Read romani Pervo Korintiana 15 Bible Online

Pervo Korintiana 15 - romani bible

Pervo Korintiana 15

¹Dav tume goji phrale, mangav te phenav tumenge e lashi viasta mai iek data sar phendem tumenge mai anglal, tume lian les, ai cho pachamos zuriarde.

²Ai pa kodo san skepime, te ninkerena les sar phendem les tumenge.

³Sichardem tume mai anglal sa sar vi me sichilem, ke O Kristo mulo anda amare bezexa. Sar phenel o ramomos.

⁴Ke sas gropome, ai zhuvindisailo o trito dies sar phenel o ramomos.

⁵Ai ke sikadilo ka Cephas, porme le desh u donge.

⁶Porme sikadilo mai but de pansh shela phralen iek data, ai mai but anda lende inker zhuvinde le, ai uni mule.

⁷Porme sikadilo ka Iakov, ai sa le apostluria.

⁸Pala lende savorhe vi mange sikadilo, sar le bi vriamako.

⁹Ke sim o mai tsigno andal apostluria, chi trobul te akharen ma apostle, ke chinuisardem e khangeri le Devleski.

¹⁰Katar o mishtimos le Devlesko sim so sim: ai o mishtimos le Devlesko karing mande nas intaino, dur kotsar, kerdem mai but buchi lendar savorhe, na me, numa o mishtimos le Devlesko kai si mansa.

¹¹No kadia te avela me vai te aven won, eta, so das duma pa Del, ai pachaie tume.

¹²Fin phenas ke Kristo zhuvindisailo andal mulen. Sar uni anda tumende phenen ke nai zhuvindimos le mulen?

¹³Te na avela zhuvindimos le mulengo, chi O Kristo chi zhuvindisailo.

¹⁴Ai te Kristo nai zhuvindime, amaro divano antunchi intaino, ai vi tumaro pachamos intaino le.

¹⁵Antunchi vi sam xoxamne marturia ke phendiam ke O Del zhuvindisardia le Kristos: numa O Del chi zhuvindisardia les anda le mule te na wushten le mule andai martia.

¹⁶Te na zhuvindila le mule chi O Kristo nai zhuvindime.

¹⁷Ai te O Kristo nai zhuvindime, tumaro pachamos intainalo, inker san ande tumare bezex.

¹⁸Ai vi kodola kai mule ando Kristo, xasarde le.

¹⁹Te si ferdi ande kado traio ke jinas po Kristo, sam le mai nekezhime andal sa manush.

²⁰Numa akana O Kristo zhuvindime lo andal mule, ai angluno lo anda kodola kai mule.

²¹Ke te avili e martia katar iek manush, vi katar iek manush avilo o zhuvindimos le mulenge.

²²Ai sar savorhe meren ando Adam, savorhe zhuvindina ando Kristo.

²³Numa swako pe pesko rhindo, O Kristo sar le anglune, porme kodola kai si le Kristoske kana avela, porme avela o getomos.

²⁴Kana dela amperetsia ka kado kai si Del, ai Dat; pala kodia kai peravela swako barimos, swako poronchimos ai swako zor.

²⁵Ke trobul te poronchil, zhi kai thola sa le duzhmanon telai leske punrhe.

²⁶O paluno duzhmano kai avela perado si e martia.

²⁷O Del chaches sa thodia tela leske punrhe. Numa kana phenel, ke swako fialo si tela leste, chaches ke kodo kai thodiape pala leste swako fialo wo nai.

²⁸Ai kana swako fialo avena tela leste, porme O Shav vi wo avela tela kodo kai thodai tela leste, kashte te avel O Del sa ando swako fialo.

²⁹Te na, nichi, so keren kodola ke bolenpe le mulenge, te na zhuvindila vov si le mule? Sostar bolenpe anda lende?

³⁰Ai ame sostar sam swako chaso ande dar?

