Read romani Yovano 12 Bible Online

Yovano 12 - romani bible

Yovano 12

¹Shov dies mai anglal O Dies O Baro le Zhidovongo, O Jesus areslo ande Bethany, kai beshlo o Lazarus, kai O Jesus zhuvindisardia les anda le mule.

²Kotse dine les te xan; e Martha podailas les; numa Lazarus sas iek anda kodala kai sas lesa ka e skafidi.

³E Maria lia dopash litre pherdi duxi kai si kuchi, thodia la pe le punrhe le Jesusoske, ai woi koslia leske punrhe peska balensa. Ai sa o kher pherdilo sunga katar e duxi.

⁴Iek anda leske disiplonge, o Judas Iscariot – kodo kai trobul te purhil les, phendia,

⁵"Sostar chi bichindian kadia duxi trin shela teliara, ai le love dine kal chorhe?"

⁶Wo phendia kadia lenge, na ke sas leske mila anda le chorhe, numa ke sas chor, ai sas les o gono, ai lelas so sas andre ando gono.

⁷Numa O Jesus phendia lenge, "Mek la! Woi garadiasas kadia duxi pala e vriama kana groposarena ma.

⁸Ke le chorhe sagda avena tumensa, numa me chi avava tumensa sagda."

⁹But narodo anda le Zhiduvuria ashunde ke O Jesus sas ande Bethany, ai avenas na ferdi pala O Jesus, numa vi te dikhen o Lazarus, kai O Jesus zhuvindisailo anda le mule.

¹⁰Le bare rasha dine pe duma te mudaren vi le Lazarusos,

¹¹ke but Zhiduvuria geletar lendar pala leste, ai pachanaspe ando Jesus.

¹²Terharin but narodo avile ka O Dies O Baro le Zhidovongo, kana ashunde ke O Jesus zhal ando Jerusalem.

¹³Line patria katar le krenzhi, ai gele angla leste, ai tsipinas, "Hosana! Raduime O Amperato le Zhidovongo kai avel ando anav le Devlesko!"

¹⁴O Jesus arakhlia iek magari ai beshlo pe leste, sar sas ramome,

¹⁵"Na dara, tu foro anda Zion! Dikh! Cho Amperato avel, beshel pe iek terno magari."

¹⁶Leske disipluria chi haliarde mai anglal kadala dieli; numa kana O Jesus lia pesko barimos, denas pe goji ke sas ramome pa leste, ai kerdilo sa so trobul te kerdiol.

¹⁷Sa kodala kai sas lesa kana akhardia o Lazarus anda o greposhevo, ai wushtiardia les anda le mule, phende so dikhle ai so kerdia.

¹⁸Ai o narodo avel angla leste, ke ashunde ke kerdia kodo miraklo.

¹⁹Le Farizeanuria phenenas iek kavreske, "Tume dikhen, ke chi nirin kanchi! Dikh! Sa e lumia geli pala leste!"

²⁰Uni Grekuria anda kodala kai gele ando Jerusalem te rhugin po Dies O Baro le Zhidovongo:

²¹Won avile ka Filip, wo sas anda Bethsaida ande Galilee, ai phende. "Raia, ame mangas te dikhas O Jesus."

²²O Philip gelo ai phendia o Andre, antunchi o Andre ai o Philip gele ai phende ka O Jesus.

²³O Jesus phendia lenge, "O chaso avilo kai O Shav le Manushesko trobul te luvudinles.

²⁴Phenav tumenge o chachimos: te na merela e sumuntsa kai peli ande e phuv ashel korkorho; numa te merela, dela but fruti.

²⁵Savo kai si leske drago kado traio xasarela les; ai kodo kai gretsol kado traio ande kadia lumia garavel les te zhal ando traio le rhaiosko.

²⁶Te si vari kon kai podail ma, mek te lelpe pala mande; ai kotse kai avava me, kotse avela vi murhi sluga; kodo kai podaila ma, murho Dat luvudila les.

²⁷"Akana murho duxo si buntuime. Ai so sai phenav? "Murho Dat, le ma anda kado chaso?" Numa pala kodia avilem zhi ka kado chaso.

²⁸"Murho Dat, luvudisar chiro anav!" Ai iek glaso dia duma anda o rhaio, phenelas, "Bariardem les, ai mai luvudiva les."

²⁹O narodo kai sas kotse, ashunde o glaso, ai uni phenenas, "Iek rhonjito si!" Aver phenenas, "Iek angelo dia lesa duma!"

³⁰Numa O Jesus phendia lenge, "Na ke pala mande kado glaso ashundilo, numa pala tumende.

³¹Akana avili e kris la lumiaki; akana o beng kai si ande lumia avela shudino avri.

³²Ai me, kana avava vazdino opre katar e phuv, tsirdava sa le manushen mande."

³³Sar del duma kadia, sikavelas lenge sar si te merel.

³⁴Le manush phende leske, "Ashundian andai klishka le zakonoske ke O Kristo beshela sa data." Sar sai phenes, "O Shav le Manushesko trobul te avel vazdino? Kon si kodo Shav le Manushesko?"

³⁵O Jesus phendia lenge, "E vediara si tumensa mai xantsi vriama. Phiren zhi kai si tumen e vediara, kashte te na avela o tuniariko pe tumende, ke kodo kai phirel ando tuniariko chi zhanel kai zhal.

³⁶Zhi kai si tume e vediara, pachan tume ande vediara, kashte te aven shave la vediarake." O Jesus phendia kadala dieli, gelotar, ai garadilo dur lendar.

³⁷Marka ke kerdia but mirakluria angla lende, chi pachanaspe ande leste,

³⁸Eta, te pherdiol e vorba le profetoski o Isaiah, kai phendiasas, "Devla, kon pachaiape ande so phendem? Ai kaske O Kristo sikadia peski putiera?"

³⁹Anda kodia won nashti pachanaspe, ke o Isaiah mai phendia,

⁴⁰"Korhandia lenge iakha, ai zulardia lenge ilo; te na dikhen penge iakhensa, ai te na haliaren penge ilesa, ai chi aven mande te aven skepime, ai te na sastiarav le."

⁴¹Isaiah phendia kadala dieli, kana dikhlia lesko barimos, ai dia duma pa leste.

⁴²Numa vi anda le bare le Zhidovongo pachaiepe ande leste; numa angla le Farizeanuria, chi sikavenas ke pachanpe, daratar ke den len avri anda e synagogue.

⁴³Ke mai drago lenge o chetaimos le manushenge de sar o luvudimos katar O Del.

⁴⁴O Jesus dia duma ando baro glaso, "Kodo kai pachal ande mande, pachalpe na ande mande ferdi, numa ande kodo kai tradia ma.

⁴⁵Ai kodo dikhel ma, dikhel kodales kai tradia ma.

⁴⁶Avilem ande lumia sar iek vediara, kashte kon godi pachalape ande mande te na beshel ando tuniariko.

⁴⁷Te si vari kon kai ashunel murhe vorbi, numa chi pachal le, chi krisiniv les, ke me chi avilem te krisiniv e lumia, numa te skepiv la lumia.

⁴⁸Kodo kai shudel ma, ai kai chi premil murhe vorbi si les iek kai krisinila les. E vorba kai phendem, woi dela les pe kris po paluno dies!

⁴⁹Ke chi den duma anda mande; numa O Dat kai tradia ma, phendia mange so trobul te phenav.

⁵⁰Ai zhanav ke anda leske vorbi si o traio le rhaiosko. Sa anda kodia le dieli kai phenav, phenav le sar O Dat phendia le mange."