Read romani Luk 14 Bible Online

Luk 14 - romani bible

Luk 14

¹Andek dies Savatone, O Jesus gelo ando kher ieke baresko le Farizeanonge te xal manrho po Sabato, ai kotse le manush lenas sama pe leste.

²Eta, ek manush kai o naswalimos kai sas les kerelas les te shuvliol, sas thodino angla Jesus.

³O Jesus mothol le ablakatonge ai le Farizeanonge, phenelas, "Si slobodo vai nichi te sastiarel pe Savatone?"

⁴Khonik chi phendia kanch. Antunchi O Jesus lunzhardia pesko vas pe kado manush ai sastiardia les, ai meklia les te zhaltar.

⁵Ai porme phendia lenge, "Savo anda tumende kai si les ek magari vai ek gurumli kai perela ande xaiin, chi skepila les strazo vi Savatone?"

⁶Ai khonik nashtisardia te del les atweto pa so phushlia le.

⁷Ai phendia ek paramichi le manushenge kai sas akharde, ke dikhelas kai rodenas le thana le anglune, phenelas,

⁸"Kana avesa akhardo vari kastar ka ek abiav, na tho tu ke pervo skamin, ke vari kon kai si mai baro tutar sai avela kai sas akhardo.

⁹Ai kodo kai akhardia tu ai wo ka abiav, avel te mothol tuke, "Me kotsan kakale manusheske;" No antunchi avela tuke mai lazhav te zhas te beshes mai palpale.

¹⁰Numa kana avesa akhardo, zha tho tu po skamin kai si ta palpale, kashke kodo kai akhardia tu avel ai mothol tuke, "Murho vortako, aida mai opre." No antunchi avela tuke mai pachiv angla kodola kai si kai e skafidi tusa.

¹¹Ke kon godi vazdelpe avela meklo tele; ai kon godi mekelape tele avela vazdino opre."

¹²Porme O Jesus phendia kodoleske kai akhardia les, "Kon des xabe mashkar o dies vai telairiat, na akhar che vortakon, vai che phralen, vai che naiamon, vai chi kodolen kai beshen pasha tute le barvalen; ke akharen tu vi von, ai pochinena tuke so kerdian tu lenge.

¹³Numa kana keres pachiv, akhar le choren, le bange, kodola kai nashti phiren, ai le korhen:

¹⁴Ai avela tuke raduimos, ke won nashtina te keren tuke so kerdian tu lenge; numa avela tuke pochindo katar O Del kana le manush le Devlakane wushtena andai martia."

¹⁵Iek anda kodola kai sas kai skafidi kana ashundia kadala paramichi phendia leske, "Raduime kodo kai xala manrho ande amperetsia le Devleski."

¹⁶O Jesus phendia leske, "Sas ek manush kai kerdia pachiv, ai akhardo but narodo.

¹⁷Ai tradia peski sluga te akharel len kai sas akharde kai pachiv, "Aidi, ke akana sa gata!"

¹⁸Numa savorhe phenen vari so ke chi mangle te aven. O pervo phendia leske, "Chindem ek kimpo, ai trobul te zhav ai dikhav les; iertisar ma."

¹⁹Ai kaver phendia, "Chindem panzh zhute gurumlia, ai zhav te zumav le; iertisar ma."

²⁰Ai kaver phendia, "Ansurisailem ek rhomni ai nashti avav."

²¹Kodia sluga gelo palpale, ai phendia sa kadala dieli ka lesko xazhainona. O xazhainona le kheresko xolailo ai phendia ka lesko sluga, "Zhas strazo pel droma ai vi pel vulitsi, ai anel le chorhe, ai le bange, ai le korhen, ai le bangole."

²²Ai kodia sluga phendia, "Gazda, kerdem so phendian, ai si mai than inker."

²³Ai o xazhainona phendia lesko sluga, "Zhas pel droma ai vurmi, ai akhares le kai pachiv, te avela pherdo murho kher.

²⁴Numa phenav tuke, "Khonik anda sa kodolen kai sas akaharde zumavena murho xamaske!"

²⁵But narodo zhanas lesa. Amboldesailo, ai phendia lenge,

²⁶"Te vari manush avel mande, ai chi gretsol lesko dat, ai leski dei, ai leski zhuvli, ai leske shave, ai leske phrala, ai leske pheia, e, ai vi lesko traio, wo nashti avela murho disiplo.

²⁷Ai kodo kai chi lel pesko trushul, ai avela pala mande, nashti avela murho disiplo."

²⁸"Savo anda tumende, kai mangel te vazdel kher, chi rodel mai anglal, sode si te arasel leske, ai te si les dosta te getol?

²⁹Daratar te lelape te kerel e buchi, nashti getola, ai savo godi dikhena pe leste asana lestar.

³⁰Ai phenena, "Kado manush liape te kerel kher ai nashtisardia te getol les."

³¹"Vai savo amperato, zhala te kerel marimos kolaver amperatosa? Chi aterdiola mai anglal te lel sama te dashtila desh mie manushensa, sai zhal te marelpe pe kuko kai avel pe leste bish mie manushensa?

³²Te na dashtila, wo tradela le manushen ka kolaver amperato kai si dur lestar, te mangel lestar e pacha.

³³Anda kodia, zhido iek anda tumende te na mukhela sa so godi si les, nashti avel murho disiplo.

³⁴"O lon si lasho, numa o lon te xasarela pesko skusno, sar kerena anda leste pale londo?

³⁵Chi avela lasho chi la phuviake, ai chi le gunoieske, shuda les avri. Savo kai si le khan te ashunel, ashunel!"