³¹Ke swako dies sai merav, phenav phrala le pala putiera ke sam mange ando Jesus Kristo amaro Del.

³²Te si sar manushenge dikhimos ke marde ma le zhigeniensa ando Ephesus, che mishtimos lav anda kodia, te na zhuvindin le mulen? Xas, piias, ke terhara meras.

³³Na shubin tume, le chorhe ginduria rimon vi lasho zakono.

³⁴Ambolden palpale tumende so si mishto, ai na keren bezex, ke uni chi zhanen le Devles: phenav tumaro lazhav.

³⁵No vari kon phenela, sar le mule zhuvindin? Ai che statosa ambolden?

³⁶Dilia, e sumuntsa kai thos chi zhuvindil, te na merel.

³⁷Soste bariol, nai o stato kai bariol, ferdi iek sumuntsa jiveske amborim, vai aver sumuntsa.

³⁸Porme O Del del les iek stato sar mangel, ai swako sumuntsa del iek stato kai si leske.

³⁹Swako mas nai iek mas, numa aver si o mas le manushenge, aver si le shtare punrhenge, aver le chirikliange, aver le masenge.

⁴⁰Si vi staturia chereske, ai staturia phuviake: numa aver si o strefiamos le staturia le chereske, aver si le staturia la phuviake.

⁴¹Aver si o strefiamos la khamesko, aver si o strefiamos le shunutosko, ai aver si o strefiamos le cherhaiengo. Iek chererhai strefial aver fialo katar aver chererhai.

⁴²Kadia si anda zhuvindimos le mulenge, o stato bariardo kai rimolpe, zhuvindil kai chi mai rimol.

⁴³Bariol gratsia, zhuvindil vuzho: bariol kovlo, zhuvindil pherdo zor.

⁴⁴Bariol zhigania, zhuvindil swuntsome stato. Si iek stato zhigania, si vi iek stato swuntso.

⁴⁵Anda kodia ramome, si o angluno manush Adam kerdilo stato zhuvindo, o paluno Adam kerdilo iek duxo kai zhuvindil.

⁴⁶Numa so si swunto nai o angluno so si zhigania, ai so si swunto avela mai palal.

⁴⁷O angluno manush ankalado andai phuv, phuviako lo, o duito manush si andai rhaio.

⁴⁸Kadia si la phuviako, kadia si vi le phuviako, ai kadia si le cheresko.

⁴⁹Ai sar savorhe ningerdiam o patreto la phuviakoresko, vi kadia ningerasa le cheresko.

⁵⁰So phenav, phrala le, ke o mas ai o rat nashtil len o rhaio le Devlesko, ai ke o rimome nashti lel kai chi mai rimolpe.

⁵¹Eta, phenav tumenge iek shodenia, chi meras sa, numa savorhe parhuenas sa.

⁵²Ande ek tsikon (momento), ai ande dikhimos iakhako, kai palui tuturaza, ke e tuturaza bashela ai le mule zhuvindila, ke chi mai rimonpe ai ame savorhe avasa parhuenasa.

⁵³Ke trobul kado stato kai rimolpe te vuriarelpe so chi mai rimolpe, ai kado stato kai merel lelpe peste kai chi mai merel.

⁵⁴Kana kado stato kai rimolpe vuriarelpe kai chi mai rimolpe, ai kado stato kai merel kana vuriarelape kai chi mai merel, antunchi kerdiol e vorba kai si ramome.

⁵⁵E martia sas tasadi ando nirimos. Martio, kai cho nirimos? Martio, kai chi kanrho?

⁵⁶O kanrho la martiako si o bezex, ai e zor le bezexesko si o zakono.

⁵⁷Numa nais le Devleske kai dia ame o nirimos katar amaro Del, O Jesus Kristo.

⁵⁸Kadia, murhe drazhe phral, aven zurale, na parhudion, keren buchi mai mishto, ai mai mishto ande diela le Devleske, te zhanen ke tumari buchi chi avela intaino ando Del.