Read romani Luk 24 Bible Online

Luk 24 - romani bible

Luk 24

¹Kana phuterdilo o dies po pervo dies le kurkoske, avile ka greposhevo te angeren le vuloia ai duxuria kai lasharde sas.

²Numa dikhle e bax spidias palpale katar o greposhevo.

³Gele andre, numa chi arakhle o stato le Devlesko, Jesus.

⁴Sar chi zhanenas so kerdilia, dikhle dui manushen pasha lende kai sas vuriarde andel tsalia kai strefianas;

⁵Daraile, shudepe tele le mosa pe phuv, le manush phende lenge, "Sostar roden mashkar le mule kodoles kai si zhuvindo?

⁶Nai katse, numa wushtilo! Seren tume sar delas duma tumensa kana sas tumensa inker ande Galilee, phenelas,

⁷"O Shav le Manushesko te avel dino andel vas le bezexalenge, ai avela karfosardo po trushul, ai te zhuvindila o trito dies."

⁸Ai won dinepe goji leske vorbi,

⁹ai avile palpale khere katar o greposhevo, ai phende sa kodola dieli le desh u iek disiplonge, ai le kolavrenge.

¹⁰Kodia kai phendia kodola dieli le slugenge sas e Maria Magdalena, ai e Ioanna, ai e Maria e dei le Iakovoske, ai le kolaver zhuvlia kai sas lensa.

¹¹Numa le disipluria gindinas ke so mothonas kodala zhuvlia nai chaches, ai chi pachaiele.

¹²Antunchi o Petri wushtilo opre ai nashlo ka greposhevo; bandilo tele, ai dikhlia ferdi le tsoluria, ai gelotar khere, ai chudisailo anda so kerdilia.

¹³Eta, sa kodo dies dui anda lende gele ande gav kai busholas Emmaus, kai sas desh u iek kilometeria vai efta maili anda Jerusalem,

¹⁴ai phenenas mashkar pende pa so godi kerdilia.

¹⁵Sar denas duma, O Jesus pashilo pasha lende, ai phirelas lensa.

¹⁶Numa lenge iakha nashti te dikhenas ke wo si.

¹⁷Ai phendia lenge, "Pa soste divinin ando tumaro phirimos nekazosa?"

¹⁸Iek anda lende, kai busholas Cleopas, phendia leske, "Tu san ek streino ando Jerusalem, ai chi zhanes so kerdilia kadala dies."

¹⁹Ai O Jesus phendia lenge, "So kerdilia?" Ai won phende leske, "Pa Jesus anda Nazareth, kai sas iek profeto, kai sas les bari putiera kana kerelas peske bucha, ai kana divinilas angla Del ai sa le manushenge;

²⁰Ai sar amare bare kai poronchin dine les te den les kris, te karfon les po trushul.

²¹Ame gindisas ke wo sas kai sas te skepil o Israel; numa sa kadale dielensa, adies si o trito dies kai kadala dieli kerdile.

²²Ai uni zhuvlia ande amare chudisarde amen, chaches ke won gele diminiatsi ka greposhevo;

²³Numa chi arakhle lesko stato, avile te phenen amenge, ke angeluria sikadile lenge, ai phende lenge ke zhuvindolo.

²⁴Uni kai sas amensa gele ka greposhevo, ai arakhle le dieli sar phende sas kodola zhuvlia; numa chi dikhle le Jesusos."

²⁵Antunchi O Jesus phendia lenge, "Tume prosto manush. Ai kai o ilo lungo lo te pachal so godi phende le profeturia.

²⁶Pate chi trobulas O Kristo te chinuil kadia, ai te zhal ande pesko barimos?"

²⁷Porme phendia lenge so sas phendo pa leste ande Vorba le Devleski, de katar o Moses zhi ka sa le profeturia.

²⁸Kana aresle pasha gav kai zhanas; O Jesus kerdia sar ke mangelas te zhal mai dur.

²⁹Numa phende leske, "Besh amensa; ke perel e riat, ai o dies tsigniol." Ai gelo te beshel lensa.

³⁰Sar sas lensa kai skafidi, lia o manrho, ai kana rhugisailo, phaglia o manrho, ai dia le.

³¹Antunchi lenge iakha phuterdile, ai prinzharde les; numa strazo bilailo.

³²Ai denaspe duma won de won, "Nas sar iek iag kai phabolas anda amaro ilo; kana delas duma amensa pa drom, ai kana phenelas amenge pai Vorba le Devleski?"

³³Wushtilo opre strazo, ai gele palpale ande Jerusalem, ai arakhle le kolaver desh u iek disipluria chidine andek than, ai le kolaver kai sas lensa.

³⁴Phenenas, "Chaches O Del zhuvindisailo, ai sikadilo le Simonoske."

³⁵Ai phenenas so kerdilia lensa pa drom, ai sar prinzharde les kana phagelas o manrho.

³⁶Sar denas duma, O Jesus avilo mashkar lende, ai phendia lenge, "E pacha te avel tumensa,"

³⁷Won daraile ai pherde dar sas, won gindinas ke dikhle ieke duxos,

³⁸ai wo phendia lenge, "Sostar daran? Ai sostar kasavendar ginduria si tume ande tumaro ile?

³⁹Dikhen murhe vas ai murhe punrhe, me sim, azban ma, ai dikhen! Ke o duxo nai les, chi morchi ai chi kokola, sar dikhen tume ke si man."

⁴⁰Sar phenelas kodo divano, sikadia lenge peske vas ai peske punrhe.

⁴¹Ande pengo raduimos inker chi pachanas, ai chudinaspe, ai wo phendia lenge, "Si tume vari so te xav?"

⁴²Won dine les masho peko, ai avjin.

⁴³Lia ai xalia angla lende.

⁴⁴Ai phendia lenge, "Kadala dieli kai phenavas tumenge, kana simas inker tumensa kai trobulas te kerdiol, so godi si ramome pa mande anda zakono le Mosesosko, ai andel le profetonge, ai andel Psalms."

⁴⁵Antunchi phuterdia lengo ilo te sai haliaren E Vorba le Devleski.

⁴⁶Ai phendia lenge, "Kadia si ramome, ke O Kristo chinuila, ai zhuvindila andai martia o trito dies;

⁴⁷Ai ke o keimos ai o iertimos le bezexxengo avela phendo ande lesko anav sa le themenge, mai anglal ande Jerusalem.

⁴⁸Tume san marturia pe kadala dieli.

⁴⁹Ashun! Tradava pe tumende so murho Dat shinadia, numa tume beshen ando foro Jerusalem,zhi kai aven pherde putiera kai avel katar opral."

⁵⁰Angerdia le karing e Bethani; ai vazdia le vas, ai swuntsosardia le.

⁵¹Ande kodia, kai swuntholas le, durilo lendar, ai gelotar ando rho.

⁵²Won rhugisaile leste, ai geletar palpale ande Jerusalem bare raduimasa;

⁵³Ai sagda sas ande tampla, bariarenas o anav le Devlesko ai swunthonas le Devles. Amen