Read ronga Mt 13 Bible Online

Mt 13 - ronga bible

Mt 13

¹Hi siku droledro Yesu ahumi andlwini ayatrhama ankingeni wa nambu.

²Hikuva afaka switrhungu swinyingi swihlengeletani ku Yene, anhingeni abyatrhwini atrhamisa kone, a switrhungu swone afa swiyimi ankingeni.

³Kutani avabyela swakutala hi swifaniso aku ku vone: Mun'we wa mubyali ahumi ayabyala.

⁴Loko abyala, tin'we timbewu tiwela andleleni, kutlhasa a tinyanyana titatatida.

⁵A tin'wana tiwela amaribyeni, lomu kungekena misava minyingi; a timbewu leto tihatla timila, hikusa a misava afa mingayetanga.

⁶Kambe loko a dambu dritlhava, tipswha, tiwoma hikuva afa tingena mitru.

⁷Tin'wana kambe tiwela amakari ka mitwa, loko a mitwa mikulile mitikamanyeta.

⁸Kutani tin'wana mfuri, tiwela amisaveni leminene, tihumexa a mihandru ya kuxonga: yin'we a mbewu yihumexa dzana (100), yin'wana ntlhanu wa makume na drin'we (60), ni yin'wana makume mararu (30) ya tinhleke.

⁹Lweyi angani tindleve ayingiseti!

¹⁰Kutani a vadondrisiwa loko vatrhindrekela ku Yene vamuvutisa vaku: Ha yini ukhanela ni vhanu hi swifaniso?

¹¹Avayangula aku: N'wine n'winyikiwi kutiva a swihundla swa Mfumu wa Matilo; kambe vone avanyikiwanga.

¹²Hikuva lweyi anganaswu atanyikiwa, atataleliwa ha swone, kambe lweyi angekena ntxhumu, ni leswi switrongo anganaswu atatekeliwa.

¹³Hileswo-ke nikhanela na vone hi swifaniso; hikuva nambi vavona, vangavoni, nambi vayingela, vangayingeli, vayingelisisa.

¹⁴Xiswoswo kuhetiseka leswingahlayiwa hi muprofeta Ezaya lweyi angaku: Hi kuyingela, n'witayingela, kambe n'wingayingelisisi; hi kulangusa, n'witalangusa, kambe n'wingaka n'wingavoni.

¹⁵ Hikusa a mbilu ya vhanu lava yinonon'hwile; ni hi tindleve tavu, vayingela hi kukarateka, vaswonyi mahlu yavu akuva vangavoni hi mahlu; vayingela hi tindleve, vayingelisisa hi mbilu, vandruluka nivahanyisa.

¹⁶Kambe makatekile a mahlu yenu, hikuva mavona; ni tindleve tenu, hikuva tayingela.

¹⁷Nihlayelamfuri leswaku i vanyingi vaprofeta ni valulami vanaveliki kuvona leswi n'wine n'wiswivonaka, kambe avaswivonanga; ni kuyingela leswi n'wiswiyingelaka, kambe avaswiyingelanga.

¹⁸Yingisetani swoswi a ntlhamuxelo wa xifaniso xa mubyali:

¹⁹Lweyi ayingelaka a ritu dra Mfumu, kambe angadriyingelisisi, kuta lweyi mfani, awutla leswi swibyaliwiki ambilwini yake; hi yene lweyi abyaliwiki[28] andleleni.

²⁰Kambe lweyi abyaliwiki amaribyeni hi lweyi ayingelaka a ritu ahatla adriyamukela hi kutrhava,

²¹kambe angana mitru andreni kwake, atrhama nkamanyana ntsena; a nhlomulo, kumbe kuxaniseka hinkonta ya ritu, swiku swahumelela ahatla akhunguvanyeka.

²²Kambe lweyi abyaliwki amitweni hi lweyi ayingelaka a ritu, kutani a kuhlatiyela ka nkama lowu ni kukanganyisa ka vukosi swikamalata a ritu, drindruluka dringabeki mihandru.

²³Mfuri lweyi abyaliwiki amisaveni leminene, hi lweyi ayingelaka ritu adriyingelisisa, ava abeka a mihandru, a nhleke yin'we yibeka a dzana (100), a yin'wana ntlhanu wa makume na drin'we (60), a yin'wana makume mararu (30).

²⁴Yene avabekeli xin'wana xifaniso aku: A Mfumu wa Matilo wufana ni mhunu lweyi abyaliki mbewu leyi yinene ansin'wini yake.

²⁵Kambe avusikwini, loko vhanu hinkwavu vayetlelile, kuta nala atatabyala lihungu amakari ka mavele, ava atifambela.

²⁶Loko a mavele marumbuka, mabeleka, kuvoneka ni lihungu, kolahu.

²⁷A vatiri va n'winyi wa nsimu vata ku yene vaku: hosi, xana awubyalanga a mbewu leyi yinene ansin'wini yaku? Xana a lihungu dripfa kwini?

²⁸A n'winyi aku: I nala wa kukari ayentxiki leswo. Kutani a vatiri vamuvutisa vaku: Urandra leswaku hitruvula a lihungu xana?

²⁹Kambe yene aku ku vone: Im'hi, hikusa n'witaku n'witruvula a lihungu, n'witruvula na wone mavele.

³⁰Switrikani swikula kun'we kukondra kuyatlhasa nkama wa ntrhovelo. Ankameni lowo nitabyela vatrhoveli niku: Rangani n'wihlengeleta a lihungu, n'widritrimba hi tinyandra drihisiwa, kambe amavele mahlengeletani atrhaleni dranga.

