Read romani Yovano 7 Bible Online

Yovano 7 - romani bible

Yovano 7

¹Pala kodia O Jesus phiradia ande Galilee; ke chi mangel te phirel ande Judea, ke le Zhiduvuria rodenas te mudaren les.

²Ai O Dies O Baro le Zhidovongo le Tabernacles pasholas.

³Leske phral phende leske, "Zhatar katse, ai zha ando Judea, kashte che disipluria te sai dikhen le mirakluria kai tu keres.

⁴Khonik chi garavel so kerel te mangel te sikadiol. Te keres kadalendar dieli, sikav tu ka sa la lumiake!"

⁵Ke chi leske chache phral chi pachanaspe ande leste.

⁶O Jesus phendia lenge, "Murhi vriama chi avili inker; numa tumari vriama sagda gata la.

⁷E lumia nashti gretsol tumen, numa gretsol man, ke phenav pa late, ke laki buchi so kerel si nasul.

⁸Zhantar tume ka Dies O Baro le Zhidovongo, me chi zhav ka kado Dies O Baro le Zhidovongo inker, ke murhi vriama chi avili inker.

⁹Wo phendia lenge kadala vorbi ai beshlo ando Galilee.

¹⁰Kana leske phral gele ka Dies O Baro le Zhidovongo, antunchi O Jesus gelo, vi wo numa na angle narodo, numa sar chordanes.

¹¹Le Zhiduvuria rodenas les ka O Dies O Baro le Zhidovongo. Ai phende, "Kai lo?"

¹²But manush denas duma pala leste ando narodo. Uni phende, "Wo si iek manush o lasho." Aver phenenas, "Nichi." Wo atsavel le manushen."

¹³Numa khonik chi delas duma pa leste angla manush, ke daranas katar le Zhiduvuria.

¹⁴Karing mashkar O Dies O Baro le Zhidovongo O Jesus gelo ande tampla, ai sicharelas.

¹⁵Le Zhiduvuria chudinaspe, ai phenenas, "Sar wo zhanel kadia but kana shoxar chi sichilo."

¹⁶O Jesus phenel lenge, "O sicharimos kai dav nai murho, numa avel katar O Del kai tradia ma.

¹⁷Te vari kon te kerel so mangel O Del, zhanela ke so sicharav avel katar O Del, vai te dava duma anda mande.

¹⁸Kon del duma pestar rodel pesko barimos: numa kodo kai rodel o barimos kodolesko kai tradia les, kodo si chacho, ai nai xoxaimos ande leste.

¹⁹O Moses dia tume o zakono? Numa khonik anda tumende chi keren o zakono. Sostar roden tume te mudaren ma?"

²⁰Le manush phende leske, "Tut si tu iek beng ande tute! Kon rodel te mudarel tu?""

²¹O Jesus phenel lenge, "Kerdem iek diela, ai savorhe chudisailian.

²²Ke o Moses dia tumen o zakono te shinen pe murshen (na ke avel katar o Moses, numa katar tumare phure), ai tume shinen ieke manushes po dies O Savatone.

²³Te sai shinen ieke manushes po dies O Savatone, te phagen o zakono le Mosesosko. Sostar xoliavon pe mande, ke sastiardem ieke manushes sa antrego po dies O Savatone?

²⁴Aterdion te keren kris pala so dikhen avrial po manush, aven vorta ai chache ande tumare kris kana keren la."

²⁵Uni manush anda o Jerusalem phende, "Pate nai kado o manush kai rodas te mudaras les?

²⁶Dikh! Del duma angla savorhenge, ai khonik chi phenel leske kanchi! Amborim ke le bare kai poronchin zhanen ke wo si O Kristo?

²⁷Numa kana O Kristo avela, khonik chi zhanela katar avel, numa ame zhanas katar avel kado manush."

²⁸Sar O Jesus sicharelas ande tampla, tsipisardia, "Tume zhanen ma, ai zhanen katar sim: ai chi avilem anda mande, numa kodo kai tradia ma wo si chacho, ai tume chi zhanen les.

²⁹Numa me zhanav les; ke avav lestar, ai wo tradia ma."

³⁰Antunchi rodenas sar te len les; numa khonik chi thode o vas pe leste, ke lesko chaso chi avilo inker.

³¹Numa but mashkar o narodo pachanaspe ande leste, ai phende, "Kana O Kristo avela, sai kerela mai but mirakluria sar kerdia kado?"

³²Le Farizeanuria ashunde ke o narodo mothon kodala dieli pa Jesus; ai le Farizeanuria ai le bare rasha trade penge zhandari te len les.

³³O Jesus phendia lenge, "Me beshav tumensa mai xantsi vriama, ai porme zhavtar karing kodo kai tradia ma.

³⁴Tume rodena ma, numa chi arakhena ma, ke nashti avena kai zhava."

³⁵Le Zhiduvuria phenen mashkar pende, "Kai wo zhala kai chi arakhasa les? Zhala karing le foruria kai si ande Gretsia, ai sicharel le Grekone?

³⁶So si kadala vorbi kai phendia, Tume rodena ma, numa chi arakhena ma, ke nashti aven kai me zhava. So znachil?"

³⁷O paluno Dies O Baro le Zhidovongo sas o mai baro, ai O Jesus beshelas ande punrhende ai tsipisardia, phenelas, "Te si vari kon trushalo, mek te avel mande, ai pel

³⁸"Kon pachalape ande mande, sar E Vorba le Devleski phenel, pai zhuvindo hulela anda lesko ilo."

³⁹O Jesus phendia pa Swunto Duxo, kodala kai pachanpe ande leste premina: ke O Swunto Duxo nai dino inker, ke O Jesus nas vazdino ando rhaio inker.

⁴⁰Kana but le manusheske ashunde leske vorbi, phenenas, "Chaches, kado manush si o profeto."

⁴¹Aver phende, "Wo si O Kristo!" Numa aver phende, "Pate, sai Kristo avel andai Galilee!

⁴²Pate o ramomos chi phendia, ke O Kristo si te avel ande vitsa le Davidoski, ai anda foro kai bushol Bethlehem, kai beshlo o David?"

⁴³Anda kodia chi haliarenas mashkar pende iek fialo pala Jesus.

⁴⁴Uni mangenas te len les, numa khonik chi thode o vas pe leste.

⁴⁵Le zhandari gele palpale ka le bare rasha ai le Farizeanuria, ai phende lenge, "Sostar tume chi andian les?"

⁴⁶Le zhandari phende lenge, "Chi iek manush chi dia duma sar kado manush!"

⁴⁷Le Farizeanuria phushle len, "Vi tume atsardian pala leste.

⁴⁸Pate si vari kon andal le bare kai poronchin, vai iek andal Farizeanuria kai pachanpe ande leste?

⁴⁹Numa kodo narodo kai chi zhanen o zakono o Mosesosko, si armandine."

⁵⁰O Nicodemus sas iek baro mashkar lende; wo gelosas mai anglal te dikhel O Jesus, phendia lenge,

⁵¹"Amaro zakono chi kerel kris po manush mai anglal sar te ashunas les, ai te zhanas so kerdia."

⁵²Won phende leske, "Vi tu san anda Galilee? Sichos o ramomos le Devlesko ai dikhesa, ke chi iek profeto avel anda Galilee.

⁵³Antunchi swako gelo peske khere.