Read romani Luk 17 Bible Online

Luk 17 - romani bible

Luk 17

¹O Jesus phendia peske disiplonge, "Musai avel o zumaimos kai ingerel le manushen te peren ando bezex; numa nasul kodoleske kastar avel o zumaimos!

²Mai bini te avel ek baro bax phanglo ka peski kox kai te avel shudino ande bari maria, de sar te kerel iek anda kadala tsinorhe kai pachanpe ande mande te peren ando bezex.

³"Arakhen tume! Te kerela bezex cho phral, phen leske zurale vorbi; te keilpe ai boldela palpale, iertisar les.

⁴Te kerel bezex karing tute eftavar ande iek dies, ai eftavar avela tute, ai phenel, 'Keisailem anda so kerdem tuke.' Tu iertisar leske."

⁵Le Apostles phendia le Devleske, "De ame mai pachamos."

⁶Ai O Del phendia, "Te si tume pachamos sar iek sumuntsi garchitsaki, tu sai phenena kakala krenzhaki, 'Ankli avri andai phuv, ai tho tu ande maria!' ai kodia krenzha pachala tumaro mui."

⁷Savo anda tumende, kai si les ek sluga kai lasharel e phuv vai lel sama katar le bakre, phenela leske kana avela pal kimpuria. "Aidi sigo ai tho tu kai skafidi?"

⁸Vai chi phenela leske, "Lashar mange te xav, tho angla tute pishtiri ai podaisar ma zhi kai xav ai piiav; ai antunchi tu xasa ai pesa."

⁹Chi trobul te naisil le slugako anda so phendiasas leske te kerel, si vai nai?

¹⁰Vi tume, kana kerdian so godi sas phendo tumenge te keren, phenen, "Ame sam ferdi slugi; ame kerdiam ferdi so sas phendo amenge te keras."

¹¹O Jesus zhalas ando Jerusalem, ai nakhelas mashkar e Samaria ai Galilee.

¹²Sar zhalas andek gav, desh manush kai sas lepra avile karing Jesus numa dural sas;

¹³vazde pengo glaso, ai phende, "Jesus! Tu o Gazda! Av tuke mila anda amende!"

¹⁴Ai kana O Jesus dikhlia le, phendia lenge, "Zhan sikadion kal rasha," ai pa drom kai zhanas kal rasha sastile.

¹⁵Iek anda lende, kana dikhlia ke sastilo, boldiape palpale, ai naisilas le Devleske zurales,

¹⁶shudiape le mosa pe phuv kal punrhe le Jesusoske, ai naisisardia leske; kodo manush sas ek Samaritano.

¹⁷O Jesus phendia, "Sastile sas le desh. Kai le kolaver inia?

¹⁸Ferdi kako streino avilo palpale te naisil le Devles."

¹⁹Porme O Jesus phendia, "Wushti ai zhas: cho pachamos sastiardian tu."

²⁰Uni Farizeanuria phushle katar O Jesus kana avela e amperetsia le Devleski. O Jesus phendia lenge, "E amperetsia le Devleski chi avel te dikhen la le manush

²¹Khonik chi phenela, "Dikh! Katarlo!" vai "Kotelo!" Ke e amperetsia le Devleski mashkar tumende lo."

²²O Jesus phendia le disiplonge, "Avena uni diesa kana mangenas te dikhen iek andal diesa O Shav le Manushesko, numa chi dikhena les.

²³Uni phenena tumenge, "Dikh! Katar lo!" vai "Kote lo!" Na zhan pala lende.

²⁴Sar o rhunjito sikadiol ai strefial anda iek gor le cheresko zhando kolaver gor, kadia aven O Shav le Manushesko kana avela lesko dies.

²⁵Numa trobul mai anglal te chinuil but, te gonin les le manush.

²⁶"Sar sas ando dies kana sas o Noah, sakadia si te avel kana avela O Shav le Manushesko.

²⁷Le manush xanas, penas, ansurinas penge shaven zhi ka dies kai o Noah gelo ande pharaxodo, avilo baro pai, ai savorhe xasaile.

²⁸Sar sas ando dies kana sas o Lot; sakadia le manush xanas ai penas, chinenas ai bichinenas, bariarenas ai kerenas khera;

²⁹Numa o dies kai o Lot anklisto avri anda Sodom, iag ai Sulfer pelo anda cheri sar breshind, ai savorhe xasaile.

³⁰Sakadia avela kana O Shav le Manushesko sikadiola.

³¹"Ande kodo dies, kodo kai si opral pesko kheresko, ai si les leske dieli ando kher, nashti hulela tele te les le; ai kuko kai si ando kimpo (niva), nashti zhal palpale ka pesko kher.

³²Den tume goji kai zhuvli le manushesko kai busholas Lot.

³³"Kodo kai rodela te skepil pesko traio xasarela les; ai kodo kai xasarela pesko traio skepila les.

³⁴Phenav tumenge, kodia riat dui manush sovena ande iek pato; iek avela lino, ai iek ashela.

³⁵Dui zhuvlia licharena jiv andek than; iek avela lini, ai iek ashela.

³⁶Dui manush si te aven ande niva (kimpo); iek avel lino, ai iek ashela."

³⁷Ai le disipluria phushle les, "Kai kerdiola kadia diela, Devla?" O Jesus phendia, "Kai si ek mulo stato, kotse chidenape le ulruria."