Read ronga Mt 11 Bible Online

Mt 11 - ronga bible

Mt 11

¹Loko Yesu agami kunyika swileleto ku vadondrisiwa vakwe va khume na vabiri, asuki kone ayadondrisa ni kurera a ritu amitini yavu.

²Loko Yohana ayingeli, na ali bohelweni, ta mintiro ya Kriste, arumi ku Yene van'we ku vadondrisiwa vakwe,

³akuva vayamuvutisa leswaku: Hi wene lweyi afanelaka a kuta, kumbe hifanela kurindrela mun'wana?

⁴Kutani Yesu avayangula aku: Fambani n'wiyadrungulela Yohana leswi n'wiswivonaka ni leswi n'wiswiyingelaka:

⁵Lava vakufa-mahlu vavona, a swilema swafamba, a va nhlokonho vabasisiwa, a vakufa-tindleve vayingela, a vafi vapfuxiwa, a swisiwana switivisiwa a Ivangeli.

⁶Akatekile lweyi angakhunguvanyekiki hikola kwanga.

⁷Kambe loko vafambile, Yesu asungula kukhanela ni switrhungu ha Yohana, aku: N'wayivona yini a huleni? A lihlanga ledri dritrekatrekisiwaka hi mheho?

⁸Kasi n'wayivona yini? A mhunu lweyi ayambaliki swiphatiphati? Vonani, lava vayambalaka a swiphatiphati vakumeka atindlwini ta vafumi.

⁹Kambe n'wiyivona yini xana? N'wiyivona muprofeta? Im'na! Nan'wibyela; mfuri hi lweyi atlula ni muprofeta.

¹⁰ Hikusa hi yelweyi kungatraliwa ha yene leswaku: Niruma a ntrumi yanga amahlweni kwaku, leyi yitakabekisa a ndlela amahlweni kwaku.

¹¹Nihlayelamfuri nili ku n'wine: amakari ka lava vabelekiwiki hi wansati, akungitumbuluka mhunu lweyi atlulaka Yohana Mubabatisi; kambe lweyi anga ntrongonyana a Mfun'wini wa Matilo awamutlula.

¹²Kambe kusukela amasikwini ya Yohana Mubabatisi kutlhasa swoswi, a Mfumu wa Matilo wukumiwa hiwuphangi, vawuwutla hi ntamu.

¹³Hikusa a vaprofeta hinkwavu, na wone Nawu vaprofetile kuyagama ha Yohana;

¹⁴ Ni loko n'widjula kupfumela, hi yene anga Eliya lweyi afaka afaneli kuta.

¹⁵Lweyi angani tindleve ayingiseti!

¹⁶Kambe xana ningafanisa a vhanu va minkama leyi hayini? Vafana ni vatrongwana lava vatrhamiki tihubyini, na vahlayalena van'we ku van'wana vaku:

¹⁷Hin'wiyimbeli nanga, kambe n'wine an'wikinanga! Hibi nkulungwana wa nkosi, kambe an'widrilanga!

¹⁸Hikusa kuti Yohana, lweyi afaka angadi, anganwi, n'wine n'wiku: Lweyi ani demoni.

¹⁹A N'wana wa Mhunu atile na ada, anwa, vaku i wa magolo ni mpopswi, i nakulobye wa vahlengisi ni vadohi. Kambe a vutlhari byikombisiwa a kululama ka byone hi mintiro ya byone. [23]

²⁰Kutani Yene asunguli kusola a miti leyi afaka ayentxi ku yone a mahlolana yake lawa ya kutala, hikusa afa mingandrulukanga, aku:

²¹Yowee, ku wene Korazini! Yowee, ku wene Betsaida! Hikusa, loko afa a mahlolana lawa mayentxiwiki ku n'wine afa mayentxiwi a mitini ya Tiri na Sidoni[24], afa vayaki va yone vandruluki khale, vayambala masaka ni nora.

²²Nambi swili tanu, nan'wibyela, nili: Asikwini dra yavanyiso kutavevukeliwa Tiri na Sidoni kutlula n'wine.

²³Wene ke Kapernawume, utatlakuxiwa kuyatlhasa tilweni? Utaxixiwa kuyatlhasa Hades [25] Hikusa loko fanga a mahlolana lawa mayentxiwiki ku wene, mayentxiwi ku Sodoma, a muti lowo ni namuhla afa wahatava kone.

²⁴Kambe nan'wibyela leswaku: hi siku dra yavanyiso kutavevukeliwa Sodoma kutlula wene.

²⁵Ankameni wolowo, Yesu ayangula, aku: Nakukhensa Tatana, HOSI ya Tilo ni misava, hi leswi ungafihlela tintlhari ni vayingeli a timhaka leti, kambe utipfuleteliki ku vatrongwana.

²⁶Im'na, Tatana, hikusa swirandrisiwi xiswoswo amahlweni kwaku.

²⁷Hikuva hinkwaswu swinyikiwi mine hi Tatana wanga; anga kone lweyi ativaka a N'wana loko ange Tatana, na kone akuna lweyi ativaka Tatana loko ange N'wana, ni lweyi a N'wana arandraka a kumupfuletela akuva amutiva.

²⁸Tanani ku mine hinkwenu n'wine n'wikaraliki na n'wine n'wibindriwaka, nitan'wiwisisa.

²⁹Tibyatrhelani a mpinga wanga, n'wiva n'widondra ku mine, hikusa ni wa kurula ni wa mbilu ya kutitrongohata. N'witakuma kuwisa amimoyeni yenu;

³⁰hikusa a mpinga wanga wabyatrheka, na wone ntrhwalu wanga wavevuka.