Read romani Galatiana 6 Bible Online

Galatiana 6 - romani bible

Galatiana 6

¹Murhe phral, te dikhlian ke shubisailo vari kon ande vari soste, tume kai si tume O Swunto Duxo le Devlesko, anen les palpale po drom o vorta; numa len les lashimasa, ai arakh tu te na aves vi tu zumado.

²Zhutin tume iek kavres ande tumare pharipe, ai kadia kerena o zakono; le Kristosko.

³Te gindila vari kon ke wo si vari so, ai kai wo nai kanchi, wo shubilpe pes.

⁴Te lel sama sako so kerel wo, ai porme sai luvudilape pe peste, ai na anda so kerdia o kolaver.

⁵Ke sako trobul te kerel peski buchi.

⁶Kodo kai phenen leske e lashi viasta trobul te hulavel sa pesko mishtimos kodolesa kai phenel leske e lashi viasta.

⁷Na shubin tume; chi marelpe mui katar O Del, ke o manush chidela so thodia te bariol.

⁸Te bariarela so si drago leske statoske, lesko stato anela leske e martia; numa te bariarela so si drago le Swuntone Duxoske, O Swunto Duxo anela leske o traio kai chi mai getolpe.

⁹Na aterdiuas, keras sagda o mishtimos; ke te na xasarasas zor, chidasa kana avela e vriama.

¹⁰Zhi kai godi sai dashtisaras, keras o mishtimos savorhenge, ai mai but amare phralenge kai pachanpe ando Del.

¹¹Dikhen savestar baro lil ramosardem tumenge murhe vastensa!

¹²Sa kodola kai mangen te plachan penge statos mangenpe zor te keren semno pe tumaro stato. Saxke te na chinuin won pala trushul le Kristosko.

¹³Ke kodola kai si le semno ande pengo stato chi lenpe pala zakono; numa mangen te avel tumen semno ando stato te sai luvudinpe pa tumende ke thode semno ande tumaro stato.

¹⁴Me, pa mande, dur mandar o gindo te luvudiv ma andal kolaver dieli, de ferdi anda trushul amare Devlesko O Jesus Kristo; e, katar o trushul le Kristosko e lumia muli la mange, ai me sim mulo la lumiake.

¹⁵Ke te avel tu semno ando stato vai te na avel tu kodia na kanchi, numa so trobul si te aves iek nevo manush.

¹⁶Sa kodolenge kai lenpe pala kodia ande penge traio, mothav e pacha ai o lashimos le Devlesko te avel lensa, lensa ai sa le Devleske narodosa!

¹⁷Te na mai chinuil ma khonik akana, ke si ma pe murho stato le semnuria le Kristoske.

¹⁸Murhe phral, o mishtimos amare Devlesko O Jesus Kristo te avel tumensa. Amen.