Read rendile Bakkaahit 9 Bible Online

Bakkaahit 9 - rendile bible

Bakkaahit 9

¹Herti Waakhe channaatteet arabiche afuufte, anna bakkaaloo sereyta daayan ka harra kasoodihe arge. Waakh la bakkaalaas furoti afafhi ankhari dahane ieleelin siiche.

²Chirri us afafhi ankhari dahane ieleelin fure ka, uunkoo iꞌdi ki ꞌdabi weyti buurenye labolkicheenye weyti daayan ankhar goya kasoobahe. Uunka ankhara kasoobahe orrah ichoow hafar mugꞌdi kayeele.

³Gubaalle la uunkaas goya kasoobahte, harra isootabte. Waakh gubaalleta miigti iꞌdi ti arraarohi harreenye siiche.

⁴Geeyi harra ommos hoos laka agaameerina liidah. Iꞌdaasenyi eti tuummane sumatti Waakh miin ikakhabin sina kawaaricha iche liidah.

⁵Miigti icho weeli enenyet kayagiisiin ma lasiinne, iꞌdaasenyi miigti icho hay chan weeli enenyet kabolkhichaane lasiiche. Bolokkhicho a iꞌdi bolokkhi arraar.

⁶Maanassaas weeli enenyet omoot a yowta iꞌdaasenyi ma yamuut, omoot a imoona iꞌdaasenyi omoote icho a kafiridda.

⁷Gubaalleta faraꞌddi diho liitannabiche iyoogtahe. Matahenyeticho ka wohoo ꞌduubassi ꞌdahab iyooge khabaane, toro la foolassicho fooli enenyete iyoogyahiin.

⁸Tinticho a iꞌdi tinti deyyeho, ilkohicho la a iꞌdi ilkohi bahassi.

⁹Kachassicho ka wohoo iꞌdi birti lahageetenye kach lagessati iyooge khabaane, hooyi barbarreticho la iꞌdi riiriti garrunyeti ittaawenye faraꞌde diho ijiitto iyeedda.

¹⁰ꞌDubassicho la a iꞌdi ꞌdubassi arraare enenyet khaniino, ꞌdubassicho goyaka la miigti icho enenyet hay chan tuumman bolokh katusaane khabaan.

¹¹Karnaticho la a herti keleyenye ankhari dahane ieleelin anatti. Magahiche la afi Ibiraaniya ka Abadoon, iche layadeeh. Afi Giriig ka la, Abooliyon, iche layadeeh. Magahenyeta a mehe ya Kheeroocha.

¹²Sinati oraat a kutte, sina lamma addan a sooyomboossa.

¹³ꞌDeerka herti Waakhe lihnaatteet arabiche afuufte, ani la gaasohi affarenye koondihi gaꞌdaare ꞌdahab katoollo Waakh ortiis kijirto ka, hooyoo yeedo daage.

¹⁴Hooya la herti Waakhe lihnaatteete arab khabto leeyeede, wihi us iyidah, “Herti Waakhe affarenye hawti buurenye ꞌdusso Yuufereet layadeeh ka hidan soofur.”

¹⁵Herta Waakhe affarenye hili iche guꞌhaas ichoow haytaas ichoow maalinkaas ichoow sahaꞌddaas gesso liitannabiche la laꞌdiiche, ꞌdee weeli enenyet goonan seyyah goyaka goonankoo tagiis.

¹⁶An tiri iskarti faraꞌd fuusso a daage, iche la et ekkees yabuuꞌd mele, a miiliyon kud lamma.

¹⁷An fooltabcho ka faráꞌd ichoow ꞌdooꞌdi faráꞌd fuulo arge. ꞌDooꞌd gaꞌdaarretoo gugguuꞌddane iꞌdi ꞌdabe ichoow too daydaayan ichoow too derleyyeenye kach kakhaba. Matahenyeti faraꞌdeet la matahenyeti bahassi iyoogyahiine, ꞌdab ichoow uum ichoow jimbihilo la afassichooda kasoobahaan.

¹⁸Sinayyohaas seyyahcho, ꞌdaba ichoow uunka ichoow jimbihiloha afi faraꞌde kasoobaheene, ꞌdooꞌdi harra kijiro goonan seyyah goyaka goonankoo yigaaseen.

¹⁹Faraꞌdda miigticho aficho ichoow ꞌdubassichooda kijiraan. A mehe ꞌdubassicho a iꞌdi toofassi matahenyeti enenyet bolokh tusso khabto.

²⁰Weeli enenyete sooꞌhade sinayyoha ibakkin la uskeelicho ma kasoonokhan ba. Uliba ginnayyo ichoow iyookkoyyohi icho Waakh kayeessaan on wahtaan. Iyookkoyyoha ꞌdahab ichoow lahaag ichoow birtoo booran ichoow dagahe lakahaaggiche. Iyookkoyyoha la, indo ma khabaane, dogo ma khabaane, ma sohtaan la.

²¹Toro la ꞌdooꞌd ogoossi dubunuunu lagelo ommos moroyyohi liirti ommos ꞌdooꞌdi isidisanne isleeurꞌdo ommos hatto ma kasoonokhan.