Read romani Luk 1 Bible Online

Luk 1 - romani bible

Luk 1

¹O Theophilus: But narodo zumade te ramon pa so kerdilia mashkar amende,

²ai won ramosarde so kerdilia sar sas amenge, kodola kai dikhle de anda gor, ai kai sas lenge phendo te phenen e vorba le Devleski.

³Ai akana me lem o gor mishto te zhanav so godi kerdilia de anda gor, miazilia mange mishto lasho te ramov tumenge pa kadala dieli kai sas.

⁴Me kerav kadia saxke tume te sai len po gor o chachimos kai sas tumenge phendo.

⁵Kana o Herod sas o amperato ande Judea, sas iek rashai kai bushol Zechariah, wo sas andal rasha kai busholas Abijah. Leski rhomni busholas Elizabeth, ai woi sas andai vitsa le rashaske kai busholas Aaron, o baro rashai.

⁶Won le dui zhene sas vorta angla Del, ai kerdia mishto sa le zakonuria ai sa le krisa le Devleski.

⁷Nas le glati ke e Elizabeth nashti avelas le glate, ai vi le dui zhene sas phure.

⁸Iek dies o Zechariah kerelas peski buchi le rashaski angla Del.

⁹Ke pala zakono le rashango, o Zacharias sas alosardia te zhal ande tampla te phabarelas e thumwiia pe altari.

¹⁰Sa o narodo rhugilaspe avri ka chaso kai phabarenas e Thumwiia.

¹¹Ek angelo le Devlesko antunchi sikadilo ka Zachariah, wo beshelas pe chachi rik kai sas o altari kai phabarenas e Thumwiia.

¹²Kana o Zechariah dikhlia o angelos, wo sas nekezhisailo ai darailo.

¹³Numa o angelo phendia leske, "Na dara o Zechariah! O Del ashundia cho rhugimos, ai Elizabeth, chi rhomni dela tu iek shav kai akharesa les Iovano.

¹⁴Ai tu avesa defial raduime, ai but narodo raduilape kana kerdiola!

¹⁵Ke baro manush avela anglal iakha Devleske, ai shoxar chi pela mol ai chi iek pimos kai si alkolsa. Avela pherdo le Swuntone Duxoske kana kerdiola.

¹⁶Anelas palpale buten andal Zhiduvuria ka lenge Del.

¹⁷Wo zhala mai anglal lestar le duxosa ai la putierasa le profetoske o Elijah te thon pale andek than le daden ai le shaven ai te anen palpale kodolen kai chi pachaie o mui ka goji le manushenge kai sas chache; wo lasharela narodos vorta angla Del."

¹⁸O Zechariah phenel le angeloske, "Sar te zhanav ke so phenes si chaches? Ke phuro sim ai vi murhi rhomni."

¹⁹Ai o angelo del les atweto, "Me sim o Gabriel, me beshav angla Del, vo tradia ma te dav tusa duma ai te anav tuke kadia lashi vorba.

²⁰Num chi pachaian murhe vorbi, kai savon avena pe kana avela e vriama. Anda kodia si te kerdios muto ai nashti desa duma zhi ka dies kai avela pe so phendem tuke."

²¹Ande kodia vriama le kolaver narodo azhukerenas o Zechariah, ai chudinaspe sostar beshel kadia but vriama kotse andre tampla.

²²Kana anklisto avri nashti delas lensa duma, ai o narodo aliardia ke O Del sikadiasas leske vari so ande tampla. Wo sikavelas lenge le vastensa numa nashti delas duma.

²³Kana o Zechariah getosardia peski vriama kai trobulas te podail ande tampla, gelo peste khere.

²⁴Xantsi vriama pala kodia e Elizabeth leski rhomni pharisas, ai garadile panzh shon ando kher.

²⁵Woi motholas ande peste, "Eta, so kerdia O Del mange, manglia te ankalavel ma akana so sas mange lazhav anglal manush!"

²⁶Ai ando shovto shon O Del tradia o angelo kai bushol Gabriel andek foro kai bushol Galilee ando Nazareth.

²⁷Kai iek shei bari kai trobulas te ansurilpe ieke manushesa kai bushol Josef, wo sas andai vitsa le amperatoski o David, o anav kodola zhuvliako kay sas shei bari busholas Maria.

²⁸O angelo gelo late khere ai phendia lake, "Pacha tuke, tu kai O Del andia mishtimos, O Del tusa."

²⁹E Maria daraili xantsi palal vorbia kai phendia lake, ai gindilas pa so phendia lake o angelo,

³⁰O angelo phendia lake, "Na dara, Maria, ke drago sanas le Devleske.

³¹Si te aves phari ai avela tu iek shav kai desa les o anav Jesus.

³²Baro avela ai akharena les O Shav le Devlesko kai si opre. O Del kerela anda leste amperato, sar sas o David, kodo kai sas mai anglal lestar.

³³Ai poronchila po narodo kai si ande Israel kai bushon zhiduvuria sagda, ai leski amperetsia shoxar chi getolpe!"

³⁴E Maria phendia le angeloske, "Sar sai kerdiola so mothos mange, ke shei bari sim?"

³⁵O angelo dia atweto, "O Swunto Duxo avela pe tute, ai e putiera le Devleski. Vusharela tu sar iek vushalin, anda kodia avela akhardo Swunto O Shav le Devlesko ek glata kai kerdiola.

³⁶Ai eta, Elizabeth chi vara, vi woi azhukerel iek shav. Marka ke si phuri, mothonas ke nashti avela glate, ai akana ka pesko shovto shon la.

