Read romani E Buchi le Apostolengo 11 Bible Online

E Buchi le Apostolengo 11 - romani bible

E Buchi le Apostolengo 11

¹Le apostluria ai le phral kai sas ande Judea ashunde le Nai Zhiduvuria dinepe kal Del.

²Antunchi o Perti gelo ando Jerusalem, ai le shave le Devleske kai sas ande Jerusalem phende leske, ke chi kerdia vorta.

³Ai phendias, gelian kal Nai Zhiduvuria, ai xalian lensa.

⁴Ai o Petri liape te mothol lenge so kerdilia, phenelas, "Simas ando Joppa, ai sar rhugivas ma, dikhlem viziona, vari so kai miazolas sar ek bari selia, kai sas phangli kal shtar koltsuria, hulelas anda cheri ai avili zhi mande.

⁶Me dikhavas pe kodia selia, ai lem sama, ai dikhlem zhigeni shtare punrhensa, ai sapa, shuporli (chorhe zhigeni), ai chiriklia.

⁷Ai ashundem ek glaso kai motholas mange, "Wushti opre, Petri, mudar ai xa."

⁸Ai me phendem, "Nichi, Devla, ke shoxar chi xalem vari so kai si bi vuzho vai marime."

⁹Ai pe duito data iek glaso avilo anda cheri, "So O Del phendia ke si vuzho, tu na dikh sar bi vuzho."

¹⁰Kodia sas mange phendo trivar; porme sa geletar ando cheri.

¹¹Ai eta, strazo trin manush kai sas tradine anda Caesarea karing mande, avile mande kai beshav.

¹²O Swunto Duxo phenelas mange te zhav lensa, ai gelem, kodole shov lashe avile mansa, ai diam ando kher ande kodola manushesko kai bushol Cornelius.

¹³Kodo manush phendia amenge sar dikhliasas le angelos ande pesko kher, o angelo avilo leste, ai phendia leske, "Trade manush ando Joppa, te anen le Simonos, kodoles kai akharen o Petri,

¹⁴kai mothola tuke o divano, kai tu ai chi familia avena skepime."

¹⁵Kana lem te dav duma, O Swunto Duxo hulisto pe lende, sar pe amende anda gor,

¹⁶Ai antunchi dema goji kal vorbi kai phendiasas O Del, o Iovano boldia ando pai, numa tume avena bolde ando Swunto Duxo.

¹⁷"O Del dia len kodia podarka de sar amenge, kai pachaia ma ando Devles Jesus Kristo, sar sai te na kerav so mothol O Del?"

¹⁸Kana ashunde kado divano, chi mai phende kanch, ai naisin le Devles, phenenas, "O Del dia o keimos vi kal manush kai Nai Zhiduvuria, saxke te avel o iertimos vi len o traio."

¹⁹Kodola kai sas rhespisaile pala o baio le manushenge kana o Stephen sas mudardo, gele zhande le Phoinicia, ai Cyrus, ai Antioch, phenenas E Vorba le Devleski ferdi le Zhidovonge.

²⁰Ai uni mashkar lende sas manush ande Cyprus ai andai Cyrene, kai kana avile ande Antioch, gele kal Grekuria, ai mothonas lenge e lashi viasta pa Jesus Kristo.

²¹O vas le Devlesko lensa sas, ai buta manush pachaiepe, ai dinepe ka Del.

²²Kodia ashundilia zhi kal khan le manushenge kai sas ande khangeri ande Jerusalem; ai trade iekes kai busholas Barnabas, zhi ando Antioch,

²³kana areslo, ai dikhlia o lashimos le Devlesko, raduisailo, ai phendia lenge, savorhenge te beshen ieke ilesa phangle ka Del.

²⁴Ke lasho manush sas, pherdo Swunto Duxo ai pachamos; ai but narodo diape ka Del.

²⁵Antunchi o Barnabas gelo ande Tarsus, te rodel kodoles kai bushol Saul.

²⁶Kana arakhlia les, andia les ando Antioch, iek bersh chidepe andek than andel khangeria, ai sicharenas but narodos. Ando Antioch sas e pervo data kai le disipluria sas akharde le Shave le Devleske.

²⁷Ande kodia vriama le profeturia gele anda Jerusalem ando Antioch.

²⁸Iek anda lende kai busholas Agabus wushtilo opre, ai phendia katar O Swunto Duxo ke chi mai avela xaben pe sa e phuv, ai kerdilia kana o Claudius Caesar sas o baro le themengo.

²⁹Le disipluria dinepe duma, ai te traden xaben sako so dashtila kal phral kai sas ande Judea;

³⁰Ai kerde kadia, trade xaben kal mai phure kai sas ande Judea le Barnabasa ai le Saulosa.