Read ronga Mt 10 Bible Online

Mt 10 - ronga bible

Mt 10

¹Kati loko Yesu avitani a vadondrisiwa vakwe lava va khume na vabiri, avanyika ntamu wa kuhlongola mimoya leyi mimfani ni kuhanyisa mavabyi ya tinxaka hinkwatu, ni kukarateka hinkwaku.

²A mavito ya vapostola lava va khume na vabiri hi lawa: A wa kusungula, Simoni, lweyi ahlayiwaka Petrosi, ni makwavu Andreyasi; Yakobe ni makwavu Yohana, vana va Zebedeya;

³Filipi na Bartolomewu; Tomasi na Matewu, muhlengisi; Yakobe n'wana Alifewu, na Tadewu;

⁴Simoni mu-Kanana na Yudasi Iskariyota, lweyi angawonga Yesu.

⁵Yesu arumi lava va khume na vabiri, avaleleta aku: N'wingayi ku va-Matiko, n'winganhingeneni amutini wa va-Samariya[19]

⁶yanani ntsena ku tihamba ta kulahleka ta yindlu ya Israyele.

⁷Loko n'wifamba tivisani leswaku a Mfumu wa Matilo wutrhindrekelile.

⁸Hanyisani timbabyi, pfuxani lava vafiki, basisani a va nhlokonho, hlongolani mademoni. N'winyikiwi ntsena, na n'wine nyikani ntsena.

⁹N'wingatekeni a mali ya libungu, nambi ya ntlhohe, kumbe mali ya nsuku, amabandini yenu,

¹⁰ni timbuva ta ndlela; n'wingatekeni a mpahla ya kutxintxa ha yone, nambi ti tintangu, kumbe nhonga, hikusa a mutiri afanela hi swakuda swake.

¹¹Loko n'witlhasa amutini kumbe amutanini wa kukari, djulani mhunu wa kudumbeka n'witrhama a kaya kwake kukondra n'wisuka.

¹²Loko n'winhingena ku yindlu ya kukari, loselani hi kurula[20]

¹³Loko a yindlu leyo yifanela swone, a kurula kwenu akute henhla ka yone; kambe loko yingafaneli swone, a kurula kwenu akutlheleli ku n'wine.

¹⁴Loko vangan'wiyamukeli, nambi kuyingela a maritu yenu, sukani ku yindlu leyo kumbe amutini lowo, n'wiva n'wiphumuna ni ntrhuri[21] aminkondrweni.

¹⁵Nihlayelamfuri nili ku n'wine, hi siku dra kuyavanyisa a kukhatisa kutavevuka ku tiko dra Sodoma na Gomora[22] kutlula muti lowo.

¹⁶Lavisani, nin'wiruma swanga tihamba amakari ka mahava. Hileswo-ke tlharihani swanga tinyoka, n'wirula swanga matuva.

¹⁷Tivonelani, hikuva vatan'wikokela tihubyini, vatan'wipswhita amasinagogeni,

¹⁸n'witayisiwa amahlweni ka tindruna ni ka vafumi hikola kwanga; kone n'witanihambela a vumboni ku vone ni ku va-Matiko.

¹⁹Kambe loko van'winyiketa ku vafumi n'wingakaratekeni hi leswi n'witakakhanelisa xiswone, nambi leswi n'witakaswihlaya, hikusa loko kutlhasa nkama wakuva n'wikhanela, Xikwembu Nkulukumba atan'winyika maritu.

²⁰Hikusa ahi n'wine n'witakakhanela, kambe wutava Moya wa Tatana wenu lowu wunga ku n'wine.

²¹Na swone, a mhunu atanyiketa makwavu akudlayiweni, ni tatana atanyiketa n'wana; a vana vatapfukela a vapswali, kutani vatavadlaya.

²²N'witahambuliwa hi misava hinkwayu hinkonta yanga; kambe lweyi atakatiyisela kutlhasa vugan'wini atahuluxiwa.

²³Loko van'wixanisa ku muti lowu, trutrumelani ku wumbeni; nihlayelamfuri nili ku n'wine: N'wingaka n'wingaheti miti hinkwayu ya Israyele na N'wana wa Mhunu angasinabuya.

²⁴Akuna mudondri lweyi atlulaka a mudondrisi wakwe, ni nandra lweyi atlulaka a n'winyi wakwe.

²⁵Swadringana ku mudondri ava swanga hi mudondrisi wakwe, ni nandra ava swanga hi n'winyi wakwe. Loko-ke varuki a n'winyi wa yindlu vamuhlaya Beelzebule, xana vangaka vangatxhuli ngopfu vone lava vatrhamisaka na yene?

²⁶Hileswo-ke, n'wingatxhaveni; hikusa akuna xa ntxhumu lexi xifuneketiweke, xingatikifunukuliwa, na kone akuna xantxhumu lexi xifihlekiki xingatikitibyiwa.

²⁷Leswi niswihlayaka amunyameni, swihlayani alivaningweni, ni leswi n'wihleveteliwaka atindleveni, swirerani a henhla ka tiyindlu.

²⁸Nakone n'wingatxhaveni lava vadlayaka a miri, na vangakotiki kudlaya a hika; kambe txhavani ngopfu lweyi angani ntamu wa kusuvisa a hika ni miri akheleni dra ndrilo.

²⁹Avaxavisi a swinyanyana swibiri hi ximalana xin'we, xana? Kambe ni xin'we xa swone xitakawa a hansi loko kunge kurandra ka Tatana wenu.

³⁰Na yone misisi hinkwayu ya tinhloko tenu mihlayiwile a ntalu wa yone!

³¹Hileswo-ke n'wingavi txhava! N'wine n'witlula a swinyanyatana leswi swinyingi.

³²Lweyi atakanihlaya amahlweni ka vhanu, na mine nitamuhlaya amahlweni ka Tatana wanga lweyi anga Matilweni;

³³kambe lweyi atakaniyala amahlweni ka vhanu, na mine nitamuyala amahlweni ka Tatana wanga lweyi anga Matilweni.

³⁴N'wingayanakanyeni leswaku nitisi kurula amisaveni; anitelanga kutisa kurula, kambe dra kuva tlhari;

³⁵hikusa niteli kutatabeka kuhambinisa n'wana wa xinuna ni tatana wakwe, n'wana wa xisati ni mamana wakwe, a n'wingi ni n'wingi wakwe;

³⁶ a valala va mhunu vatava va ndangu wakwe.

³⁷Lweyi arandraka a tatana wakwe kumbe mamana wakwe kutlula mine, anganifaneli; ni lweyi arandraka ngopfu a n'wanakwe wa xinuna kumbe wa xisati kutlula mine anganifaneli.

³⁸Lweyi angarwalikiki a xihambano xakwe anilandra anganifaneli.

³⁹Lweyi abekisaka a vutomi byake atabyilahla, kambe lweyi alahlekeliwaka hi vutomi byake hinkonta yanga, atatlhela abyikuma.

⁴⁰Lweyi an'wiyamukelaka ayamukela mine, ni lweyi aniyamukelaka, ayamukela lweyi anirumiki.

⁴¹Lweyi ayamukelaka muprofeta hikuva ali muprofeta, atakuma a hakelo ledri drifanelaka muprofeta; ni lweyi ayamukelaka mululami hikuva ali mululami, atakuma a hakelo ledri drifanelaka mululami.

⁴²Nakone lweyi atakanyika a ntrheko wa mati ya kutitimeta ku mun'we wa lava vatrongonyana hikuva ali mudondrisiwa wanga, nan'wibyela nili angaka angalahlekeliwi hi hakelo drakwe.