Read romani Pervo Korintiana 11 Bible Online

Pervo Korintiana 11 - romani bible

Pervo Korintiana 11

¹Le tu pala mande, vi sar me lav pala Kristo.

²Luvudiv tume, phrala, kai den dume goji pa mande ande soste godi, ai garaven so sichardem tume, sar kai sichardem tu.

³Numa mangav te zhanen, ke Kristo si o shero swakones murshesko, ai o mursh si o shero la zhuvliako; ai O Del si o shero le Kristosko.

⁴Swako manush kai rhugilpe vai kai divinil, o shero vusharado, chi del luvudimos ka Kristo.

⁵Swako zhuvli kai rhugilpe vai divinil, o shero bi vusharado, chi respektil peske shero. Si saikfielo sar te rhandel lake bal.

⁶Te ek zhuvli chi vusharel lako shero, sai shinel vi peske bal; ai lazhav sikadiol lake te aven lake bal shinde vai rhangle, te vusharavelpe.

⁷O mursh chi trobul te vusharavel pesko shero, ke wo si o patreto ai o barimos le Devlesko: numa e zhuvli si o barimos le murshesko.

⁸Ke chaches o manush nas ankalado andai e zhuvli, numa e zhuvli sas ankaladi anda mursh.

⁹O mursh nas kerdo pala e zhuvli; numa e zhuvli sas kerdi pala mursh.

¹⁰Anda kodia e zhuvli trobul te avel lako shero vusharado, te dichol kai woi respektil o mursh, kadia si vi te dichol le angelonge.

¹¹Numa ando Del e zhuvli nai bi le murshesko ai o mursh nai bi la zhuvliako.

¹²Ke e zhuvli sas ankaladi andal mursh, saikfielo o mursh ankadalo pala e zhuvli; ai swako fielo avela katar O Del.

¹³Keren kris tume: vorta pek zhuvli te rhugilpe ka Del bi te avel vusharadi? Chi sikavel tumenge ke lazhal le mursheske te avel les bal lungo?

¹⁵Numa e zhuvli te avel la lunzhi bal si ek barimos lake. Ke lako bal si dia la pala ek vusharimos.

¹⁶Te si vari kon te xalpe anda kadala dieluria, amende nai kado zakono, chi le khangeria le Devleske.

¹⁷Kado divano kai phendem tumenge, chi luvudiv tume, ke chi chiden tume te aven mai lashe, numa te aven mai chorhe.

¹⁸Ai mai anglal, ashundem ke kana chiden tume andek than si mashkar tumende xuxaiimata, ai pachav ma.

¹⁹Ke trobul te avel kodolendar dieluria mashkar tumende, kaste kodola kai si cchache te aven te dichon sakadia mashkar tumende.

²⁰Kana chiden tume, chi chiden tume te xan o xamos le Devlesko.

²¹Ke uni kai skafidi xan pesko xabe: iek bokhalo lo, ai kaver mato lo.

²²Nai tume khera te xan ai te pen? Vai griatsa tumenge e khangeri le Devleski, ai keren lazhav kodolenge kai nai le kanchi? So phenava tumenge? Luvudiv tume pe kadia? Chi luvudiv tume.

²³Ke phendia mange O Del so sichardem tume, o dies kana O Jesus Kristo ande riat kai line les, lia manrho,

²⁴ai kana rhudisailo, phaglia les, ai phendia, "Len, xan, kako si murho stato kai si phaglo anda tumende: keren kadia te den goji mande.

²⁵Ai pale kana xalia, lia o daxtai ai phendia, kado daxtai si e nevi kontrakto ande murho rat. Keren kadia ai den tume goji mande swako data kai pena.

²⁶Ke swako data ke xan kado manrho, ai ke pen anda kado daxtai, phenenke mulo O Jesus, zhi kai avela palpale.

²⁷Anda kodia kodo kai xala manrho, vai pela anda daxtai le Devlesko, bi te avel vorta, avela doshalo karing o stato le Devlesko ai lesko rat.

²⁸No swako te dikhelpe vo korkorho, ai kadia te xal o manrho, ai te pel anda daxtai.

²⁹Ke kodo kai xal ai pel bi te dikhel o stato le Devlesko, xal ai pel e kris pe peste korkorho.

³⁰Anda kadia si mashkar tumende but kovle ai but naswale, ai kai but mule.

³¹Ke te kerasas kris pe ame korkorho pe amende, chi aviliamas dine kris.

³²Numa kana sam doshale, O Del chinuil ame, kaste te na avas doshale la lumias.

³³Anda kodia, murhe phral, kana chiden tume te xan, azhukeren tume iek kavres.

³⁴Te si vari kon bokhalo, te xal khere, kaste te na chiden tume andek than te aven pe tumende kris. Getova le kaver dieluria kana aresavas.