Read romani Marko 16 Bible Online

Marko 16 - romani bible

Marko 16

¹Ai kana nakhlo Sabat, e Maria Magdalena, ai e Maria e dei le Iakovoski ai le Salomeski, chinde le parfumuria te zhan ai thon le parfumuria po le Jesusosko stato.

²Ai kana phuterdilo o dies o pervo dies le kurkosko, avile ka greposhevo kana wushtel o kham.

³Phenenas mashkar pende, "Kon spidela palpale o bax katar e wurota le greposhevosko amenge?"

⁴Ai kana dikhenas, dikhle ke o bax kai sas angla o greposhevo sas spidias palpale: sas o baro bax.

⁵Avile ando greposhevo, dikhle ek terno manush beshelas pe chachi rig, vuriardo ande ek lunzhi parni raxami, ai daraile.

⁶Phendia lenge, "Na daran. Tume roden O Jesus andai Nazareth, kai sas karfosardo po trushul; zhuvindisailo; nai katse: Dikh! O than kai sas.

⁷Numa zhan sigo, ai phenen leske disiplonge ai o Petri, ke wo zhal mai anglal tumendar ande Galilee: kotse si te dikhen les, sar phendias tumenge.

⁸Grebisaile te zhantar katar o greposhevo ande dar, izdraile ai chudisaile, won chi phende khanch kanikaske ke daranas.

⁹O Jesus zhuvindisailo anda martia kana phuterdilo o dies, o pervo dies le kurkosko. E Maria Magdalena sas iekto te dikhel les. O Jesus gonisardiasas avri anda late efta bengen.

¹⁰Geli ai phendia leske disiplonge, won nekezhinas ai rovenas.

¹¹Kana ashunde kai wo traiil, ai kai e Maria dikhlia les, won chi pachanaspe.

¹²Pala kodia, wo avilo sar aver manush kal dui anda lende kai zhanas po drom avrial anda foro.

¹³Gele ai phende le kolavrenge. Le kolaver chi pachanas.

¹⁴Pala kodia avilo ka le desh u iekenge sar xanas andek than, ai dino le trad, phendia lenge zurale vorbi ke chi pachanpe ai zurade lengo ilo, ke chi pachaie kodolen kai dikhle les pala o zhuvindimos.

¹⁵Ai phendia lenge, zhan pe sa e lumia, ai phenen e lashi viasta savorhenge.

¹⁶Kodo kai pachala ai avela boldo avela skepime; numa kado kai chi pachala avela kris pe leste.

¹⁷Ai kadala mirakluria zhana kodolensa kai pachanape. Ando murho anav gonina bengen; denas duma neve shibasa.

¹⁸Astaren le sapen; te won pen vari so kai mudarel o manush, chi mudarela len; thona le vas pe naswalen, ai avena saste.

¹⁹Pala O Jesus dias duma lenge, sas lino opre ando rhaio, ai beshlo po chacho vas le Devlesko.

²⁰Ai won geletar, ai dine duma po Del pe swako rig, ai O Del kerelas buchi lensa, O Del sikadias kai E Vorba le Devleski sas chachi pala le mirakluria kai kerdionas.