Read romani Yovano 10 Bible Online

Yovano 10 - romani bible

Yovano 10

¹"Phenav tumenge o chachimos, kodo kai chi del pa wudar ande shtala le bakriangi, numa kai anklel pa kaver rig, si ek chor ai nasul manush.

²Numa kodo kai avel pa wudar si o pastuxo le bakriango.

³Phutren o wudar angla leste, ai le bakria ashunen lesko glaso, ai akharel leske bakrorhen pa anaveste, ai ingerel le avri.

⁴Kana ankaladia avri sa peske bakrorhan, phirel angla lende, ai le bakriorha zhan pala leste, ke prinzharen lesko glaso.

⁵Chi zhana pala iek streino; numa nashena dur lestar, ke chi prinzharena o glaso le streinosko."

⁶O Jesus phendia lenge kadia paramichi, numa chi haliarde pa soste delas duma.

⁷O Jesus mai phendia lenge, "Phenav tumenge o chachimos, me sim o wudar le bakriango.

⁸Sa le kaver kai avile mai anglal mandar si chor ai nasul manush, numa le bakrorha chi ashunde lenge.

⁹Me sim o wudar. Kon avela andre mandar, avela skepime; dela andre ai anklela avri, ai arakhela ek kimpo kai si char (arakhel xabe).

¹⁰O chor avel ferdi te chorel, te mudarel, ai te pharhavel; me avilem te avel le manushen o traio, ai te avel len but traio ando mishtimos.

¹¹"Me sim o lasho pastuxo. O lasho pastuxo del pesko traio pala peske bakriorha.

¹²O buchari (o manush pochindo) kai nai o pastuxo, ai nai leske le bakriorha, nashel kana dikhel ke avel o ruv, ai o ruv lel len ai rhespil len.

¹³Wo nashel ke si o buchari kai si pochindo, ai chi lel sama andal bakriorha.

¹⁴Me sim o lasho pastuxo. Zhanav murhe bakrorhan, ai won zhanen man.

¹⁵Sar O Dat zhanel man, ai me zhanav le Dades. Me zhanav murhe bakriorhan ai won zhanen man; ai me dav murho traio pala murhe bakriorha.

¹⁶Mai si ma aver bakriorha, kai nai ande kadia shtala; trobul te anav vi len, te phiravav len te ashunen murho glaso; ai avena iek fialo bakriorha, ai iek pastuxosa.

¹⁷"O Dat drago mange ke dav murho traio, te lav les aver data palpale.

¹⁸Khonik chi lel murho traio mandar, numa dav les me mandar. Si ma e putiera te dav les, ai si ma e putiera te lav les palpale. Kadia si o zakono kai dia ma O Dat."

¹⁹Anda kodia le Zhiduvuria chi haliarenas mashkar pende pala kadala vorbi, ke chi pachan iek fielo.

²⁰But anda lende phenenas, si le iek beng ande leste! Dzilo lo! Sostar ashunen leste?"

²¹Numa aver phenenas, "Iek manush kai si les beng ande leste nashti del duma kadia! Sar sai iek beng phutrel le iakha le korhenge?"

²²E vriama avili te keren O Dies O Baro le Zhidovongo ande Jerusalem; sas ivend.

²³Ai O Jesus phiravelaspe ande tampla ando kalidori le Solomonosko.

²⁴Le Zhiduvuria thodepe kolo lestar, ai phende leske, "Sode vriama zhi kana tu manges amen te zhanas? Phenes amenge o chachimos; "San tu O Kristo?"

²⁵O Jesus phendia lenge, "Mai phendem tumenge, numa chi pachan ma. Le buchia kai kerav ando o anav murho Dadesko, sikaven pa mande.

²⁶Numa tume chi pachan, ke tume chi san anda murhe bakria, sar phendem tumenge.

²⁷Murhe bakria ashunen murho glaso, ai zhanav le, ai aven pala mande.

²⁸Ai dav le o traio le rhaiosko; ai chi xasavona shoxar, ai khonik chi lena le anda murho vas.

²⁹Murho Dat kai dia le mange, wo mai baro lo savorhendar; ai khonik nashti lel le anda vas murhe Dadesko.

³⁰Me ai O Dat sam iek.

³¹Antunchi le Zhiduvuria mai line bax te shuden pe leste.

³²O Jesus phendia lenge, "Sikadem tumenge but lashe buchia kai avile katar murho Dat; anda savi buchi tume mangen te shuden bax pe mande?"

³³Le Zhiduvuria phende, phenenas, "Nai anda ek lashi buchi ke mangas te shudas bax pe tute, numa ke rimos le Devles, ai tu san ek manush ai keres anda tute Del!"

³⁴O Jesus phendia lenge, "Si ramome ande tumaro zakono, Me phendem, 'Tume san dela?'

³⁵Ai ame zhanas ke e vorba le Devleski si chachi sa data ai nashtil te thol la rigate; ai O Del akhardia le dela, kodolenge kai O Del dia peske vorba.

³⁶Ai man, O Dat alosardia ma ai tradia ma ande lumia. Sar, antunchi, sai phenen "Tu tromas te les o than le Devlesko," ke phendem, "Me sim O Shav le Devlesko?

³⁷Chi pachan ma, antunchi, te na kerava le buchia murhe Dadeske.

³⁸Numa te kerava le, makar tume chi pachan ma, pachan ma pala murhe buchia kai kerav, kaste te sai zhanen, ai pachan, ke O Dat si ande mande, ai me sim ando Dat."

³⁹Pe kadia mai zumade te len les; numa skepisailo anda lenge vas.

⁴⁰O Jesus mai gelo inchal o Jordan kotse kai o Iovano mai anglal ambolelas, ai beshlo kotse.

⁴¹But zhene avile leste ai phende, "O Iovano chi kerdia chi iek miraklo: numa so godi o Iovano phendia pa kado manush sas chacho."

⁴²Ai but pachaiepe ande leste kotse.