Read romani Luk 20 Bible Online

Luk 20 - romani bible

Luk 20

¹Andek dies, kana O Jesus sas ande tampla sicharelas le narodos ai delas duma e lashi viasta, le bare rasha ai le Gramnoturia, ai le mai phure avile.

²Ai phende leske, "Phen amenge, katar si tu kadia putiera te keres so keres? Vai kon si kodo kai dia tu kadia putiera?"

³O Jesus phendia lenge, "Vi me akana phushav tumendar ek divano,

⁴o bolimos le Iovanosko katar sas, anda rhaio vai manushendar?"

⁵Ai dinepe duma mashkar pende, phenenas, "Te phenasa 'Anda rhaio,' wo phenela, ' Sostar chi pachaian les?'

⁶Numa te phenasa, 'Katar le manush,' sa o narodo shudela bax pe amende; ke o narodo zhanelas ke o Iovano sas ek profeto.

⁷No won phende, 'Chi zhanas katar avilo.'"

⁸Ai O Jesus phendia lenge, "Chi me chi phenav tumenge katar che putiera kerav so kerav."

⁹Porme O Jesus phendia le narodoske ek paramichi: "Iek manush thodia te bariol rez, ai meklia les kaver manush te len sama, ai gelotar andek dur them but vriama.

¹⁰Kana avili e vriama te chidelpe o struguro, wo tradia ieke sluga karing le kolaver manush te lel lendar so trobul te avel lesko. Numa le manush kai chidenas o struguro marde les, ai trade les palpale bi kanchesko.

¹¹Kodo manush mai tradia ieka sluga; ai pale marde les, chinuisarde les, ai trade les bi kanchesko.

¹²Numa kodo manush mai tradia mai ieka sluga, (o trito) ai won dukhade les, ai gonisarde les.

¹³Antunchi o gazda la rezako phendia, "So te kerav? Tradav murhe shaves kai si mange drago; amborim lena pe pala leste!"

¹⁴Numa kana le manush kai chidenas o struguro dikhle les, denas pe duma mashkar pende, "Kodo si o shav le gazdasko, mudaras les, ai e phuv ashela amenge!"

¹⁵Ai gonisarde les dur katar e rez, ai mudarde les. "Akana, so kerel lenge o gazda la rezako?" "Avela ai mudarela kodole manushen, ai dela e rez kal kolaver."

¹⁶Kana o narodo ashundia kodia, phendia, "Kasavatar diela nashti kerdiol!"

¹⁷O Jesus dikhlia pe lende, ai phendia, "So znachil kado ramomos? O bax kai shude kukula, saikfielo bax sas o bax kai trobulsarde."

¹⁸Kon godi perela pe kodo bax avela phaglo; ai kuko kai perela o bax wo avela lichardo."

¹⁹Le bare rasha ai le Gramnoturia dinepe duma sar te astaren les; ai won daranas anda le manushenge, ke won haliarde ke O Jesus lenge phendia kodia paramichi.

²⁰Ai won lenas sama les, ai trade manushen te dikhen so kerel, kerenaspe sar chache manush, saxke te astaren les ande lesko divano, saxke te den les ka guvernori (kai si les e putiera te kerel sa wo mangel).

²¹Kodala manush phushle les, "Gazda, zhanas so phenes ai sichares si vorta, ai zhanas ke chi respektis iek manush mai but sar kaver, numa sichares o zakono le Devlesko chachimasa.

²²Phen amenge, si amenge slobodo vai nai te pochinas taksa ka Caesar?"

²³Numa O Jesus haliardia lenge nasul ginduria, ai phendia lenge, "Sostar tume zumaven ma?"

²⁴Sikaven mange ek kotor rupone, "Kaske fatsa ai ramomos si kado?"

²⁵Won phende, "O Caesar." O Jesus phendia lenge, "Den ka Caesar so si lesko, ai den ka Del so si le Devlesko."

²⁶Nashti thode leske dosh pe kado divano angla narodo; numa chudisaile andal atweto kai dia le, ai chi mai phende kanch.

²⁷Uni Saduseanuria avile ka Jesus, ke mothonas ke nai traio pala e martia; ai phushle,

²⁸"Gazda, o Moses ramosardia o zakono amenge; "Te merela vari kasko phral, ai si les ek rhomni, ai nas les glate, lesko phral ansurilape leska rhomniasa, ai vazdel familia leske phraleske."

²⁹Sas efta phral: o pervo ansurisailo, ai mulo bi te avel les glate, meklia rhomnia peske phraleske.

³⁰Sakadia o duito,

³¹ai o trito, sakadia kerdilia vi le efta phralensa. Mule vi te aven le glate.

³²Akana vi e zhuvli muli.

³³Kana avela te zhuvindin le mule te zhan ando rhaio, saveski andal efta phral avela e rhomni ke savorhenge sas?"

³⁴O Jesus phendia lenge, "Le mursh ai le zhuvlia la lumiake akana ansurinpe;

³⁵Numa le mursh ai le zhuvlia kai sai zhuvindin andai martia ka traio ai te traiin ande kolaver lumia chi mai ansurinpe.

³⁶Nashti mai meren; ke won avena sar le angeluria ai chi meren, ai avena shaves le Devleske, ke zhuvindisar le andai martia.

³⁷Ai o Moses sikadia kai le mule zhuvindinas ka traio. Ande Vorba le Devleski kai mothol pai krenzha kai zhalas e iag, kana wo akharel les "O Del le Abrahamosko, O Del le Isakosko, ai O Del le Iakovosko."

³⁸Ke wo nai O Del le mulengo, numa le zhuvindengo; savorhe traiin leske."

³⁹Uni andal Gramnoturia phende, "Gazda, mishto dia duma."

⁴⁰Ai chi mai tromanas te mai phushen les kanch.

⁴¹O Jesus phendia lenge, "Sar mothon ke O Kristo si Shav le Davidosko?

⁴²Ke o David phendia ande Vorba le Devleski (Psalms), "O Del phendia murhe Devleske: Besh tele pa murhi chachi rik,

⁴³zhi kai kerav anda che duzhmaia iek than te hodinis che punrhe pa lende."

⁴⁴O David akhardia les Devla, sar sai avel vo lesko shav?"

⁴⁵Sar sa o narodo ashunelas leste, O Jesus phendia peske disiplonge.

⁴⁶Arakhen tume katar le Gramnoturia, kai si lenge drago te phiravenpe andel rhochi lunzhe, ai den le manush lasho dies pel droma, ai roden la mai lashe skamina ande synagogue, ai drago lenge te beshen ka shero la skafidiako kal pachiva.

⁴⁷Ke tume xan le phivliange khera, ai rhugin tume lungo rhugimos te miazol ke lashe san: anda kodia si te perel mai phari kris pe tumende."