Read romani Filimon 1 Bible Online

Filimon 1 - romani bible

Filimon 1

¹Katar o Pavlo, kai si phanglo le Jesus Kristoske, ai katar amaro phral o Timote. Tuke Philemon, amaro kuchi vortako, ai kai keres buchi amensa, ai kai khangeri kai chidelpe ande cho kher,

²ai amare pheiake e Apphia, ai ka Archippus kai marelpe amensa ando pachamos:

³O Del amaro Dat ai le Devles Jesus Kristo te del tume o lashimos ai e pacha.

⁴Swako data kai rhugiv ma, murho kuchi Philemon, da ma goji tute, ai naisiv murhe Devleske.

⁵Ke ashunav e dragostia kai si tu sa le Devleske narodoske, ai o pachamos kai si tu ando Jesus Kristo.

⁶Ai mangav katar O Del o traio kai inkerel tu amensa katar o pachamos te kerel te zhanas mai mishto sa le mishtimata kai si ame ande amaro traio le Kristosa.

⁷Chiri dragostia, murho phral, dia man but raduimos ai zor! Ke raduisardian o ilo le Devlesko narodoske.

⁸Anda kodia, marka, pala Kristo me sim ivia te mothav tuke so trobul te keres.

⁹Numa ke mange drago tuke, mangav vari so tutar. Sar sim me o Pavlo, iek manush phuro, ai katse ande temnitsa, ai akana ek manush phanglo le Jesus Kristoske.

¹⁰Me mangav tutar vari so le Onesimeske, ke wo si murho shav ando Jesus Kristo; ke me kerdilem lesko dat ando Del katse ande temnitsa.

¹¹Mai anglal wo chi trobulas tu, numa akana trobul ame, vi tut ai vi man.

¹²Ai tradav les tute akana, premin les, sar te avilino iek kotor anda mande.

¹³Me manglemas te inkerav les pasha mande, zhi kai sim ande temnitsa ai te zhutil ma ande cho than.

¹⁴Numa chi manglem te kerav kanchi bi te phushav tutar, chi mangav te thav tu pe zor te keres mange mishtimos, ke mange mai drago te keres tu anda tute.

¹⁵Amborim o Onesimus sas lino tutar pe xantsi vriama, saxke te avel tusa porme sagda;

¹⁶ke akana wo ma nai ferdi iek prosto sluga, numa mai but lo de sar iek sluga: wo si akana iek kuchi phral, ai mange defial drago lo, numa tuke trobul te avel mai but vi sar sluga, ai vi sar phral ando Kristo.

¹⁷Te jinesa man sar cho vortako, premisar les sar te premisardianas man.

¹⁸Ai te shubisailo vari so karing tute, vai te kamela tuke vari so, tu jin pa mande.

¹⁹Me, murhe vastesa tradav tuke kado divano. Me, o Pavlo, pochinava tuke palpale, ai chi trobul te dav tu goji ke tu kames mange cho traio.

²⁰E, phrala, mangav ma tutar, ker mange kado mishtimos ande dragostia le Kristoski. Raduisar murho ilo, sar iek phral ando Jesus Kristo!

²¹Ke me pachav ma, ke ande kado lil kai ramov tuke, akana te keresa so mangav tutar, ai vi zhanav ke keresa mai but.

²²Ai ande kodia lashar i mange iek soba ke pachav ma ke O Del ashunela tumare rhugimata, ai dela te avav pale tumensa.

²³O Epaphras, kai si mansa ande temnitsa le Jesus Kristoske tradel tuke but bax, zor ai sastimos.

²⁴Ai vi o Marko, o Aristarchus, o Demas, ai o Luk, murhe vortacha kai keren mansa buchi.

²⁵O mishtimos amaro Devlesko Jesus Kristo te avel tumensa. Amen.