³⁷Ke kanchi nai so O Del nashti kerel."

³⁸Antunchi Maria phendia, "Me sim e sluga Devleski, te avel mange sar tu phenes", ai o angelo gelotar.

³⁹Ande kodia vriama e Maria sigo gelitar karing le plaia andek gav kai sas ande Judea.

⁴⁰Geli ando kher ka Zechariah ai dia dies lasho kai Elizabeth.

⁴¹Kana Elizabeth ashundia so phendia lake e Maria, o glata mishtisailo ande late. Elizabeth pherdo sas le Swuntone Duxosa.

⁴²Ai tsipisardia zurales. "O Del swuntsosardia tu mai but ke sar sa le zhuvlia ai lesko swuntsomos beshel pe glata kai avela tu!

⁴³Kon si me, kai e dei murhi Devleski avel mande?

⁴⁴Ke dikhes kana ashundem ke dian ma dies lasho o glata mishtisailo raduimastar ande mande.

⁴⁵Tu raduime san kai pachaian tu so sas tuke phendo katar O Del ai kerdiola!"

⁴⁶E Maria phendia, "Murho ilo naisil o barimos le Devlesko;

⁴⁷Murho ilo pherdo raduimos lo pala Del murho skepitori.

⁴⁸O Del dikhlia pe mande, leski sluga kai nai kanch! Numa akana ai sagda sa o manush akharena ma raduime.

⁴⁹Ke O Del kai si les e putiera kerdia mange lasho dieli. Lesko anav si Swunto.

⁵⁰Sikavel leski mila sagda ka kodola kai daran lestar, katar e vitsa po vitsa.

⁵¹Kerdia bare dieli leske vastesa, le zuralesa lia pal manush le barimata kai sas le ande ilo.

⁵²Lia le amperaton anda penge amperetsia ai dia iek than kai si opre kal manush kai si lashe.

⁵³Wo dia but lashimos ka kodola kai sas bokhale, ai tradia palpale le barvalen le vastensa mange.

⁵⁴Wo garado leski vorba kai shinado sas ka le Zhidovon, ai avilo te zhutil leske naroduria le Zhidovon.

⁵⁵Chi busterdia te sikavel leski mila karing o Abraham ai kodola kai sas mai palal lestar sagda.

⁵⁶E Maria beshli peska varasa Elizabeth trin shon, porme gelitar peste khere.

⁵⁷Kana e vriama avili kai Elizabeth trobulas te avel la iek glata sas la iek shav.

⁵⁸O narodo kai beshelas pashai Elizabeth ai lake naimuria dine po gor ke O Del dias la kodo mishtimos, vi won raduisaile lasa.

⁵⁹Kana o tsinorho sas kurkesko avile te shinen kotor anda lesko boriko; ai mangenas te del anav peske dadesko Zechariah,

⁶⁰numa leski dei phendia, "Nichi, Iovano busholas." Numa phende lake,

⁶¹"Na khonik ande chi familia kai si les kado anav!"

⁶²Antunchi phushle le vastensa le dades, te zhanen sar mangel te akharel o shav.

⁶³O Zechariah manglia iek skafidi te ramol ai ramosardia, "Iovano busholas." ai savorhe chudisaile!

⁶⁴Strazo o Zechariah sai delas duma ai liape te naisil le Devles zurales.

⁶⁵Katar godi antunchi sa narodo kai beshelas pasha leste daraile, ai sa e viasta pa so kerdili geli kruglom karing le plaia ande Judea.

⁶⁶Kon godi ashunelas so kerdilia denas pe goji ai denas pe duma, so avela kodia glata e putiera le Devleski sas chaches lesa.

⁶⁷O Zechariah, o dat la glatako sas pherdo le Swuntone Duxosa, ai dia duma E Vorba le Devleski.

⁶⁸Luvudime te avel le Devles, O Del le Zhidovongo, ke andia te lia sama pe pesko narodo ai skepisardia les.

⁶⁹Dia ame iek putiera ai iek skepitori amenge kai sam andai vitsa le amperatoski o David leski sluga.

⁷⁰Kadia si kai phendias, de mult katar swuntso profeturia:

⁷¹Phendiasas te skepil ame katar amare duzhmaia; ai katar e putiera katar kodola kai sam lenge griatsa.

⁷²Inker sikavela peski mila amenge sar si kadia kodolenge kai sas mai anglal amendar, ai serela pe peski swinto vorba kai phendiasas te beshel amensa;

⁷³Ke O Del phendiasas le Abramoske kadala dieli kai sas mai anglal amendar.

⁷⁴Te ankalavel ame katar e putiera amare duzhmange, ai te podaisaras le Devles bi darako;

⁷⁵Te sai avas swintsi ai vorta angla Del, swako dies ande amaro traio.

⁷⁶Ai tu, murho tsinorho, avesa akhardo o profeto le Devlesko kai si opre, ke phiresa angla Del te lashares lesko drom;

⁷⁷Ai te sikaves leske narodoske ke skepila le kana iertila lenge bezexa.

⁷⁸Ke amaro Del lasholo, ai kerela te strefial pe amende iek vediara kai avel opral.

⁷⁹Te sikavel e vediara kodolenge kai si ando tuniariko ai kai si ande vushalin la martiake, te ingerel amare punrhe po drom la pachako."

⁸⁰Ai tsinorho bariolas ai o Swunto Duxo le Devlesko lel les zor ande leste. Wo beshlo ande pusta zhi ka dies kai sikadilo kal Zhiduvuria.