Read romani Efisiana 3 Bible Online

Efisiana 3 - romani bible

Efisiana 3

¹Anda kodia, me, o Pavlo, o manush phandado le Jesus Kristosko tumenge kai chi san Zhiduvuria,

²tume ashundian kai O Del ande pesko lashimos dia ma kadia buchi te kerav tumenge.

³O Del sikadia mange peske ginduria kai sas garade, ai ramosardem vari so pa kodia diela,

⁴ai kana jinena sai haliaren so zhanav pa gindo o garado pa Jesus Kristo.

⁵Mai anglal kado gindo o garado chi zhanenas les le manush, numa O Del sikadia les akana katar pesko Swunto Duxo peske Swuntone apostlonge ai le profetonge.

⁶Me phenav tumenge: katar e lashi viasta le manush kai Nai Zhiduvuria shinado lenge te avel le le Zhidovonsa. O swuntsomos kai O Del garavel peske narodoske; vi won si anda iak stato, ai vi lenge si so shinadia O Del ando Jesus Kristo.

⁷Kerdilem ek pasturi te angerav e lashi viasta palai podarka kai O Del anda pesko lashimos dia ma ande peski putiera.

⁸Me sim o mai tele katar kodola kai si mai tele anda sa o narodo le Devlesko; ai O Del dia ma kadia podarka, te anav ka kodola kai Nai Zhiduvuria e lashi viasta kai mothol pa barvalimos o baro le Kristosko;

⁹ai te anav sa le manushen te dikhen sar o garaimos le Devlesko trobul te kerdiol, kado sas garado ando Del de anda gor la lumiako, O Del kerdia swako fielo pala Jesus Kristo.

¹⁰Saxke akana le khangeriasa, le zora ai le putieri la lumiake kai si ando cheri te zhanen e goji le Devleski ande soste godi.

¹¹O Del kerdia kadia vorta sar mangelas de demult kai kerdia le Jesus Kristosa amaro Del.

¹²Le Kristosa andek than ai pala amaro pachamos ande leste, chi mai sam phangle ai sai sikadiuas angla Del sa amare ilesa.

¹³Akana, mangav tumendar, te na xasaren tumaro pachamos pala chinuimos kai si ma tumenge; ke tumenge avela baro luvudimos.

¹⁴Anda kodia, dav changa angla Dat amare Devlesko O Jesus Kristo.

¹⁵Kai lestar sa le famili ando rhaio ai pe phuv len lesko chacho anav.

¹⁶Mangav katar O Del te ande pesko barvalimos o luvudime, te del tume te aven zurale la putierasa katar pesko Swunto Duxo ande tumende.

¹⁷Ai O Kristo te beshel ande tumare ile pala pachamos. Mangav te avel tumaro pachamos zuralo ande dragostia le Devleski.

¹⁸Ai sa le Devleske narodosa, tume sai haliaren sode e dragostia le Kristoski buflo lo, ai lungo, vucho, ai profondo;

¹⁹ai te zhanen tume leski dragostia, marka ke khonik nashti zhanel sa, ai te avel pherdo ande sa le dieli le Devleske.

²⁰E kodo kai si les e putiera te kerel mai but sar so ame mangas vai gindisaras, katar e putiera kai kerel buchi ande amende.

²¹Ka Del te avel o luvudimos ande khangeri ai ando Jesus Kristo ande swako vriama, Amen.