Read rendile Bakkaahit 3 Bible Online

Bakkaahit 3 - rendile bible

Bakkaahit 3

¹“Herti Waakhe keleyenye urur Kiriistoki Sardi itolosso waha ichiir. Ki rubeyohi Waakhe teebee khuccho toro la bakkaalleti teebee khuccho farniinkiis a kan. Wihi atin yeessaan a garda. ꞌDooꞌd kol atin jiro khabtaane koogyahe, iꞌdaasenyi atin a tuunteen.

²Omoot kasookaha! Geedda marahe atin kasooꞌhadde sootamuut miigoocha. Iꞌdi tahe wihi an arge, Waakkheey ortiis ka wihi atin yeesseen ma buuhaan.

³Maantaka wihi goorat atin laabche toro atin daagteen kasooꞌhela raaha, uskeeliin la kasoonokhda. Iꞌdaasenyi chaꞌatin ineybaan, iꞌdi eti hatto leh u, doglaan on atin soogela, sahaꞌddi an amiit la ma garattaan.

⁴Iꞌdaasenyi Sardi ka ꞌdooꞌdoo rucchule uskeel iskasoohosse a khabtaan. ꞌDooꞌda gaaddi daddakhane gessata ileesohta, a mehe waha a wihi icho imale.

⁵Eti tuummane sooricho la, iꞌdaasu gaaddi dakhane sar lakorcha. Ani magahiis buuggi magahenyeti ꞌdooꞌdi jiroti jirtuu imassan khabo, kachiiranyahe goya ma kabahcho. Ani Aabbaheey ichoow herti Waakh orcho ka saggi us eteey iyahe a cheeka.

⁶Eti dogo khabo, wihi Rubeyti Waakh ururre Kiriisto idowto a daago giꞌde.

⁷“Herti Waakhe keleyenye urur Kiriistoki Filadeelfiya itolosso waha ichiir. Waha a farniinki ki munyeenye toro rum leh. A usuhi furoti antoote too karnati Dawuude khuccho. Wihi us furo et hidin yabuuꞌd mele, wihi us hido la et furin yabuuꞌd mele.

⁸Wihi atin haaggisaan tuumman a garda. Yeya ani ortiin ka afaf a atin ifure, etoo kalday laka ma hido. Saggi atin miigtoo rucchul on ikhabtaan a garda, iꞌdaasenyi atin yeedeey a raahteene, toro la magaheey ma ꞌdiiꞌdin.

⁹Idagansada! ꞌDooꞌdi minki weysiite Seytaan dakhti a ꞌdooꞌdi Yaꞌhuud essi, iꞌdaasenyi ꞌdooꞌdi Yaꞌhuud ieheynane been goocho a jira. An ꞌdooꞌdaas a sookhaata, ortiin ka jilbo il kaguꞌddaane, toro la saggi an atin iꞌdoono abtaan.

¹⁰Atin amureey a raahteene garrahsatteen gone, maanti sinayyohi khar kayamiit ꞌdooꞌdi harra yaal tuumman isoobahaane ꞌdee kajaan, an a atin toorriba.

¹¹An dowwa soonokhda. Wihi atin khabtaan jurkhicha, uus etoo kalday laka ꞌduubiinki kalaꞌdeet atin kakhaatine.

¹²Eti tuummane sooricho la minki buurenye Waakkheey ka tirrinki dagaheete kayeela, ulla jirtuu tuumman intaas ma kakaho. Ani la magah Waakkheey ichoow magah ilkerengeetti weene Waakkhaaya usu kachiira. Ilkerengeettaas la a ilkerengeetti weene Yeerusaleeme husube Waakkheey goobiis kasooyagcho. Toro la magaheeyki husub laka usu kachiira.

¹³Eti dogo khabo wihi Rubeyti Waakh ururre Kiriisto idowto a daago giꞌde.

¹⁴“Herti Waakhe keleyenye urur Kiriistoki Lawodeechiya itolosso waha ichiir. Ki farniinka sooergo, a ki Aamiin layadeeh. A ki lakakhuufo, garti runti Waakh laabo. A uumacchoti wihi Waakh soouume tuumman.

¹⁵Wihi atin yeessaan tuumman a garda. Wihi atin yeessaan ka atin kuleel menye toro la khobo mee. Incheenka atin a khobo ommos a kuleel.

¹⁶Maantaka atin a tangiigo, kuleel menye khobo la mee gone, afeey ka a atin sootufa.

¹⁷Atin, ‘Nah a kamurre, hoolahi buurenye khabna, walah nah kaankhan mele!’ elattaan. Iꞌdaasenyi atin waha ma kasin, atin rumanka a marahtahiine, a ꞌdooꞌdi liisonaho, a miskiine, a ꞌdooꞌdi indo laa, a murukh.

¹⁸Wihi an atin kawaanicho ꞌdahabi ꞌdab ka lagube ki rummaat yitah ikagadda, ꞌdee kamurrowa. Gaaddi daddakhane atin gessattaan laka ikagadda, ꞌdee a atin loogoogo lakhaanyoti murukkhiin uus lasoobakkaahin. Ildawahi atin indo kawelweelattaane atin mujjum il agartaan laka ikagadda.

¹⁹ꞌDooꞌdi an ꞌdoono a leejaakha toro sirbi gessa. ꞌDeerka taba uurassiin tuumman ka ichoow walah tuumman ka tuum uskeel kasoonokhda.

²⁰An kalla! Ani min khariissa toolla, atin waha. Chiꞌ etoo hooyeey daage, min isoogesse, an a soogela, lammateenyo isleegolossanna.

²¹Eti tuummane sooricho, antohi ullaka komborteeyti antoot ikaleeorronti siicha, saggaas ani laka isooriche komborti antoot Aabbaheey ikaleeorronduu.

²²Eti dogo khabo wihi Rubeyti Waakh ururre Kiriisto idowto a daago giꞌde.”