Read romani Yovano 1 Bible Online

Yovano 1 - romani bible

Yovano 1

¹Anda gor sas E Vorba, ai E Vorba sas le Devlesa, ai E Vorba sas O Del.

²Wo anda gor sas le Devlesa.

³Wo kerdia swako fielo, ai kanchi so kerdilo nas kerdo bi leste.

⁴Ande leste sas o traio, ai o traio sas e vediara le manushenge.

⁵E vediara strefial ando tuniariko, ai o tuniariko shoxar chi mudardia e vediara.

⁶Sas iek manush tradino katar O Del, lesko anav sas Iovano.

⁷Avilo o Iovano te phenel le manushenge pai vediara. Kashke savorhe te pachanape pala leste.

⁸O Iovano nas e vediara, numa wo sas tradino te phenel pai vediara.

⁹Kadia chachi vediara avel ande lumia te del vediara ka swako manush kai avela ande lumia.

¹⁰Wo sas ande lumia, ai e lumia sas kerdi pala leste numa e lumia chi zhanglia les.

¹¹Wo avilo ka peske, ai leske chi premisarde les.

¹²Uni premisarde les ai pachaiepe ande leste; wo dia len e putiera te aven shave Devleske.

¹³Kodola kai arakhadile, na anda rat, chi andai voia le statoski, chi andai voia le manusheski, numa katar O Del.

¹⁴Ai E Vorba kerdile stato ai beshelas mashkar amende. Ame dikhliam lesko barimos, pherdo mishtimasa ai chachimasa, kadia sas o barimos le ieke Shavesko kai avilo katar O Dat.

¹⁵O Iovano phendia pa leste, phenelas, "Kado si kai phendem, 'Wo avela pala mande, numa wo si mai baro mandar, ke wo sas mai anglal arakhadilem.'"

¹⁶Ai ame savorhe liam anda lesko baro lashimos. Mishtimos pe mishtimos.

¹⁷Ke o zakono sas dino katar o Moses, numa o mishtimos ai o chachimos avilo katar O Jesus Kristo.

¹⁸Khonik shoxar chi dikhlia le Devles, ferdi o iek Shav kai si le Dadesa, ai wo si kai kerdia te zhanas les.

¹⁹Ai kodia si o ramomos le Iovanosko, le Zhiduvuria trade le bare rasha ai le Levituria andai Jerusalem te phushen les,

²⁰"Tu kon san?" Ai wo phendias lenge ai chi garadia kanch, phenelas, "Chi sim O Kristo."

²¹Ai won phushen les, "Kon san tu, Tu san o Elijah?" ai wo phendia, "Chi sim!" Antunchi won phushle, "Tu san o profeto?" ai wo phendia, "Nichi."

²²Porme phende leske, "Kon san tu? Te das atweto kodolenge kai tradine ame. So phenes pa tute, kon san?"

²³O Iovano phendia, "Me sim o glaso kodoleske kai tsipil ande pusta, "Vorton o drom le Devlesko" sar phendia o Isaiah o profeto."

²⁴Won kai sas tradine, sas anda le Farizeanuria.

²⁵Ai mai phushle les, phenenas, "Antunchi, sostar boles te chi san e Messiah vai chi o Elijah, vai chi o profeto?"

²⁶O Iovano dia le atweto, phenelas "Me bolav ando pai, numa mashkar tumende, si vari kon kai chi zhanen.

²⁷Wo si kai avela pala mande, chi sim dosta lasho te phutrav le doria leske papuchenge."

²⁸Kadala dieli kerdionas ando Bethany inchal o Jordan, kai o Iovano bolelas.

²⁹Pe terharin o Iovano dikhlia O Jesus sar avelas leste, ai phendia, Dikh! O Bakriorho le Devlesko, kai lel e bezex le lumiako!

³⁰Pa kado si kai phendem, "Pala mande avel iek manush kai si mai baro mandar, ke wo sas mai anglal mandar."

³¹Me chi zhanavas les; numa avilem te bolav le paiesa, kashke sai Israel te zhanel les."

³²Porme o Iovano phendia, "Dikhlem O Swunto Duxo sar hulelas anda cheri sar iek gulumbo, ai beshlo pe leste.

³³Ai chi zhanavas les, numa kodo kai tradia ma te bolav ando pai, phendia mange, "Pe kodo kai dikhesa O Swunto Duxo te hulela, ai te beshela pe leste, kodo si kai bolel le Swuntone Duxosa."

³⁴Ai dikhlem, ai phenav tumenge ke wo si O Shav le Devlesko."

³⁵Pe terharin o Iovano mai sas pe kodo than duiensa anda leske disipluria.

³⁶Kana dikhlias O Jesus nakhelas, wo phendia, "Katse si O Bakrorho le Devlesko!"

³⁷Le dui disipluria ashunenas le vorbi kai phendia, ai linepe pala Jesus.

³⁸Porme O Jesus boldinisailo ai dikhlia ke avenas pala leste, ai phushlia len, "So roden?" Ai won dine atweto, "Xazhainona, kai beshes?" (xazhainono znachil o manush kai sicharel).

³⁹Phendia lenge, "Aven ai dikhen." Won avile ai dikhle kai beshelas, beshlo lesa kodo dies. Kodo sas pala miazutso karing le shtar chasuria.

⁴⁰O Andre, phral le Simonosko Petri, sas iek andal dui manush kai ashundia so phendia o Iovano, ai liape pala Jesus.

⁴¹Strazo o Andre arakhlia peske phrales o Simon, ai phendia leske, "Arakhliam e Messiah,," (E vorba znachil "Kristo.")

⁴²Ai o Andre angerdia o Simon karing O Jesus. Kana O Jesus dikhlia pe leste, phendia, "Tu san o Simon o shav le Iovanosko, te aves akhardo Cephas." O anav Cephas znachil Petri vai bax.

⁴³Pe terharin O Jesus manglia te zhal ando them kai busholas Galilee. Wo arakhlia le Filipos, ai phendia leske, "Le tu pala mande." '

⁴⁴O Filip sas anda foro, kai busholas Bethsaida, o foro kai beshle o Andre ai o Petri.

⁴⁵O Filip arakhlia le Nathanael ai phendia leske, "Arakhliam kodoles kai o Moses ai le profeturia ramosarde ande klishka le zakonosko, wo si O Jesus andai Nazareth, o shav le Josefosko."

⁴⁶O Nathanael phendia leske, "Sai avel anda Nazareth vari so lasho?" O Filip phendia leske, "Aidi ai Dikh."

⁴⁷O Jesus dikhlia o Nathanael avelas leste, ai phenel pa leste, "Dikh! Iek chacho Zhidovo. Nai chi iek atsaimos ande leste!"

⁴⁸O Nathanael phendia leske, "Katar zhanes ma tu?" O Jesus phendia leske, "Mai anglal o Filip akhardia tu, kana sanas telal pruing le figenge, Me dikhlem tu."

⁴⁹Porme o Nathanael phendia leske, "Gazda, tu san O Shav le Devlesko. Tu san O Amperato le Zhidovongo."

⁵⁰O Jesus phendia leske, "Anda kodia ke phendem tuke, "Dikhlem tu telai pruing le figenge, tu pachas? Numa dikhesa mai bare dieli sar kadala."

⁵¹Phenel leske, Chachimasa, chachimasa, phenav tumenge chachimos, dikhena o cheri phuterdiol, ai le angeluria le Devleske anklen ai hulen tele po Shav le Manushesko.