaayo, atin aranta Yeesebel layadeehe eti Waákh íyeyyeedo istadeeh a isisooꞌdiissaan. Wihi iche abisso ka falfayyoheey jite bujissa, ꞌdee ꞌdooꞌdi isidisan isleeurꞌda toro gololi iyookkoyyohi waakkhakh lakayeessi liisoorriyooche yamhiin.

²¹An iche geeddi deer a ꞌdiiche ꞌdee sohoꞌddarritiche a kasoonokhatti, iꞌdaasenyi ma ꞌdoonto.

²²Maantaka an makhaabassa sina omhicha. ꞌDooꞌdi uskeeli makhaabassi tiis ieheynan leeurꞌdo iche leegelo la, sammata icho uskeeli icho leeyeelaan ikasoonokhan, sinati buurenye omhicha.

²³ꞌDooꞌdi iche raaho a bakkicha, ꞌdee urur Kiriisto tuumman saggi an uur ichoow mali weeli enenyet ifiiricho rumanka abta. Ebba wihi us yeelo ichoow wihi an guto a israahaan.

²⁴Atinhi addane ilkerengeetti ꞌDiyaaꞌdira kajirtaane, wihi iche enenyet abisso iraahine, toro la wahanyeyyohi dagsane Seytaan iaban, hulees addane an atin korcho mele.

²⁵Iꞌdaasenyi wihi atin khucchissaan kalday jurkhicha ichoowka a soonokhdi.

²⁶Eti tuummane sooricho ichoowka ꞌdubicho eleelo wihi an ꞌdoono yeelo, an antohi us yaafo tuumman kawoyo a siicha,

²⁷saggaas an Aabbaheey anto ikaꞌheluu. ‘Usu icho wussi gaꞌdaar ka a dakhta, iꞌdi ꞌdirihi laajjebchuu, yaafohaas a jejjebcha.’[3]

²⁸Ani la usu bakkaali baryo [4] laka a siicha.

²⁹Eti dogo khabo, wihi Rubeyti Waakh ururre Kiriisto idowto, a daago giꞌde.