Read romani Luk 21 Bible Online

Luk 21 - romani bible

Luk 21

¹O Jesus vazdia le iakha, ai dikhlia le barvale manushen thonas penge love ande gono ande tampla.

²Ai vi dikhlia ek chorhi phivli sar tholas dui xarkune kotora.

³Ai phendia, "Phenav tumenge chachimasa, kacha chorhi phivli thodia mai but de sar savorhe;

⁴Ke le barvale thode xantsi love anda lengo barvalimos; numa woi thodia so godi sas la te traiil.

⁵Uni zhene denas duma pal tampla, sar shukarenas o tampla le lashe baxensa ai podarki kai dine ka Del, O Jesus phendia lenge,

⁶"Sa so dikhena avela pherdo, chi ashela iek bax po kaver." Won phushen lestar,

⁷"Gazda, kana kerdiola kodia? Che semno avela kana kerdiona kodola?"

⁸O Jesus phendia, "Arakhen tume, te na atsaven tume khonik, ke but avena ande murho anav, phenenas, "Me sim o Kristo!" E vriama pashili, na len tume pala lende.

⁹Kana ashunena ke marenpe ai vieste kai marenpe ande uni thana, Na Daran; ke kodia musai te kerdiol, numa nai inker o gor.

¹⁰Antunchi O Jesus phendia lenge, "Iek them marelape aver themesa; ai iek amperetsia marelape avria amperetsiasa:

¹¹Ai izdrala e phuv zurales, ai ande but thana chi avela dosta te xan, ai avela but naswalimos, ai kerdionape zhungale bucha kai chi mai dichilia, ai avela bare semnuria ando cheri.

¹²Numa mai anglal sar kodola dieli, lena tume le manush ai chinuina tume, dena tume kal synagoguria, thona tume andel temnitsi, angerena tume anglal la amperatsi ai le bare le foroske pala murho anav.

¹³Kodola kerdiona tumenge saxke te aven marturia.

¹⁴Na gindin tume mai anglal so te phenen, ai na daran.

¹⁵Ke dava tume le vorbi ai e goji, kai tumare duzhmaia nashti den ando gor vai te mothon ke nai kadia.

¹⁶Vi tumaro dat ai tumari dei purhila tume, ai tumare phral, ai tumare niamuria, ai tumare vortacha; ai mudaren buten anda tumende.

¹⁷Avena gratsia savorhenge pala murho anav.

¹⁸Numa chi xasavola chi iek bal anda tumaro shero.

¹⁹Ai kai inkerena zhando gor tume skepina tumaro traio le Devlesa.

²⁰Kana dikhena ke le thema chidenape te marenpe pe Jerusalem, antunchi zhanen ke Jerusalem sigo avela peradi.

²¹Antunchi kodola kai si ande Judea trobula te nashen andel plaia; ai kodola kai si mashkaral ande Jerusalem trobula te zhantar; ai kodola kai si ande niva te na aven andel foruria.

²²Ke kodola diesa avena diesa chorhe, ai te kerdiol so godi sas ramome.

²³Nasul le zhuvliange kai si pharia glatasa, ai kodolen kai si le glate pe chuchi ande kodola dies! Ai avela baro nekazo ando them, ai xoli pe kado narodo.

²⁴Le manush avena mudarde katar e sabia, ai aver avena line ai thode ande temnitsa mashkar sa le thema; ai le manush kai Nai Zhiduvuria phiren le punrhensa pai Jerusalem, zhi kai getolpe lenge vriama.

²⁵"Kerdiola semnuria ando kham, ai ando shunuto, ai andal chererhaia; ai pe phuv avela dar mashkar le thema, kai chi mai zhanena so te keren. E maria ai le talazuria keren bunto;

²⁶le manush merena daratar ke zhanena so kerdiola pe phuv; ke e putiera le chereski izdrala.

²⁷Antunchi dikhena sar O Shav le Manushesko avela pel nuveria putierasa ai barimasa.

²⁸Kana kadala dieli nachinaina te kerdiol, antunchi dikhen opre, ai vazden tumaro shero, ke tumaro skepimos pashelo."

²⁹O Jesus phendia lenge ek paramichi, "Dikhen e pruing le figengi, ai sa le khash;

³⁰sar barion ai anklen patria, tume dikhen ai zhanen ke o milai pashelo.

³¹Sakadia, kana dikhena kadala dieli ke kerdion, zhanen ke e amperetsia le Devleski pashela.

³²Chachimasa, phenav tumenge, kadia vitsa chi nakhela zhi pon chi kerdion kadala dieli.

³³O cheri ai e lumia nakhena, numa murhe vorbi shoxar chi nakhena.

³⁴Arakhen tume! Na meken tumaro ilo te pherdiol pachiva ai mol, ai nekazo kadale traiosko, ai kodo dies avela pe tumende kana chi zhanen.

³⁵Ke kodo dies avela sar iek selia pe sa kodola kai beshen pe sa e lumia.

³⁶Arakhen tume! Ai rhugin tume sagda, saxke te avel tume zor te na kerdiol tumenge sa kadala dieli, ai te beshen ande punrhende angla Shav le Manushesko."

³⁷E diese O Jesus sicharelas ande tamplo; ai e riat zhalas te beshel pe plaiin kai busholas Masleni.

³⁸Ai sa o narodo diminiatsi avile leste ande tampla te ashunen leste.