³¹Avabekela mfuri a xifaniso xin'wana aku: A Mfumu wa Matilo wufana ni nhleke ya sinapi leyi a mhunu ayibyaliki ansin'wini yake.

³²Yone hi leyi yitrongo ngopfu kutlula tinhleke hinkwatu. Kambe, loko yimila, yikula yindruluka nsinya lowu wukulu ngopfu kutlula a minsinya hinkwayu, lakakuva a tinyanyana tiyaka vusaka atinkambyini ta wone.

³³Atlhela avadrungulela xin'wana xifaniso aku: A Mfumu wa Matilo wufana ni handrelo leyi a wansati ayitxheliki ku mimpimu miraru ya mapa, apfuva akuva yiyentxa leswaku a mbila hinkwayu yikukumuka.

³⁴Yesu akhaneli hinkwaswu leswi ku switrhungu hi kutirisa swifaniso; afa angavabyeli ntxhumu loko kunge hi swifaniso,

³⁵ akuva kuhetiseka leswi afaka swihlayiwi hi muprofeta lweyi angaku: Nitakhanela hi swifaniso; nitahlaya leswi afaka swili xihundla kehe loko Xikwembu Nkulukumba atumbuluxi misava.

³⁶Kutani asuka avhanwini, ayanhingena andlwini, laha atrhindrekeleliwiki hi vadondrisiwa vakwe akuva vakombela leswaku avatlhamuxela a xifaniso xa lihungu.

³⁷Yene avayangula aku: Lweyi abyaliki mbewu leyi yinene hi N'wana wa Mhunu,

³⁸a nsimu i tiko. A mbewu yinene hi vana va Mfumu wa Xikwembu Nkulukumba, a lihungu drikombisa a vana va lweyi mfani.

³⁹A nala lweyi abyaliki lihungu hi yene Diyavulosi, lava vanga vahlengeleti va ntrhovelo i tintrumi.

⁴⁰Swanga hi leswi a lihungu drihlengeletiwaka dritrimbeleliwa vadritxukumetela andrilweni vadrihisa, switava swoswo ni le kuheleni ka misava.

⁴¹A N'wana wa Mhunu ataruma a tintrumi takwe tihlengeleta a handle ka Mfumu wakwe hinkwavu lava vayentxaka leswaku van'wana vadoha, ni hinkwavu lava vayentxaka leswi swimfani,

⁴²akuva vatxukumetiwa akheleni dra ndrilo, laha kutakava ni swidrilo ni kuketrela ka menyo.

⁴³Kutani a valulami vataphatima swanga hi dambu, a Mfun'wini wa Tatana wavu. Lweyi angani tindleve (ta kuyingela), ayingeli.

⁴⁴Yesu ayengeta aku: a Mfumu wa Matilo wufana ni vukosi lebyi byifihliwiki ansin'wini. Loko mhunu abyikuma, atlhela abyifihla kolahu. Hi kunyoxa loku kukulu, afamba aya xavisa hinkwaswu leswi anganaswu ayaxava nsimu leyo.

⁴⁵Nakone a Mfumu wa Matilo wungafanisiwa ni muxavisi lweyi afambaka adjula a swa lisima.

⁴⁶Loko akumi perola drin'we dra lisima ngopfu, afamba ayaxavisa hinkwaswu leswi anganaswu axava drone.

⁴⁷Nakone a Mfumu wa Matilo wahafana kambe ni nkukutu lowu wupetiwaka alikhulwini wuphasa hinkwatu tinxaka ta tinhlampfi.

⁴⁸Loko a nkukutu wutalile, a vatrhevi vawukokela asaveni, vatrhama vahlawula kone a tinhlampfi; leti tinene vatibeka amintrhaveni, vatxukumeta leti tingapfunikiki ntxhumu.

⁴⁹Hi swoswo switakahumelela akuheleni ka misava: a tintrumi titahuma a kutatatravukanisa a vhanu lava vamfani ku lava vanene,

⁵⁰kutatxukumetiwa lava vamfani akheleni dra ndrilo lomu kutakavani kudrila ni kuketrela ka menyo.

⁵¹Kutani Yene avutisi, aku: Xana n'wiswiyingelile leswi hinkwaswu? Vone vayangula vaku: Im'na.

⁵²Ahangaku ku vone: Loko mun'we mudondrisi wa Nawu apfumela a dondro ya Mfumu wa Matilo afana ni n'winyi wa ndangu, lweyi ativaka a kuhumexa ku vukosi byake, a mintxhumu mimpswha ni ya khale.

⁵³Kahangahumelela leswaku loko Yesu aheti kudrungula a swifaniso leswi, asuki kolahu

⁵⁴atlhelela atikweni dra le kwavu, lomu asunguliki kudondrisa asinagogeni dra mbangu lowo. A vhanu vahlamala vaku: Byipfa kwini a vutivi lebyi ni ntamu wa kuyentxa mahlolana?

⁵⁵Xana lweyi ahi yene a n'wana wa muvatli xana? Xana a mamana wakwe ahi yene lweyi valiki i Maria? Ni vamakwavu, ahi Yakobe, na Yosefa, na Simoni na Yuda?

⁵⁶Ni vamakwavu va vaxisati avatrhami kolomu na hine xana? Swipfa kwinike hinkwaswu leswi?

⁵⁷Hikolahu ka swone vakhunguvanyeka ha Yene. Kutani Yesu aku ku vone: A muprofeta angapfumali xitxhavu, loko kunge ka lekwavu ni le ndlwini yake.

⁵⁸Hinkonta yakuva a vhanu vangapfumelangakiki, angayentxanga mahlolana manyingi kone.